ବଇଣ୍ଡା,୧୬।୬(ଡି.ଏନ.ଏ.)-ଆଧୁନିକ ଯୁଗରେ ପୁରାତନ ସଂସ୍କୃତି ଲୋପ ପାଇବାରେ ଲାଗିଛି। ହେଲେ କେତେକ କବିଙ୍କ ଯୋଗୁ ସାହିତ୍ୟ ବଞ୍ଚି ରହିଛି। ଓଡ଼ିଆ ଭାଷାକୁ ସାରା ଦେଶରେ ପରିଚିତ କରିବା ପାଇଁ କବିମାନେ ବହୁ ପରିଶ୍ରମ କରିଆସୁଛନ୍ତି। ତେଣୁ ସମସ୍ତେ ଏଥିପ୍ରତି ଗୁରୁତ୍ୱ ଦେଇ ସାହିତ୍ୟ ପ୍ରତି ସମସ୍ତଙ୍କ ରୁଚି ରହିବା ଆବଶ୍ୟକ ବୋଲି ଶନିବାର କିଶୋରନଗର ବ୍ଲକ ବଣିନାଳୀ ବିଶ୍ୱ ଯୁବକେନ୍ଦ୍ର ପରିସରଠାରେ ତ୍ରିଧାରା ସାହିତ୍ୟ ସଂସଦ ଓ ବିଶ୍ୱ ଯୁବ କେନ୍ଦ୍ର ପକ୍ଷରୁ ଆୟୋଜିତ ତ୍ରିଧାରା ସାହିତ୍ୟ ସଂସଦର ଶିଶୁ ପତ୍ରିକା ‘ତୁଳସୀ’ ପୁସ୍ତକର ଉନ୍ମୋଚିତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ ଯୋଗଦେଇ ଏହା କହିଛନ୍ତି। ବିଶ୍ୱ ଯୁବକେନ୍ଦ୍ର ସଭାପତି ଡ. ନନ୍ଦକିଶୋର ମହାକୁଡ଼ଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ଅନ୍ୟତମ ଅତିଥି ଭାବେ କିଶୋରନଗର ବ୍ଲକ ଅଧ୍ୟକ୍ଷା ବବିତା ପ୍ରଧାନ, ତ୍ରିଧାରା ସାହିତ୍ୟ ସଂସଦର ସଭାପତି ଶିବତ୍ସ ପ୍ରଧାନ, ବଇଣ୍ଡା ଛକ ବିକାଶ ପରିଷଦର ସମ୍ପାଦକ ଜିତେନ୍ଦ୍ର ବେହେରା, ପ୍ରଦୀପ ଘିଓ୍ବାଲା, ତ୍ରିଧାରା ସାହିତ୍ୟ ସଂସଦର କୋଷାଧ୍ୟକ୍ଷ ସୁଜିତ୍ ରଣା, ବିଶ୍ୱ ଯୁବକେନ୍ଦ୍ରର ସହସମ୍ପାଦକ ରଜନୀକାନ୍ତ ଦେହୁରି, ଘନଶ୍ୟାମ ସାହୁ ପ୍ରମୁଖ ଯୋଗ ଦେଇଥିଲେ। ବିଶ୍ୱ ଯୁବକେନ୍ଦ୍ରର ନିର୍ଦ୍ଦେଶକ ମନୋଜ କୁମାର ମହାପାତ୍ର ସ୍ବାଗତ ଭାଷଣ ଦେଇଥିବାବେଳେ ସଂସଦର ସମ୍ପାଦକ ଚନ୍ଦ୍ର ମିଶ୍ର ଧନ୍ୟବାଦ ଦେଇଥିଲେ। ଏହି ଅବସରରେ ବଇଣ୍ଡା ଅଞ୍ଚଳର ୧୦ ଦଫା ସମ୍ବଳିତ ଏକ ଦାବିପତ୍ର ବିଶ୍ୱ ଯୁବକେନ୍ଦ୍ରର ସମ୍ପାଦିକା ନମିତା ପ୍ରଧାନ ବିଧାୟକ ସାଏଙ୍କୁ ପ୍ରଦାନ କରିଥିଲେ। ଏଥିରେ ବଣିନାଳୀ, ଲୁହାମୁଣ୍ଡା ସଂର୍କୀତ୍ତନ ମଣ୍ଡଳୀ ସହ ବୁଦ୍ଧିଜୀବୀ, ମାନ୍ୟଗଣ ବ୍ୟକ୍ତି ଯୋଗ ଦେଇଥିଲେ।
