ଭୋପାଳ, ୨୯।୧୨: ସଂଶୋଧିତ ନାଗରିକତ୍ୱ ଆଇନ (ସିଏଏ) ଓ ଜାତୀୟ ନାଗରିକ ପଞ୍ଜୀକରଣ (ଏନ୍ଆରସି)କୁ ବହୁଜନ ସମାଜ ପାର୍ଟି (ବିଏସ୍ପି) ଦୃଢ଼ ବିରୋଧ କରୁଛି। କିନ୍ତୁ ମଧ୍ୟପ୍ରଦେଶର ଜଣେ ବିଏସ୍ପି ବିଧାୟିକା ଏହି ଆଇନକୁ ସମର୍ଥନ କରିବାରୁ ତାଙ୍କୁ ଦଳରୁ ନିଲମ୍ବନ କରାଯାଇଛି। ଏ ନେଇ ଟୁଇଟ୍ କରି ସୂଚନା ଦେଇଛନ୍ତି ଦଳର ସୁପ୍ରିମୋ ମାୟାବତୀ। ସେ କହିଛନ୍ତି, ବିଏସ୍ପି ଏକ ଅନୁଶାସିତ ଦଳ। ଦଳର ନିୟକକାନୁନ ଭାଙ୍ଗିବାକୁ ଚେଷ୍ଟା କରୁଥିବା ଏମ୍ପି/ବିଧାୟକଙ୍କ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଏ। ଏହି କ୍ରମରେ ସିଏଏକୁ ସମର୍ଥନ ଦେଇଥିବା ମଧ୍ୟପ୍ରଦେଶର ପଥେରିଆ ନିର୍ବାଚନମଣ୍ଡଳୀ ବିଧାୟିକା ରମାବାଈ ପରିହାରଙ୍କୁ ଦଳରୁ ନିଲମ୍ବନ କରାଯାଉଛି ବୋଲି ମାୟାବତୀ କହିଛନ୍ତି। ସୂଚନାଯୋଗ୍ୟ, କେନ୍ଦ୍ରର ସିଏଏକୁ ବିରୋଧ କରୁଛି ବିଏସ୍ପି। ସଂସଦରେ ମଧ୍ୟ ବିଏସ୍ପି ସିଏଏ ବିରୋଧରେ ଭୋଟ ଦେଇଥିଲା। ନାଗରିକତ୍ୱ ସଂଶୋଧନକୁ ରାଷ୍ଟ୍ରପତି ରାମନାଥ କୋବିନ୍ଦ ମଞ୍ଜୁରୀ ଦେବା ପରେ ସମ୍ପୃକ୍ତା ବିଧାୟିକା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହାଙ୍କୁ ଧନ୍ୟବାଦ ଦେଇଥିଲେ। ଏହି ଆଇନ ବହୁ ପୂର୍ବରୁ ହେବାର ଥିଲା, କିନ୍ତୁ ନିୟମ ଲାଗୁ କରିବା ପାଇଁ ପୂର୍ବରୁ କେହି ସକ୍ଷମ ହୋଇ ନ ଥିଲେ ବୋଲି ସେ କହିଥିଲେ।
