ବଇଣ୍ଡା,୧୭।୬(ଡି.ଏନ.ଏ.) ଅନୁଗୋଳ ଜିଲା କିଶୋରନଗର ବ୍ଲକ ହଣ୍ଡପା ପ୍ରାଣୀ ଚିକିତ୍ସାଳୟ ଅବହେଳିତ ହୋଇପଡ଼ିଛି। କର୍ମଚାରୀମାନେ ଚିକିତ୍ସାଳୟ ଖୋଲୁ ନ ଥିବାବେଳେ ଗୃହପାଳିତ ପଶୁଙ୍କୁ ଚିକିତ୍ସା ମିଳୁ ନ ଥିବା ଅଭିଯୋଗ ହୋଇଛି। ଏ ନେଇ ହଣ୍ଡପା ଗ୍ରାମବାସୀ ଶୁକ୍ରବାର ଅନୁଗୋଳ ଜିଲାପାଳଙ୍କୁ ଅଭିଯୋଗପତ୍ର ମାଧ୍ୟମରେ ଅବଗତ କରାଇଛନ୍ତି।
ଗ୍ରାମବାସୀ କହିଛନ୍ତି, ଏହି ଚିକିତ୍ସାଳୟ ଉପରେ ହଣ୍ଡପା, ବିଲେଇନାଳୀ, ଗାଁ ବଇଣ୍ଡା, ନୁନୁକାପଶି, ଲୁହାମୁଣ୍ଡା, କଣ୍ଟେଇକୁଳିଆ, କଟରଙ୍ଗା, ଜାମ୍ବୁନାଳୀ ଆଦି ୯ଟି ପଞ୍ଚାୟତର ବାସିନ୍ଦା ଗୃହପାଳିତ ପ୍ରାଣୀଙ୍କ ଚିକିତ୍ସା ପାଇଁ ନିର୍ଭର କରିଥାନ୍ତି। ୨୦୧୦ ଗଣନା ଅନୁଯାୟୀ ଏହି ପଞ୍ଚାୟତ ଗୁଡ଼ିକରେ ୧୫,୫୦୦ ମେଣ୍ଢା, ଗାଈ, ମଇଁଷି, ଛେଳି ରହିଛନ୍ତି। ଏଠାରେ ଜଣେ ପ୍ରାଣୀ ଡାକ୍ତର, ଜଣେ ଫାର୍ମାସିଷ୍ଟ ଓ ଜଣେ ପିଅନ ଆବଶ୍ୟକ ଥିବାବେଳେ ଦୀର୍ଘଦିନ ହେବ ଡାକ୍ତର ଓ ଫାର୍ମାସିଷ୍ଟ ପଦବୀ ଖାଲିପଡ଼ିଛି। ୨୦୧୮ ମେରେ ବଇଣ୍ଡା ଡାକ୍ତରଖାନାଟି ୫୫ନଂ. ଜାତୀୟ ରାଜପଥ ସମ୍ପ୍ରସାରଣ ଯୋଗୁ ଭଙ୍ଗା ଯାଇଥିବାବେଳେ ନୂତନ କେନ୍ଦ୍ର ନିର୍ମାଣ ହୋଇ ନ ଥିବା ଯୋଗୁ ହଣ୍ଡପା ପ୍ରାଣୀ ଚିକିତ୍ସାକେନ୍ଦ୍ରକୁ ବଇଣ୍ଡା ପ୍ରାଣୀ ଚିକିତ୍ସାଳୟର ସମସ୍ତ ଔଷଧ ଓ ଯନ୍ତ୍ରପାତି ସ୍ଥାନାନ୍ତର କରାଯାଇଛି। ଏପରିକି ବଇଣ୍ଡା ପ୍ରାଣୀ ଚିକିତ୍ସା ଅଧିକାରୀଙ୍କୁ ହଣ୍ଡପା ଚିକିତ୍ସାକେନ୍ଦ୍ରର ଦାୟିତ୍ୱ ହସ୍ତାନ୍ତର କରାଯାଇଛି। ହେଲେ ହଣ୍ଡପା କେନ୍ଦ୍ରଟି ଏପ୍ରିଲ ମାସରୁ ଖୋଲାଯାଉ ନାହିଁ। କୌଣସି କର୍ମଚାରୀ କେନ୍ଦ୍ରକୁ ଆସୁ ନ ଥିବାରୁ ଚିକିତ୍ସାଳୟରେ ସଦାସର୍ବଦା ତାଲା ଝୁଲୁଛି। ଏପରିକି ଘରୋଇ ପ୍ରାଣୀ ଡାକ୍ତରଙ୍କ ଉପରେ ନିର୍ଭର କରି ଲୋକେ ଖର୍ଚ୍ଚାନ୍ତ ହେଉଛନ୍ତି। ଅନ୍ୟପକ୍ଷରେ କାର୍ଯ୍ୟାଳୟଟି ଏବେ ବିପଦ ସଙ୍କୁଳ ଅବସ୍ଥାରେ ଥିବାବେଳେ ସା ହେଲେ ଅସାମାଜିକ ବ୍ୟକ୍ତିଙ୍କ ଆଡ୍ଡାସ୍ଥଳୀ ପାଲଟିଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ତୁରନ୍ତ ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି। ଏ ନେଇ ଭାରପ୍ରାପ୍ତ ପ୍ରାଣୀ ଚିକିତ୍ସାଧିକାରୀ ମୁରଲୀ ଧର କଅଁର କହିଛନ୍ତି, ମୋ ଅଧୀନରେ ଥିବା ଗ୍ରାମଗୁଡ଼ିକୁ ଯାଇ ଚିକିତ୍ସା କରୁଥିବା ଯୋଗୁ ସ୍ବାସ୍ଥ୍ୟକେନ୍ଦ୍ର ଖୋଲାଯାଇ ପାରୁନାହିଁ।
