ଗୋହାନା,୧୯ା୧୦(ପି.ଟି.): କଂଗ୍ରେସର କୁଶାସନ ବେଳେ ଯବାନ ହୁଅନ୍ତୁ କି ଚାଷୀ ଅଥବା କ୍ରୀଡ଼ାବିତ୍ ଦେଶରେ କେହି ସୁରକ୍ଷିତ ନ ଥିଲେ। ଏହି ଦଳ ବାଲାକୋଟ ଏୟାର ଷ୍ଟ୍ରାଇକ୍ ହେଉ କି ଅନୁଚ୍ଛେଦ ୩୭୦ ଉଚ୍ଛେଦ କୌଣସି ଭଲ କାମକୁ ସମର୍ଥନ କରିନାହିଁ। ପାକିସ୍ତାନ ସହ କଂଗ୍ରେସର ସମ୍ପର୍କ କ’ଣ ବୋଲି ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଶ୍ନ କରିଛନ୍ତି।
୯୦ ଆସନ ବିଶିଷ୍ଟ ହରିୟାଣା ବିଧାନସଭା ନିର୍ବାଚନ ଆସନ୍ତା ୨୧ରେ ହେବ। ପ୍ରଧାନମନ୍ତ୍ରୀ ଏଥିପାଇଁ ପ୍ରଚାରରେ ଯାଇ କଂଗ୍ରେସ ଉପରେ ବର୍ଷିଛନ୍ତି। ସୋନେପଥ ଜିଲା ଗୋହନାରେ ଭାଜପାର ଏକ ସଭାକୁ ସମ୍ବୋଧିତ କରି ସେ କହିଛନ୍ତି, ପାକିସ୍ତାନ ଅନ୍ତର୍ଜାତୀୟ ମଞ୍ଚରେ ଭାରତ ବିରୋଧରେ ବିଭିନ୍ନ ପ୍ରସଙ୍ଗ ଉଠାଉଛି। ସେଗୁଡ଼ିକୁ ଦୃଢ଼ କରିବା ଲାଗି କଂଗ୍ରେସକୁ ବ୍ୟବହାର କରୁଛି। କାରଣ କଂଗ୍ରେସ ଜାତୀୟ ସ୍ବାର୍ଥରେ ନିଆଯାଇଥିବା ନିଷ୍ପତ୍ତିକୁ ବିରୋଧ କରୁଛି। ଆମେ ଯେତେବେଳେ ବି ସ୍ବଚ୍ଛ ଭାରତ କି ସର୍ଜିକାଲ ଷ୍ଟ୍ରାଇକ୍ କଥା କହୁ, କଂଗ୍ରେସର ପେଟବ୍ୟଥା ହୁଏ। ବାଲାକୋଟ କଥା କହିଲେ କଂଗ୍ରେସ ଯନ୍ତ୍ରଣାରେ ଡେଇଁବା ଆରମ୍ଭ କରେ। ସେହିପରି କଂଗ୍ରେସ ଏବେଠାରୁ ନିର୍ବାଚନରେ ପରାଜୟକୁ ସ୍ବୀକାର କରିଛି ବୋଲି ସେ ହିସାରରେ ସମାଲୋଚନା କରିଛନ୍ତି।
ମୋଦିଙ୍କ ଅର୍ଥନୀତି ଜ୍ଞାନ ନାହିଁ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅର୍ଥନୀତି ଜ୍ଞାନ ନାହିଁ। ଭାଜପାର ଲୋକଙ୍କୁ ପରସ୍ପର ସହ ଲଢ଼ାଇବା ରାଜନୀତିକୁ ନେଇ ବିଶ୍ୱ ସମୁଦାୟ ଭାରତକୁ ଉପହାସ କରୁଛି ବୋଲି ଶୁକ୍ରବାର କଂଗ୍ରେସ ନେତା ରାହୁଲ ଗାନ୍ଧୀ ସମାଲୋଚନା କରିଛନ୍ତି। ହରିୟାଣା ବିଧାନସଭା ନିର୍ବାଚନ ପାଇଁ ପ୍ରଚାର ଶେଷ ପର୍ଯ୍ୟାୟରେ ପହଞ୍ଚତ୍ଥିବାବେଳେ ସେ ଆର୍ଥିକ ମାନ୍ଦାବସ୍ଥା, ବେକାରି ସମସ୍ୟା ଓ ଚାଷୀଙ୍କ ଦୁର୍ଦ୍ଦଶା ପ୍ରସଙ୍ଗ ଉଠାଇ ସରକାରଙ୍କୁ ଘେରିଛନ୍ତି।
ମହେନ୍ଦ୍ରଗଡ଼ରେ ଦଳର ଏକ ସଭାରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ବଦଳରେ ରାହୁଲ ଯୋଗଦେଇଛନ୍ତି। ସେ କହିଛନ୍ତି, ଚାପରେ ଥିବା ଗଣମାଧ୍ୟମର ବନ୍ଧୁମାନେ ୨୪ ଘଣ୍ଟା କେବଳ ମୋଦିଙ୍କ ଭାଷଣ ଦେଖାଉଛନ୍ତି। ମୋଦିଙ୍କ ମୁହଁ, ତାଙ୍କ ଭାଷଣ, ଅନୁଚ୍ଛେଦ ୩୭୦, ଚନ୍ଦ୍ରୟାନ ଆଦି ଟିଭିରେ ଦେଖିବାକୁ ମିଳୁଛି। ମିଡିଆ କହୁଛି, ସତ କ’ଣ ଆମେ ଜାଣିଛୁ। କିନ୍ତୁ ତାହା ଆମେ ଦେଖାଇପାରିବୁ ନାହିଁ। କାରଣ ଆମର ଚାକିରି ଚାଲିଯିବ। ଏବେ ଟିଭି ଚ୍ୟାନେଲ ଓ ଖବରକାଗଜଗୁଡ଼ିକ ୫ରୁ ୧୦ ଜଣ ବ୍ୟବସାୟୀଙ୍କ ହାତରେ ରହିଛି ବୋଲି ରାହୁଲ ଅଭିଯୋଗ କରିଛନ୍ତି। ସେ ଆହୁରି କହିଛନ୍ତି, ମୋଦିଙ୍କ କେବଳ ଗୋଟିଏ କାମ ହେଉଛି ପ୍ରକୃତ ପ୍ରସଙ୍ଗରୁ ଲୋକଙ୍କ ଧ୍ୟାନ ହଟାଇବା। ଏକଦା ବିଶ୍ୱକୁ ପ୍ରେମ, ବିକାଶ ଓ ସହାବସ୍ଥାନର ବାଟ ବତାଉଥିବା ଦେଶ ଭାରତରେ ଆଜି ଜାତି, ଧର୍ମକୁ ନେଇ ଲଢ଼େଇ ଚାଲିଛି। ମୋଦି ବିମୁଦ୍ରୀକରଣ ଓ ଗବ୍ବର ସିଂ ଟାକ୍ସ (ଜିଏସ୍ଟି) ଆଣି ଦେଶର ଅର୍ଥନୀତିକୁ ଧ୍ୱଂସ କରିଦେଲେଣି। ଏଥିଯୋଗୁ କ୍ଷୁଦ୍ର ଓ ମଧ୍ୟମ ସ୍ତରର ବ୍ୟବସାୟ ବନ୍ଦ ହୋଇଯାଉଛି। ବେକାରି ସମସ୍ୟା ୪୦ ବର୍ଷରେ ସର୍ବାଧିକ ସ୍ତରରେ ପହଞ୍ଚତ୍ଛି। ଚାଷୀ ଆମତ୍ହତ୍ୟା କରୁଛନ୍ତି ବୋଲି ରାହୁଲ ସମାଲୋଚନା କରିଛନ୍ତି।
