ଦାରିଙ୍ଗବାଡି, ୧୭ ।୩ (ଅରୁଣ ସାହୁ ): ବିଶ୍ୱାସ ଅନେକ ଦୁଃଖକୁ ଦୂର କରିବା ନଜିର ରହିଛି। ରୋଗ ବ୍ୟାଧି ହେଉ କି ହାଡଫୁଟି, ବସନ୍ତ ଭଳି ଭୁତାଣୁ ଜନିତ ରୋଗ ପାଇଁ ବିଜ୍ଞାନ ଯୁଗରେ ଅନେକ ପ୍ରକାର ପ୍ରତିଷେଧକ ଟିକାକରଣ ଦ୍ୱାରା ରୋଗ ଭଲ ହେଉଛି । ଅନେକ ସମୟରେ ଏହି ରୋଗ ଶରୀରକୁ ଗ୍ରାସ କରିପାରୁନାହିଁ କିନ୍ତୁ ଏହି ବିଜ୍ଞାନ ଯୁଗରେ ମଧ୍ୟ ସେହି ପାରମ୍ପରିକ ରୀତିନୀତି ଅନୁସାରେ ଏହି ଭୁତାଣୁ ଜନିତ ରୋଗ ନଆସିବା ପାଇଁ ପୂଜାର୍ଚ୍ଚନା କରାଯାଉଥିବା ଦେଖିବାକୁ ମିଳୁଛି। କାନ୍ଧମାଳ ଜିଲା ଦାରିଙ୍ଗବାଡି ବ୍ଲକ ସିମନବାଡି ଅଞ୍ଚଳରେ କାହିଁ କେଉଁ ପୁରାତନ ଅମଳରୁ ରହି ଆସିଥିବା ଏହି ପରମ୍ପରାକୁ ଏବେ ମଧ୍ୟ ଗ୍ରାମବାସୀ ପାଳନ କରିଆସୁଛନ୍ତି । ପ୍ରତେକ ବର୍ଷ ଏହି ମାସର ଯେ କୌଣସି ମଙ୍ଗଳବାର ଦିନ ଏହି ପୂଜା କରାଯାଏ। ଗାଁର ଗୁଣିଆ ପୂଜାରୀଙ୍କ ଦ୍ୱାରା ଘଟ ଧରି ଘରଘର ବୁଲି ମା’ପାଟ୍ଟାଖଣ୍ଡା, ଗ୍ରାମଦେବତାଙ୍କୁ ସ୍ମରଣ କରି ଘଟକୁ ଘରର ଛପରକୁ ଛୁଆଁଇ କିଭଳି ଭୁତାଣୁ ଆସିବ ନାହିଁ , ସେନେଇ ମା’ଙ୍କୁ ପ୍ରାର୍ଥନା କରାଯିବା ସହ ଖରାପ ଶକ୍ତିକୁ ଗାଁରୁ ବାହାର କରାଯିବା ପାଇଁ ପଣା ହାଣ୍ଡି, କୁକୁଡ଼ା, ଛେଳି ଆଦିକୁ ଗାଁଠାରୁ ଦୂର ଘଞ୍ଚ ଜଙ୍ଗଲରେ ପୂଜାର୍ଚ୍ଚନା କରାଯାଇଥାଏ । ପରେ ଗାଁ ଲୋକ ଏକାଠି ହୋଇ ପ୍ରସାଦ ସେବନ କରି ଗୁଣିଆଙ୍କ ଦ୍ୱାରା ପବିତ୍ର ପୂଜା କରାଯାଇଥିବା ପାଣି ଛିଞ୍ଚନ ପରେ ଘରକୁ ଫେରୁଥିବା ନଜିର ରହିଛି। ବିଶ୍ୱାସ ରହିଛି ଏଭଳି ବଲାଣି ପୂଜା କରାଯିବା ଦ୍ୱାରା ଗାଁକୁ ଭୁତାଣୁ ଜନିତ କୌଣସି ରୋଗ ଆସି ନ ଥାଏ । ସିମନବାଡିରେ ଏହି ବଲାଣି ପୂଜା ପାଇଁ ସ୍ଥାନୀୟ ସମିତିସଭ୍ୟ ସାଧୁ ନାୟକଙ୍କ ନେତୃତ୍ୱରେ ରମା ଦେହୁରୀ, ଚିତ୍ତ ରଞ୍ଜନ ନାୟକ,ନାଥ ମାଝୀ, ପୂର୍ଣ୍ଣ ଚନ୍ଦ୍ର ବିନ୍ଧାଣିଙ୍କ ସମେତ ବହୁ ଶ୍ରଦ୍ଧାଳୁ ଏହି କାର୍ଯ୍ୟକ୍ରମକୁ ପରିଚାଳନା କରୁଛନ୍ତି ।
