ସେନା ପ୍ରତି ସମ୍ମାନ ପ୍ରଦର୍ଶନ କରିବା ପାଇଁ ୧୯୪୯ରୁ ପ୍ରତିବର୍ଷ ୭ ଡିସେମ୍ବରରେ ସଶସ୍ତ୍ର ସେନା ପତାକା ଦିବସ ଭାରତରେ ପାଳନ କରାଯାଉଛି। ଦେଶର ଏକତା ଓ ଅଖଣ୍ଡତା ଲାଗି ଶହୀଦ ହୋଇଥିବା ଯବାନମାନଙ୍କୁ ବି ଏହି ଦିନ ସ୍ମରଣ କରାଯାଏ। ଭାରତୀୟ ସଶସ୍ତ୍ର ସେନା କର୍ମଚାରୀଙ୍କ କଲ୍ୟାଣ ନିମନ୍ତେ ଏହି ଦିବସରେ ପାଣ୍ଠି ସଂଗ୍ରହ କରାଯାଇଥାଏ।
ଭାରତ ସ୍ବାଧୀନ ହେବା ପରେ ସେନା କର୍ମଚାରୀଙ୍କ କଲ୍ୟାଣ ପାଇଁ ୨୮ ଅଗଷ୍ଟ , ୧୯୪୯ରେ ପ୍ରତିରକ୍ଷା ମନ୍ତ୍ରଣାଳୟ ଅଧୀନରେ ଏକ କମିଟି ଗଠନ କରାଯାଇ ପ୍ରତିବର୍ଷ ୭ ଡିସେମ୍ବରରେ ପତାକା ସଶସ୍ତ୍ର ସେନା ଦିବସ ପାଳନ କରିବା ଲାଗି ସ୍ଥିର କରିଥିଲେ। ଏହି ଦିବସ ଅବସରରେ ଲୋକମାନଙ୍କୁ ପତାକା ବଣ୍ଟନ କରାଯାଇ ତା’ବଦଳରେ ଦାନ ସଂଗ୍ରହ କରିବାର ଉଦ୍ଦେଶ୍ୟ ନିହିତ ଥିଲା। ଭାରତର ସାଧାରଣ ନାଗରିକମାନେ ସେନା ଯବାନମାନଙ୍କ ପରିବାର ପ୍ରତି ଯନତ୍ବାନ ହେବା ଦେଖାଯାଉଥିବାରୁ ଏହି ଦିବସର ଗୁରୁତ୍ୱ ରହିଆସିଛି। କାର୍ଯ୍ୟରତ ତଥା ଅବସରପ୍ରାପ୍ତ ସେନା କର୍ମଚାରୀ ତଥା ଯୁଦ୍ଧରେ ଶହିଦ କିମ୍ବା ଆହତଙ୍କ ପରିବାରର ପୁନର୍ବାସ ଓ କଲ୍ୟାଣ ଉକ୍ତ ଦିବସର ମୁଖ୍ୟ ଲକ୍ଷ୍ୟ। ଲୋକମାନଙ୍କୁ ପତାକା ବଣ୍ଟନ କରାଯାଇ ଫଣ୍ଡ୍ ସଂଗ୍ରହ କରାଯାଏ। ଏହା ଏକ ପ୍ରକୃଷ୍ଠ ଦିନ ଯେଉଁଥିରେ କାର୍ଯ୍ୟରତ ଓ ଅବସରପ୍ରାପ୍ତ ବୟସ୍କ ଯବାନଙ୍କ ପ୍ରତି କୃତଜ୍ଞତା ଜ୍ଞାପନ କରାଯିବା ସହ ଶହୀଦମାନଙ୍କୁ ସ୍ମରଣ କରାଯାଏ।
ସଶସ୍ତ୍ର ସେନା ଦିବସରେ ଭାରତର ସ୍ଥଳସେନା, ବାୟୁସେନା ଓ ନୌସେନା ପକ୍ଷରୁ ବିଭିନ୍ନ କୌଶଳ ପ୍ରଦର୍ଶନ କରାଯାଇଥାଏ। ମନୋରଞ୍ଜନ କାର୍ଯ୍ୟକ୍ରମ ସହ ନାଟକ ବି ପରିବେଷଣ ହୋଇଥାଏ। ଦେଶର ସୁରକ୍ଷା ନିଶ୍ଚିତ କରିବା ଲାଗି କାର୍ଯ୍ୟକ୍ରମ ମାଧ୍ୟମରେ ଲୋକମାନଙ୍କୁ ଅବଗତ କରାଯାଏ। ଦେଶରେ ନାଲି, ଗାଢ଼ ନୀଳ ଓ ଫିକା ନୀଳ ରଙ୍ଗର ଛୋଟ ଛୋଟ ପତାକା ଏବଂ କାର୍ ପତାକା ବଣ୍ଟାଯାଇ ତା’ବଦଳରେ ଦାନ ସଂଗ୍ରହ କରାଯାଇଥାଏ। ପ୍ରଥମେ ପ୍ରତିରକ୍ଷା ମନ୍ତ୍ରଣାଳୟ କମିଟି ଦ୍ୱାରା ଫ୍ଲାଗ ଡେ’ ଫଣ୍ଡ୍ ( ପତାକା ଦିବସ ପାଣ୍ଠି) ୧୯୪୯ରେ ଗଠନ କରାଯାଇଥିଲା। ୧୯୯୩ରେ ପ୍ରତିରକ୍ଷା ମନ୍ତ୍ରଣାଳୟ ଆର୍ମଡ ଫୋର୍ସ ଫ୍ଲାଗ୍ ଡେ’ ଫଣ୍ଡ୍ ପୁଣି ଗଠନ କରିଥିଲେ ଯାହା ଏବେ ରହିଛି।
