ଜଶପୁର,୨୭।୭: ଛତିଶଗଡ଼ର ଜଶପୁର ଜିଲାର ଏକ ପ୍ରାଥମିକ ସ୍କୁଲରେ ସାପ କାମୁଡ଼ିବାରୁ ୨ଛାତ୍ରଙ୍କ ମୃତ୍ୟୁ ହୋଇଛି। ଏହି ଘଟଣା ପରେ ୨ଜଣ ଶିକ୍ଷକଙ୍କୁ ନିଲମ୍ବିତ କରାଯାଇଛି। ସୂଚନାଯୋଗ୍ୟ, ଜଶପୁର ଜିଲା ବଗିଚା ତହସିଲର ଟଟକେଲା ଗାଁରେ ଶାସକୀୟ ପ୍ରାଥମିକ ବିଦ୍ୟାଳୟରେ ତୃତୀୟ ଶ୍ରେଣୀରେ ପଢ଼ୁଥିବା ୨ଜଣ ଛାତ୍ରୀ ପାୟଲ(୧୦) ଓ ପାର୍ବତୀ(୧୦)ଙ୍କୁ ଶୁକ୍ରବାର ଏକ ବିଷଧର ସାପ କାମୁଡ଼ିଦେଇଥିଲା। ଏନେଇ ଶିକ୍ଷକଙ୍କୁ ଜଣାପଡ଼ିବା ପରେ ଦୁଇ ଛାତ୍ରୀଙ୍କୁ ସେ ନିକଟସ୍ଥ ହସ୍ପିଟାଲକୁ ନେଇଥିଲେ। ବଗିଚା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ଅବସ୍ଥାରେ ପାୟଲଙ୍କ ମୃତ୍ୟୁ ହୋଇଥିବା ବେଳେ ପାର୍ବତୀଙ୍କୁ ଚିକିତ୍ସା ପାଇଁ ଅମ୍ବିକାପୁର ନିଆଯାଇଥିଲା। ହେଲେ ବାଟରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା। ତେବେ ଶିକ୍ଷକଙ୍କ ଅବହେଳାରୁ ଏହି ଦୁର୍ଘଟଣା ଘଟିଥିବା ଦର୍ଶାଇ ବଗିଚା ଜିଲା ଶିକ୍ଷାଅଧିକାରୀ ସେମାନଙ୍କୁ କାର୍ଯ୍ୟରୁ ନିଲମ୍ବିତ କରିଛନ୍ତି। ଅପରପକ୍ଷରେ ଏନେଇ ପୋଲିସ ମାମଲା ରୁଜୁ କରି ତଦନ୍ତ ଚଳାଇଛି।
