ରଣପୁର,୨୬ା୯(ସ୍ବ.ପ୍ର.): ରଣପୁର ଏନ୍ଏସିରେ ସ୍ବଚ୍ଛ ସାଥୀ ଚୟନରେ ଅନିୟମିତତା ନେଇ ଜିଲାପାଳଙ୍କ ନିକଟରେ ଅଭିଯୋଗ ହୋଇଛି। ଏଥିରେ ଆବେଦନକାରୀଙ୍କୁ ଅଣଦେଖା କରାଯାଇ ଅଣଆବେଦନକାରୀଙ୍କୁ ଅନୁକମ୍ପା ଦେଖାଇ ନିଯୁକ୍ତି ମିଳିଛି ବୋଲି ଦର୍ଶାଯାଇଛି। ସ୍ବଚ୍ଛ ଭାରତ ମିଶନ ପକ୍ଷରୁ ରଣପୁର ଏନ୍ଏସିରେ ୩ ସ୍ବଚ୍ଛ ସାଥୀ ଓ ୧ ସୁପରଭାଇଜର ପଦବୀ ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଥିଲା। ହେଲେ କେବଳ ୩ ସ୍ବଚ୍ଛ ସାଥୀଙ୍କ ନିଯୁକ୍ତି କାର୍ଯ୍ୟ ପ୍ରଥମେ ହୋଇଥିଲା। ଏଥିପାଇଁ ୧୩ ଜଣ ଆବେଦନ କରିଥିଲେ। ଯୁକ୍ତ ୨ ପାସ କରିଥିବା ସ୍ବୟଂ ସହାୟିକା ଗୋଷ୍ଠୀ ସଭ୍ୟା କେବଳ ଏଥିରେ ନିଯୁକ୍ତି ପାଇବେ ବୋଲି କୁହାଯାଇଥିଲା। ଏଥିପାଇଁ ବିଜ୍ଞାପନ ବାହାରି ନ ଥିଲା। ଏପରିସ୍ଥଳେ ୧୩ ଆବେଦନକାରୀଙ୍କୁ ବାଦ୍ ଦେଇ ୩ ଜଣଙ୍କୁ ନିଯୁକ୍ତି ମିଳିଛି । ନିଯୁକ୍ତି ପାଇଥିବା ୩ ସ୍ବଚ୍ଛ ସାଥୀଙ୍କୁ ବୁଧବାର ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ କାର୍ଯ୍ୟ ସମ୍ପର୍କରେ ପ୍ରଶିକ୍ଷଣ ଦେଇଛନ୍ତି। ଏଣେତେଣେ ଅଳିଆ ନ ପକାଇ କେବଳ ଡଷ୍ଟବିନ୍ରେ ପକାଇବାକୁ ବିଭିନ୍ନ ୱାର୍ଡ ବୁଲି ସଚେତନତା ସୃଷ୍ଟି କରିବା ସ୍ବଚ୍ଛ ସାଥୀର କାର୍ଯ୍ୟ ବୋଲି କୁହାଯାଇଛି। ଆଗାମୀ ଦିନରେ ପୁଣି ୩ଜଣ ରହିବାର ବ୍ୟବସ୍ଥା ରହିଛି। ଏ ନେଇ ମା’ ତାରିଣୀ ସ୍ବୟଂ ସହାୟିକା ଗୋଷ୍ଠୀର ଲକ୍ଷ୍ମୀପ୍ରିୟା ସାହୁ କୁହନ୍ତି, ମୁଁ ବିଏ ପାସ୍ କରି ଆବେଦନ କରିଥିଲି। ମୋତେ ସୁଯୋଗ ଦିଆଗଲାନି। ମୋଠାରୁ କମ୍ ପାଠ ପଢ଼ି ଆବେଦନ କରି ନ ଥିବା ପ୍ରାର୍ଥୀ ନିଯୁକ୍ତି ପାଇଛନ୍ତି। ନିଯୁକ୍ତି ପ୍ରକ୍ରିୟାରେ ଅନିୟମିତା କରାଯାଇ ଯୋଗ୍ୟ ପ୍ରାର୍ଥୀଙ୍କୁ ଚୟନ କରାଗଲା ନାହିଁ । ରାନୁପ୍ରିୟା ମଲ୍ଲିକ କୁହନ୍ତି, ମୁଁ ଉଚ୍ଚ ଶିକ୍ଷିତା ହୋଇଥିବାବେଳେ ମୋତେ ଅଣଦେଖା କରାଗଲା। ଆବେଦନ କରିଥିଲେ ବି ମୋତେ ସାକ୍ଷାତକାରକୁ ଡକାଇଲେ ନାହିଁ। ଏନ୍ଏସି ନିର୍ବାହୀ ଅଧିକାରୀ ଅର୍ଚ୍ଚନା ନାୟକ କୁହନ୍ତି, ସ୍ବଚ୍ଛ ସାଥୀ ପାଇଁ ବିଜ୍ଞାପନ ପ୍ରକାଶ କରିବାର ଆବଶ୍ୟକତା ନାହିଁ। ଆବେଦନକାରୀଙ୍କ ମଧ୍ୟରୁ ଚୟନ କରାଯିବା ମଧ୍ୟ ନିିୟମ ନାହିଁ । ସରକାରଙ୍କ ନିର୍ଦ୍ଦେଶ ଅନୁସାରେ ଯେଉଁମାନଙ୍କର କାର୍ଯ୍ୟ କରିବାର ଦକ୍ଷତା ରହିଛି ସେପରି ସ୍ବୟଂ ସହାୟିକା ଗୋଷ୍ଠୀର ୩ଜଣଙ୍କୁ ନିଯୁକ୍ତି ଦିଆଯାଇ ପ୍ରଶିକ୍ଷଣ ଦିଆଯାଇଛି।
