ଗୋପ,୨୪।୩(ଡି.ଏନ୍.ଏ): କରୋନାକୁ ନେଇ ସାରା ବିଶ୍ବରେ ଆତଙ୍କ ଦେଖାଯାଇଥିବାବେଳେ ଗୋପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ତା’ର ବ୍ୟତିକ୍ରମ ଦେଖାଯାଇଛି। ସାମାଜିକ ଦୂରତା ଦୃଷ୍ଟି ଦିଆ ଯାଉ ନ ଥିବାରୁ ସ୍ବାସ୍ଥ୍ୟ କେନ୍ଦ୍ରକୁ ଆସୁଥିବା ଲୋକେ ଲମ୍ବା ଲାଇନରେ ଛିଡ଼ା ହୋଇ ଅସନ୍ତୋଷ ପ୍ରକାଶ କରିଛନ୍ତି। ସୂଚନାଯୋଗ୍ୟ, ସୋମବାର ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ଅଚାନକ ଗୋପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ବିଭିନ୍ନ ରୋଗୀଙ୍କ ସହ କଥା ହେବା ପରେ ରୋଗୀ ଓ ଲୋକଙ୍କ ଲମ୍ବାଲାଇନ ଛିଡ଼ା ହୋଇଥିବା ଦେଖି ବିରକ୍ତି ପ୍ରକାଶ କରିଥିଲେ। ତୁରନ୍ତ ରୋଗୀଙ୍କୁ ଲାଇନରେ ଠିଆ ନ କରି ଚେୟାରରେ ବସାଇବାକୁ ଡାକ୍ତର ଓ କର୍ମଚାରୀମାନଙ୍କୁ କହିଥିଲେ। କିନ୍ତୁ ମନ୍ତ୍ରୀଙ୍କ ନିର୍ଦ୍ଦେଶର ଗୋଟିଏ ଦିନ ପରେ ଅର୍ଥାତ ମଙ୍ଗଳବାର ସକାଳୁ ବିଭିନ୍ନ ରୋଗରେ ଆକ୍ରାନ୍ତ ହୋଇ ଆସିଥିବା ରୋଗୀ ଏବଂ ଲୋକେ ଘଣ୍ଟା ଘଣ୍ଟା ଧରି ପୁଣି ଲାଇନରେ ଠିଆ ହୋଇଥିବା ଦେଖିବାକୁ ମିଳିଛି। ସ୍ବାସ୍ଥ୍ୟକେନ୍ଦ୍ରରେ ଆବଶ୍ୟକୀୟ ଡାକ୍ତର ନ ଥିବାବେଳେ ଜଣେ ଡାକ୍ତରଙ୍କୁ ୨୪ ଘଣ୍ଟା ଡିୟୁଟି ଦିଆଯାଉଥିବାରୁ ଏପରି ଅବସ୍ଥା ଉପୁଜି ଥିବା ଜଣାପଡିଛି। ଏହି ସମୟରେ କୌଣସି ଗୁରୁତର ରୋଗୀ ଆସିଲେ ସେହି ଡାକ୍ତର ଯିବା ଯୋଗୁ ଆହୁରି କିଛି ସମୟ ଲାଇନରେ ଅପେକ୍ଷା କରନ୍ତି। ଡାକ୍ତରଖାନା ଅଧିକାରୀ ଏବଂ ପୁରୀ ଜିଲା ଚିକିତ୍ସାଧିକାରୀ ଏଥିପ୍ରତି ଦୃଷ୍ଟି ଦେବାକୁ ରୋଗୀମାନେ ଦାବି କରିଛନ୍ତି। ଅପରପକ୍ଷେ ଏହି ଡାକ୍ତରଖାନାର ଦାୟିତ୍ୱ ପୁରୀରେ ଥିବା ଜଣେ ଡାକ୍ତରଙ୍କ ହାତରେ ଥିବାରୁ ଏଠାରେ ଥିବା ଡାକ୍ତର କିଛି ପଦକ୍ଷେପ ନେଇ ପାରୁନାହାନ୍ତି ବୋଲି ଜଣାପଡିଛି। ଏ ସମ୍ପର୍କରେ ଏହି ସ୍ବାସ୍ଥ୍ୟକେନ୍ଦ୍ର ଆଂଶିକ ଦାୟିତ୍ୱରେ ଥିବା ଶିବ ପ୍ରସାଦ ମଙ୍ଗରାଜ କୁହନ୍ତି, ଏଠାରେ ଆବଶ୍ୟକତା ଅନୁସାରେ ସବୁ କରାଯାଉଥିବା କହି ଅନ୍ୟ ପ୍ରସଙ୍ଗକୁ ଏଡ଼ାଇ ଦେଇଛନ୍ତି।
