ଭୁବନେଶ୍ୱର,୨୦ା୬(ବ୍ୟୁରୋ): ରାଜ୍ୟରେ କରୋନା ଲାଗି ବିପର୍ଯ୍ୟସ୍ତ ହୋଇପଡ଼ିଥିବା ଅର୍ଥ ବ୍ୟବସ୍ଥା ସୁଧୁରୁଛି। ବିଶେଷ କରି ଗ୍ରାମୀଣ ଅର୍ଥନୀତି ସ୍ବାଭାବିକ ହେବାରେ ଲାଗିଛି, ଯାହା ଓଡ଼ିଶା ପାଇଁ ଶୁଭସଙ୍କେତ ବୋଲି ଶିଳ୍ପମନ୍ତ୍ରୀ ଦିବ୍ୟଶଙ୍କର ମିଶ୍ର କହିଛନ୍ତି। ଏମ୍ଏସ୍ଏମ୍ଇ, ଅର୍ଥ ବିଭାଗ ଓ ଭାରତୀୟ ଚାମ୍ବର୍ସ ଅଫ୍ କମର୍ସର ମିଳିତ ଆନୁକୂଲ୍ୟରେ ଆୟୋଜିତ ଓ୍ବେବ୍ କନ୍ଫରେନ୍ସରେ ଯୋଗଦେଇ ମନ୍ତ୍ରୀ କହିଲେ ଯେ, ଲୋକଙ୍କ ମଧ୍ୟରେ ଆର୍ଥିକ କାରବାର ବଢ଼ିଲେ ଅର୍ଥନୀତି ସୁଦୃଢ଼ ହେବ। ଲୋକେ ଚାହିଦା ସୃଷ୍ଟି ପାଇଁ ଅର୍ଥ ବିନିଯୋଗ କରିବା ଆବଶ୍ୟକ। ଏହାଦ୍ୱାରା ଅର୍ଥ ବ୍ୟବସ୍ଥା ପୂର୍ବସ୍ଥିତିକୁ ଫେରିପାରିବ। ଅର୍ଥ ବିଭାଗ ପ୍ରମୁଖ ସଚିବ ଅଶୋକ ମୀନା କହିଲେ, ଚଳିତବର୍ଷ ୯୦ହଜାର କୋଟି ମଧ୍ୟରୁ ଏମ୍ଏସ୍ଏମ୍ଇ କ୍ଷେତ୍ର ଲାଗି ୩୮ ହଜାର କୋଟି ଟଙ୍କା ପ୍ରାବଧାନ କରାଯାଇଛି। ଅର୍ଥ ସଦ୍ବିନିଯୋଗ ଲାଗି ଏକ ଆନ୍ତଃ ମନ୍ତ୍ରୀସ୍ତରୀୟ କମିଟି ଗଠିତ ହୋଇଛି। ରୁଗ୍ଣ ଏମ୍ଏସ୍ଏମ୍ଇ ସେକ୍ଟରକୁ ସହାୟତା ଯୋଗାଇ ଦେବାକୁ ଯୋଜନା ପ୍ରସ୍ତୁତ କରାଯାଉଥିବା ସେ ସୂଚନା ଦେଇଛନ୍ତି। ଇଣ୍ଡିଆ ଚାମ୍ବର୍ସ ଅଫ୍ କମର୍ସର ସଭ୍ୟ ମାତୃଦତ୍ତ ମିଶ୍ର ବର୍ତ୍ତମାନସ୍ଥିତିରେ ଅର୍ଥ ନେଣଦେଣ ବ୍ୟବସ୍ଥାର ଆବଶ୍ୟକତା, ନିଶ୍ଚିତ ଋଣ ଯୋଜନାରେ ଆବେଦନ ତାରିଖ ହଁି ମୋଟ ଋଣ ଅର୍ଥର ୩୦ରୁ ୪୦% ପ୍ରଦାନ କରିବା ଉପରେ ଗୁରୁତ୍ୱାରୋପ କରିଥିଲେ। ଏହି ଅବସରରେ ଏମ୍ଏସ୍ଏମ୍ଇ ପାଇଁ ରହିଥିବା କେତେକ ସ୍କିମ୍ ଉପରେ ଆଲୋକପାତ କରାଯାଇଥିଲା। ଭାରତୀୟ ଚାମ୍ବର୍ସ ଅଫ୍ କମର୍ସର ଓଡ଼ିଶା ବିତ୍ତ ଓ ଟିକସ କମିଟି ଆବାହକ ରାଜୀବ ଶେଖର ସାହୁ କାର୍ଯ୍ୟକ୍ରମ ପରିଚାଳନା କରିଥିଲେ।
