ରାୟପୁର,୧୯।୯: ଛତିଶଗଡ଼ରେ ହାତୀ-ମଣିଷ ମଧ୍ୟରେ ଲଢ଼େଇ ଥମିବାର ନାଁ ଧରୁନି। ଜଙ୍ଗଲ ପରିସୀମା କମିବାରୁ ହାତୀ ଖାଦ୍ୟ ତଥା ବାସ ଅଭାବରୁ ଜନବସତିରେ ପଶୁଛି। ଏହାଯୋଗୁ ରାଜ୍ୟରେ ପ୍ରତି ବର୍ଷ ୬୫ ଲୋକଙ୍କର ହାତୀ ଆକ୍ରମଣରେ ମୃତ୍ୟୁ ଘଟୁଛି। ସେହିପରି ମଣିଷଙ୍କ ଆକ୍ରମଣରେ ପ୍ରତି ବର୍ଷ ୧୪ ହାତୀଙ୍କ ଜୀବନ ଯାଉଛି। ଏନେଇ ଗତ ୫ ବର୍ଷର ଏକ ରିପୋର୍ଟ ପ୍ରକାଶ ପାଇଛି। ଏଥିରେ ଦର୍ଶାଯାଇଛି ଯେ, ଗତ ୫ ବର୍ଷ ମଧ୍ୟରେ ରାଜ୍ୟରେ ହାତୀ ଆକ୍ରମଣରେ ୩୨୫ ଲୋକଙ୍କ ମୃତ୍ୟୁ ଘଟିଛି। ଅପରପକ୍ଷରେ ମଣିଷଙ୍କ ଯୋଗୁ ୭୦ ହାତୀଙ୍କ ମୃତ୍ୟୁ ଘଟିଛି। ହାତୀ ଏହି ସମୟ ମଧ୍ୟରେ ୭୫ କୋଟି ଟଙ୍କାର ଫସଲ ନଷ୍ଟ କରିଛନ୍ତି। ରାଜ୍ୟରେ ଅଧିକ ଜଙ୍ଗଲ ଥିବାରୁ ଏଠାକୁ ୧୯୮୮ଠାରୁ ହାତୀ ଅନ୍ୟ ପଡ଼ୋଶୀ ରାଜ୍ୟରୁ ଆସିବା ଆରମ୍ଭ କରିଥିଲେ। ହାତୀ ସଂଖ୍ୟା ବୃଦ୍ଧି ଯୋଗୁ ଜଙ୍ଗଲରେ ଖାଦ୍ୟର ଅଭାବ ସୃଷ୍ଟି ହୋଇଥିଲା। ଫଳରେ ଜଙ୍ଗଲୀ ହାତୀ ନିକଟସ୍ଥ ଜନବସତିରେ ପ୍ରବେଶ କରିବା ଆରମ୍ଭ କରିଥିଲେ। ସମ୍ପ୍ରତି ରାଜ୍ୟରେ ୨୫୪ରୁ ଅଧିକ ହାତୀ ରହିଛନ୍ତି। ସେମାନେ ୧୯ଟି ପଲରେ ପୃଥକ୍ ପୃଥକ୍ ଭାବେ ବିଭିନ୍ନ ଅଞ୍ଚଳରେ ଅଛନ୍ତି। ବିଳାସପୁର ସର୍କଲରେ ୧୨୧ ହାତୀ ଥିବାବେଳେ ସରଗୁଜାରେ ୧୧୦ ହାତୀ ଏବଂ ରାୟପୁର ସର୍କଲରେ ୨୩ ହାତୀ ରହିଥିବା ରାଜ୍ୟ ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
