କଟକ ଅଫିସ,୧୦ା୪: ଲକ୍ଡାଉନ ବଳବତ୍ତର ଥିବାରୁ ସାଧାରଣରେ ଯାତାୟାତ ବନ୍ଦ ହୋଇଯାଇଛି । ବିନା କାରଣରେ ଲୋକଙ୍କୁ ରାସ୍ତାରେ ବୁଲୁଥିବା ଦେଖିଲେ ପୋଲିସ ଜରିମାନା ଲଦିବା ସହ ଗାଡ଼ି ଜବତ କରି ନେଉଛି। ଏଭଳି ସ୍ଥିତିରେ କଟକର ୮ଜଣ ଯୁବକ ସ୍ବାସ୍ଥ୍ୟସେବା ଲୋଡ଼ୁଥିବା ଲୋକଙ୍କ ପାଇଁ ଦେବଦୂତ ପାଲଟିଛନ୍ତି। ଘରୋଇ ନର୍ସିଂହୋମରେ ଭର୍ତ୍ତି ହେଉଥିବା ରୋଗୀ ହୁଅନ୍ତୁ କିମ୍ବା ଏସ୍ସିବି ମେଡିିକାଲରୁ ଡିସଚାର୍ଜ ହୋଇ ଦୂରଦୂରାନ୍ତକୁ ଯିବା ପାଇଁ ଚାହୁଁଥିବା ରୋଗୀଙ୍କ ପାଇଁ ଏମାନେ ମାଗଣାରେ ସେବା ଯୋଗାଉଛନ୍ତି। କଟକରେ ଚିକିତ୍ସିତ ହେଉଥିବା ବରଗଡ଼ର ଜଣେ ରୋଗୀ ଘରକୁ ଫେରି ଏ ନେଇ ସୋସିଆଲ ମିଡ଼ିଆରେ ପୋଷ୍ଟ କରିବା ପରେ ଏଭଳି ଘଟଣା ଜଣାପଡ଼ିଥିଲା। ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳଙ୍କ ନେତୃତ୍ୱରେ ଏହି ଟିମ୍ କାମ କରୁଛି।
ବରଗଡ଼ର ରାଜେଶ କୁମାର ତ୍ରିପାଠୀଙ୍କ ଜଣେ ସମ୍ପର୍କୀୟ ବୋନ୍ କ୍ୟାନ୍ସରରେ ପୀଡ଼ିତ ହୋଇ କଟକରେ ଚିକିତ୍ସିତ ହେଉଥିଲେ। କିଛି ଦିନ ତଳେ ରୋଗୀ ଜଣଙ୍କୁ ଘରକୁ ଫେରିଯିବା ପାଇଁ ଡାକ୍ତର ପରାମର୍ଶ ଦେଇଥିଲେ। ହେଲେ ବରଗଡ଼କୁ ଯିବା ପାଇଁ ଅର୍ଥ ବାଧକ ସାଜିଥିବାବେଳେ କୌଣସି ଘରୋଇ ଆମ୍ବୁଲାନ୍ସ ଯିବାକୁ ମଧ୍ୟ ରାଜି ହୋଇ ନ ଥିଲେ। ଏ ନେଇ ରାଜେଶ ବିଧାୟକ ଦେବେଶ କୁମାର ଆଚାର୍ଯ୍ୟଙ୍କୁ ଯୋଗାଯୋଗ କରିଥିଲେ। ପରେ ଘଟଣା ସମ୍ପର୍କରେ ଚୌଦ୍ୱାର-କଟକର ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳଙ୍କ ଖବର ପାଇ ରାଜେଶଙ୍କ ପ୍ରତି ସହାୟତାର ହାତ ବଢ଼ାଇଥିଲେ। ନିଃଶୁଳ୍କରେ ଏକ ଘରୋଇ ଆମ୍ବୁଲାନ୍ସ ଗାଡ଼ି ଜରିଆରେ ରାଜେଶ ଓ ତାଙ୍କ ସମ୍ପର୍କୀୟଙ୍କୁ ବରଗଡ଼ରେ ଛାଡ଼ିଥିଲେ। ପ୍ରଭାତଙ୍କୁ ଏଭଳି ମହତ କାମରେ ସହଯୋଗ କରୁଛନ୍ତି ୮ ଯୁବକ। ସେମାନେ ହେଲେ ଭବାନୀ ଶଙ୍କର ଦାଶ, ରବୀନ୍ଦ୍ର କୁମାର ରାଉତରାୟ, ଚିନ୍ମୟ ସାହୁ, ସୀମାଞ୍ଚଳ ବାରିକ, ଯୁଧିଷ୍ଠିର ବିଶ୍ୱାଳ, ଅସିତ କୁମାର ପାଢ଼ୀ, ରାନୁ ବିଶ୍ୱାଳ ଏବଂ ପ୍ରଭାତ କୁମାର ଭୂୟାଁ। ଏବେ ସୁଦ୍ଧା ୧୦ରୁ ଊର୍ଦ୍ଧ୍ୱ ଡିସ୍ଚାର୍ଜ ରୋଗୀଙ୍କୁ ନିଃଶୁଳ୍କରେ ବିଭିନ୍ନ ଜିଲାରେ ନେଇ ଛାଡ଼ିବା ସହ ୪ଜଣ ରୋଗୀଙ୍କୁ ମେଡ଼ିକାଲରେ ଭର୍ତ୍ତି କରିବା କରି ସାରିଲେଣି। ଏ ସମ୍ପର୍କରେ ପୂର୍ବତନ ବିଧାୟକ ପ୍ରଭାତଙ୍କୁ ପଚାରିବାରୁ ସେ କହିଥିଲେ, ଏଭଳି ସମୟରେ ନିଜ ସାମର୍ଥ୍ୟ ଅନୁଯାୟୀ ସମସ୍ତେ ସହଯୋଗର ହାତ ବଢ଼ାଇବା ଉଚିତ୍। ଏସ୍ସିବିରେ ଅନେକ ଗରିବ ରୋଗୀ ଚିକିତ୍ସିତ ହେଉଛନ୍ତି। ଲକ୍ଡାଉନ ଯୋଗୁ ସେମାନେ ଘରକୁ ଫେରିବା ଅସମ୍ଭବ। ଲୋକଙ୍କୁ ସହାୟତା କରିବା ପାଇଁ ଯଥାସମ୍ଭବ ଚେଷ୍ଟା କରାଯାଉଛି।
