ନୂଆଦିଲ୍ଲୀ, ୮।୫-ପୁରୁଷ କ୍ରୀଡ଼ାବିତ୍ଙ୍କ ପାଇଁ ମହିଳାମାନେ ସାଧାରଣତଃ ପ୍ରତିବନ୍ଧକ ବୋଲି ବିବେଚନା କରାଯାଏ, ଶକ୍ତି ଭାବରେ ନୁହେଁ। ବିଶେଷକରି ଉପମହାଦେଶରେ ଏହା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ବୋଲି ଭାରତୀୟ ମହିଳା ଟେନିସ ତାରକା ସାନିଆ ମିର୍ଜା ପ୍ରକାଶ କରିଛନ୍ତି। ଯଦି ଜଣେ ପୁରୁଷ କ୍ରୀଡ଼ାବିତ୍ ଭଲ ପ୍ରଦର୍ଶନ କରି ନ ପାରେ ତେବେ ତାଙ୍କ ସ୍ତ୍ରୀ କିମ୍ବା ବାନ୍ଧବୀଙ୍କୁ କାହିଁକି ଦାୟୀ କରାଯାଏ ତାହା ବୁଝି ହୁଏନି ବୋଲି ସାନିଆ କହିଛନ୍ତି ।
ଅଷ୍ଟ୍ରେଲିଆ ଦ୍ରୁତ ବୋଲର ମିଚେଲ ଷ୍ଟାର୍କଙ୍କୁ ପ୍ରଶଂସା କରିଛନ୍ତି ସାନିଆ। କାରଣ ଷ୍ଟାର୍କ ଅଷ୍ଟ୍ରେଲିଆ ପକ୍ଷରୁ ଏକ ଦିନିକିଆ ଅନ୍ତର୍ଜାତୀୟ ମ୍ୟାଚ ଖେଳିବା ପରିବର୍ତ୍ତେ ଚଳିତ ବର୍ଷ ପ୍ରାରମ୍ଭରେ ସ୍ତ୍ରୀ ଆଲିସା ହିଲିଙ୍କ ମହିଳା ଟି୨୦ ବିଶ୍ୱକପ ଫାଇନାଲ ଦେଖିବାକୁ ପସନ୍ଦ କରିଥିଲେ। ଉପମହାଦେଶରେ ଏପରି କେହି କରିଥିଲେ ତାଙ୍କୁ ‘ଜୋରୁ କା ଗୁଲାମ’ କୁହାଯାଇଥାନ୍ତା ବୋଲି ସାନିଆ କହିଛନ୍ତି। ପ୍ରକାଶ ଯୋଗ୍ୟ ଯେ, ସ୍ବାମୀ ତଥା ପାକିସ୍ତାନ କ୍ରିକେଟର ସୋଏବ ମଲିକଙ୍କ ସହ ବିଭିନ୍ନ ଟୁର୍ରେ ଯିବାବେଳେ ସାନିଆଙ୍କୁ ସମାଲୋଚନାର ସରବ୍ୟ ହେବାକୁ ପଡ଼ିଥିଲା । ସେହିପରି ଇଣ୍ଡିଆନ ପ୍ରିିମିୟର ଲିଗ୍ ଏବଂ ଅନ୍ୟ ବିଦେଶ ଟୁର୍ ସମୟରେ ବିରାଟ କୋହଲିଙ୍କ ସହିତ ଯାଉଥିବା ଅଭିନେତ୍ରୀ ଅନୁଷ୍କା ଶର୍ମା ମଧ୍ୟ ସମାଲୋଚନାର ଶିକାର ହୋଇଛନ୍ତି। ”ଅନୁଷ୍କା ଓ ମୁଁ ସମାନ ପରିସ୍ଥିତିର ସମ୍ମୁଖୀନ ହେଉଛୁ। ଆମେ ଏ ସମ୍ପର୍କରେ ବିସ୍ତୃତ ଆଲୋଚନା କରିଛୁ। ଯେତେବେଳେ ସ୍ବାମୀମାନେ ଭଲ ପ୍ରଦର୍ଶନ କରନ୍ତି ଏହାର ଶ୍ରେୟ ତାଙ୍କୁ ଦିଆଯାଏ। ମାତ୍ର ସେମାନେ ଖରାପ ଖେଳନ୍ତି ସେତେବେଳେ ଆମମାନଙ୍କୁ ଦାୟୀ କରାଯାଏ। ଏହା କିପରି କାର୍ଯ୍ୟ ବୁଝିହେଉନି“ ବୋଲି ସାନିଆ କହିଛନ୍ତି। ଆମେମାନେ ହାଲ୍କାଭାବେ ନେଉଥିଲେ ହେଁ ଏହା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ସ୍ତ୍ରୀ କିମ୍ବା ଗର୍ଲଫ୍ରେଣ୍ଡମାନଙ୍କୁ କେବେହେଲେ ମନୋବଳ ବୃଦ୍ଧିକାରୀ କିମ୍ବା ଶକ୍ତିଭାବେ ବିବେଚନା କରାଯାଉ ନାହିଁ। ସାଥିରେ ସ୍ତ୍ରୀ କିମ୍ବା ଗର୍ଲଫ୍ରେଣ୍ଡ ଅଛନ୍ତି ମାନେ ସେମାନେ ନିଶ୍ଚିତ ରାତ୍ରଭୋଜନ ପାଇଁ ଯାଇଥିବେ ବୋଲି ଚିନ୍ତା କରାଯାଏ, ଯାହାର କିଛି ମାନେ ନାହିଁ ବୋଲି ସାନିଆ କହିଛନ୍ତି। ଷ୍ଟାର୍କ ଯେତେବେଳେ ସ୍ତ୍ରୀଙ୍କ ବିଶ୍ୱକପ ଫାଇନାଲ ଦେଖିବାକୁ ଆସିଲେ ସେତେବେଳେ ସମସ୍ତେ ତାଙ୍କୁୁ ପ୍ରଶଂସା କରିଥିଲେ। ସୋଏବ ମୋ ପାଇଁ ତାହା କରିଥାନ୍ତି ବୋଲି ୬ ଥର ଗ୍ରାଣ୍ଡସ୍ଲାମ ବିଜୟିନୀ ସାନିଆ ପ୍ରକାଶ କରିଛନ୍ତି ।
