ଥିରୁଭାନନ୍ତପୁରମ୍,୨ା୧: ସିଏଏକୁ ବିରୋଧ ସହ ଏହାକୁ ପ୍ରତ୍ୟାହାର କରିବା ଲାଗି କେରଳ ସରକାର ବିଧାନସଭାରେ ଏକ ପ୍ରସ୍ତାବ ଗୃହୀତ କରିବା ପରେ ଭାଜପା ପକ୍ଷରୁ ଏଭଳି ପ୍ରକ୍ରିୟାକୁ ତୀବ୍ର ସମାଲୋଚନା କରାଯାଇଛି। ମଙ୍ଗଳବାର କେନ୍ଦ୍ର ଆଇନମନ୍ତ୍ରୀ ରବିଶଙ୍କର ପ୍ରସାଦ ପାର୍ଲାମେଣ୍ଟରେ ଗୃହୀତ ଆଇନକୁ କାର୍ଯ୍ୟକାରୀ କରିବା ରାଜ୍ୟଗୁଡ଼ିକର ସାମ୍ବିଧାନିକ କର୍ତ୍ତବ୍ୟ ବୋଲି କହିଥିଲେ। ତେବେ ବୁଧବାର ଏହାକୁ କେରଳ ମୁଖ୍ୟମନ୍ତ୍ରୀ ପିନାରାୟୀ ବିଜୟନ୍ ଗ୍ରହଣ କରାଯିବ ନାହିଁ ବୋଲି କହିଛନ୍ତି। ରାଜ୍ୟ ବିଧାନସଭାର ନିଜସ୍ବ ବିଶେଷାଧିକାର ରହିଛି ଓ ଏହାକୁ ବିରୋଧ କରାଯିବା ଠିକ୍ ନୁହେଁ ବୋଲି ସେ ମତ ଦେଇଛନ୍ତି। ଲୋକଙ୍କ ମୌଳିକ ଅଧିକାର କ୍ଷୁଣ୍ଣ ହେଉଥିବା ବିଜୟନ ଦର୍ଶାଇଛନ୍ତି। ଭାଜପା ରାଜ୍ୟ ସଭା ଏମ୍ପି ଜି.ଭି.ଏଲ୍. ନରସିଂହ ରାଓ ଗୃହର ଅଧ୍ୟକ୍ଷ ଏମ୍. ଭେଙ୍କାୟା ନାଇଡୁଙ୍କୁ ପତ୍ର ଲେଖି ସଂସଦୀୟ ସ୍ବାଧିକାର ଭଙ୍ଗ କରାଯାଉଥିବା ଉଲ୍ଲେଖ କରିଛନ୍ତି। କେରଳ ମୁଖ୍ୟମନ୍ତ୍ରୀ ବିଜୟନ୍ଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଲାଗି ସେ ଦାବି କରିଛନ୍ତି। ଭାଜପା ନେତା ମୁଖ୍ତାର ଆବାସ ନକ୍ଭି କେରଳ ବିଧାନସଭାରେ ଏହି ବିଲ ପାସ୍ହୋଇ ପାର୍ଲାମେଣ୍ଟ ଓ ସମ୍ବିଧାନକୁ ଅପମାନିତ କରାଯାଇଛି ବୋଲି ପ୍ରକାଶ କରିଛନ୍ତି। ସମ୍ବିଧାନରେ ସ୍ପଷ୍ଟ ଭାବେ ପାର୍ଲାମେଣ୍ଟ ଓ ରାଜ୍ୟ ବିଧାନସଭାର ଭୂମିକା ସମ୍ପର୍କରେ ଉଲ୍ଲେଖ ଅଛି। ଏଭଳି ଦାୟିତ୍ୱହୀନ କାର୍ଯ୍ୟ ଦ୍ୱାରା ସାମ୍ବିଧାନିକ ପଦମର୍ଯ୍ୟାଦା ନଷ୍ଟହୋଇଛି ବୋଲି ସେ କହିଛନ୍ତି। ପ୍ରକାଶଥାଉ କି, ପଶ୍ଚିମବଙ୍ଗରେ ସିଏଏ ଓ ଏନ୍ଆର୍ସି କଦାପି ଲାଗୁ କରାଯିବ ନାହିଁ ବୋଲି ମୁଖ୍ୟମନ୍ତ୍ରୀ ମମତା ବାନାର୍ଜୀ ଘୋଷଣା କରିସାରିଛନ୍ତି।
