ନୂଆଦିଲ୍ଲୀ, ୧୧।୬(ପି.ଟି.)- କୋଭିଡ-୧୯ ସଂକ୍ରମଣ କାରଣରୁ ଅନ୍ତର୍ଜାତୀୟ ବ୍ୟାଡ୍ମିଣ୍ଟନ କ୍ୟାଲେଣ୍ଡର ପ୍ରଭାବିତ ହେବାରେ ଲାଗିଛି। ବିକଳ୍ପ ସମୟ ନ ପାଇବା କାରଣରୁ ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ) ଚଳିତ ବର୍ଷର ସୁଇସ୍ ଓପନ ଏବଂ ୟୁରୋପିଆନ ଚାମ୍ପିୟନଶିପ୍କୁ ବାତିଲ କରିଛି। ପୂର୍ବରୁ ଉଭୟ ପ୍ରତିଯୋଗିତାକୁ ସ୍ଥଗିତ ରଖା ଯାଇଥିଲା। ସୁହାଇଲାଭଳି ବିକଳ୍ପ ସମୟ ମିଳିଲେ ଏହା ହେବ ବୋଲି ବିଡବ୍ଲ୍ୟୁଏଫ ପକ୍ଷରୁ କୁହା ଯାଇଥିଲା। ଏଚଏସବିସି ବିଡବ୍ଲ୍ୟୁଏଫ ଓ୍ବାଲର୍ଡ ଟୁର୍ର ଏକ ସୁପର ୩୦୦ ଇଭେଣ୍ଟ ସୁଇସ୍ ଓପନ ୨୦୨୦ ମାର୍ଚ୍ଚ ୧୭ରୁ ୨୨ ପର୍ଯ୍ୟନ୍ତ ହେବାର ଥିଲା। ମାତ୍ର କରୋନା ଭାଇରସ ସଂକ୍ରମଣ ଯୋଗୁ ଏହାକୁ ସ୍ଥଗିତ ରଖା ଯାଇଥିଲା। ସୁଇସ୍ ବ୍ୟାଡ୍ମିଣ୍ଟନ ଏବଂ ଆୟୋଜକଙ୍କ ସହ ବିଡବ୍ଲ୍ୟୁଏଫ କ୍ରମାଗତ ଯୋଗାଯୋଗରେ ରହି ଆସିଥିଲା। ମାତ୍ର ଏହି ପ୍ରତିଯୋଗିତା ଆଉ ଆୟୋଜନ ସମ୍ଭବ ନୁହେଁ ବୋଲି ସ୍ପଷ୍ଟ ହୋଇଥିଲା। ୨୦୧୯ ସୁଇସ୍ ଓପନରେ ଭାରତର ବି. ପ୍ରଣୀଥ ରନର୍ସଅପ୍ ହୋଇଥିଲେ। ପୁରୁଷ ସିଙ୍ଗଲ୍ସ ଫାଇନାଲରେ ସେ ଚାଇନାର ଶି ୟୁକିଙ୍କଠାରୁ ହାରିଥିଲେ। ସେହିପରି ୟୁରୋପିଆନ ଚାମ୍ପିୟନଶିପ୍ ଏପ୍ରିଲ ୨୧ରୁ ୨୬ ପର୍ଯ୍ୟନ୍ତ ହେବାର ଥିଲା। ସେତେବେଳେ ତାହାକୁ ସ୍ଥଗିତ ରଖା ଯାଇଥିବାବେଳେ ଏବେ ତାହା ବାତିଲ ହୋଇଛି।
