ପୁରୀ ଅଫିସ, ୨୦ା୧୦: ଶ୍ରୀମନ୍ଦିରକୁ ଆସୁଥିବା ଶ୍ରଦ୍ଧାଳୁଙ୍କୁ ଉତ୍ତମ ବ୍ୟବହାର ପ୍ରଦର୍ଶନ ପାଇଁ ସେବାୟତ, କର୍ମଚାରୀ, ଜେଟିପି(ଜଗନ୍ନାଥ ଟେମ୍ପୁଲ ପୋଲିସ)ଙ୍କୁ ବାରମ୍ବାର ଶୃଙ୍ଖଳାର ଜ୍ଞାନ ପଢ଼ାଉଛି ପ୍ରଶାସନ। ଏମିତିକି କଠୋର ଆଭିମୁଖ୍ୟ ବି ଆପଣାଉଛି। ତଥାପି ଅନେକେ ସେମାନଙ୍କ ଆଚରଣ ଓ ଉଚ୍ଚାରଣରେ ସଂଯମ ହୋଇପାରୁ ନାହାନ୍ତି। ଏଥିଲାଗି ଅନେକ ସମୟରେ ବଦନାମ୍ ହେଉଛି ଶ୍ରୀମନ୍ଦିର। ଶନିବାର ସୁପ୍ରିମକୋର୍ଟର ବିଚାରପତି ନୁଥଲାପତି ଭେଙ୍କଟ ରମନ୍ନାଙ୍କୁ ଶ୍ରୀମନ୍ଦିରରେ ଜଣେ ଜେଟିପି ଦୁର୍ବ୍ୟବହାର କରିଛନ୍ତି। ଏପରି ବ୍ୟବହାରରେ କ୍ଷୋଭ ପ୍ରକାଶ କରି ଜଷ୍ଟିସ୍ ରମନ୍ନା ସେଠାରୁ ଫେରି କୋଣାର୍କ ଯାଇଥିଲେ। ଏହି ଘଟଣା ଜଣାପଡ଼ିବା ପରେ ଜିଲାପାଳ ବଲଓ୍ବନ୍ତ ସିଂ ଏବଂ ଏସ୍ପି ଉମାଶଙ୍କର ଦାଶ ଜଷ୍ଟିସ୍ ରମନ୍ନାଙ୍କୁ କୋଣାର୍କରେ ସାକ୍ଷାତ୍ କରି ବୁଝାଇଛନ୍ତି। ଶ୍ରୀମନ୍ଦିର ପ୍ରଥା ଓ ପରମ୍ପରାର କଥା କହି ତାଙ୍କୁ ମନେଇବାକୁ ଚେଷ୍ଟା କରିଥିବା ଜଣାପଡ଼ିଛି।
ଶନିବାର ସକାଳେ ଜଷ୍ଟିସ୍ ରମନ୍ନା ସିଂହଦ୍ୱାରରେ ପହଞ୍ଚତ୍ଥିଲେ। ମନ୍ଦିର ପ୍ରଶାସନ ଓ ଜିଲା ପ୍ରଶାସନିକ ଅଧିକାରୀ ତାଙ୍କୁ ସ୍ବାଗତ କରିବା ସହ ଶ୍ରୀମନ୍ଦିର ଭିତରକୁ ପାଛୋଟି ନେଇଥିଲେ। ମହାପ୍ରଭୁଙ୍କୁ ଦର୍ଶନ କରିବା ପରେ ସେ ବେଢ଼ା ପରିସର ଓ ଅନ୍ୟାନ୍ୟ ମନ୍ଦିର ବୁଲି ଦେଖିଥିଲେ। ରୋଷଘର ନିକଟକୁ ଯାଉଥିବାବେଳେ ସେଠାରେ ତାଙ୍କୁ ଜଣେ ଜେଟିପି ଅଟକାଇଥିଲେ। ରୋଷଘର ଭିତରକୁ ଯାଇପାରିବେ ନାହିଁ ବୋଲି ବଡ଼ ପାଟି କରି କହିଥିଲେ। ଶ୍ରୀମନ୍ଦିର ଓ ଜିଲା ପ୍ରଶାସନର କେତେଜଣ ଅଧିକାରୀ ସାଥିରେ ଥିଲେ ମଧ୍ୟ ସମ୍ପୃକ୍ତ ଜେଟିପିଙ୍କ ଏଭଳି ବ୍ୟବହାର ଜଷ୍ଟିସ୍ ରମନ୍ନାଙ୍କୁ ଠିକ୍ ଲାଗି ନ ଥିଲା। ସେ ସାଙ୍ଗରେ ଥିବା ଅଧିକାରୀମାନଙ୍କ ନିକଟରେ ଅସନ୍ତୋଷ ପ୍ରକାଶ କରି ସେହିଠାରୁ ଫେରିଯାଇଥିଲେ। ସୁପ୍ରିମ୍କୋର୍ଟରେ ଶ୍ରୀମନ୍ଦିର ସଂସ୍କାର ମାମଲା ବିଚାରାଧୀନ ରହିଛି। ଶ୍ରଦ୍ଧାଳୁମାନେ କିପରି ଶୃଙ୍ଖଳିତ ଭାବେ ଦର୍ଶନ କରି ଫେରିବେ ସେନେଇ ସୁପ୍ରିମକୋର୍ଟ ତାଙ୍କ ଅନ୍ତରୀଣ ରାୟ ଦେଇଛନ୍ତି। ଏଭଳି ସମୟରେ ଉପରୋକ୍ତ ଘଟଣା ଶ୍ରୀମନ୍ଦିର ସଂସ୍କାର ମାମଲା ଉପରେ ପ୍ରତିକୂଳ ପ୍ରଭାବ ପକାଇପାରେ ବୋଲି ଚର୍ଚ୍ଚା ହେଉଛି।
