ଢେଙ୍କାନାଳ ଅଫିସ, ୧୪।୯ – ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ ରଥିଆପାଳ ଗ୍ରାମ ନିକଟରେ ପ୍ରବାହିତ ସାପୁଆ ନଦୀରେ ବିଜୁ ସେତୁ ଯୋଜନାରେ ଖୁବ୍ ଶୀଘ୍ର ବ୍ରିଜ୍ ନିର୍ମାଣ କରାଯିବ। ଏଥିଲାଗି ୫କୋଟି ଟଙ୍କା ବ୍ୟୟ ଅଟକଳ ହୋଇଥିବାବେଳେ ଗ୍ରାମ୍ୟ ନିର୍ମାଣ ବିଭାଜନକୁ ଏହାର ଦାୟିତ୍ୱ ଦିଆଯାଇଛି। ଏହି ନଦୀରେ ବ୍ରିଜ୍ ନିର୍ମାଣ କରିବାକୁ ରାଜ୍ୟ ସରକାର ଯୋଜନା କରିଥିଲେ। ଏଥିପାଇଁ ୫ କୋଟି ଟଙ୍କା ବ୍ୟୟ ଅଟକଳ ରହିଥିଲା। ପ୍ରଥମ ପର୍ଯ୍ୟାୟରେ ୨ କୋଟି ଟଙ୍କା ମଞ୍ଜୁର କରାଯାଇଥିଲା। ହେଲେ ନିର୍ବାଚନ ଆସିଯିବାରୁ କାମ ତ୍ୱରାନ୍ବିତ ହୋଇପାରି ନ ଥିଲା। ବର୍ଷାଦିନ ସରିବା ପରେ ଏହି କାମ ଯୁଦ୍ଧକାଳୀନ ଭିତ୍ତିରେ ଆରମ୍ଭ ହେବ ବୋଲି କହିଛନ୍ତି ବିଧାୟିକା ସୀମାରାଣୀ ନାୟକ।
ଓଡ଼ାପଡ଼ା ବ୍ଲକର ପାଖାପାଖି ୧୦ଖଣ୍ଡ ଗ୍ରାମର ଦୁଃଖ ପାଲଟିଛି ସାପୁଆ ନଦୀ। ବର୍ଷାଦିନ ଆସିଲେ ଜରିପାଳ, ରଥିଆପାଳ ଏବଂ ନଦୀ ଅପରପାର୍ଶ୍ୱରେ ଅବସ୍ଥିତ ସାନନଡ଼ବ, ବଡ଼ନଡ଼ବ, ଗୋବିନ୍ଦପ୍ରସାଦ ଅଞ୍ଚଳର ଲୋକେ ନାହିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି। ଜରିପାଳ ଏବଂ ରଥିଆପାଳ ଅଞ୍ଚଳର ଛାତ୍ରୀଛାତ୍ରମାନେ ନଦୀ ଅପରପାର୍ଶ୍ୱରେ ଥିବା ରଥିଆପାଳ ୟୁପି ସ୍କୁଲ ଉପରେ ନିର୍ଭରଶୀଳ। ବର୍ଷାଦିନେ ଅଭିଭାବକମାନେ ପିଲାଙ୍କୁ କାନ୍ଧରେ ବସାଇ ଜୀବନକୁ ବାଜି ଲଗାଇ ସ୍କୁଲରେ ପହଞ୍ଚାଇଥାନ୍ତି। ଜରିପାଳ ଗ୍ରାମର ଗଣଶିକ୍ଷକ ବିନୋଦିନୀ ସାମଲ (୪୯) ଦୀର୍ଘ ୧୧ବର୍ଷ ହେଲା ବିପଦସଙ୍କୁଳ ଭାବେ ସାପୁଆ ନଦୀ ପାର ହୋଇ ରଥିଆପାଳ ସ୍କୁଲକୁ ଆସୁଛନ୍ତି। ଏହି ଘଟଣା ସୋସିଆଲ ମିଡ଼ିଆରେ ଭାଇରାଲ ହେବାପରେ ଏହାକୁ ନେଇ ଚିନ୍ତା ପ୍ରକଟ କରିଛି ପ୍ରଶାସନ। ଢେଙ୍କାନାଳ ସଦରଠାରୁ ମାତ୍ର ୧୫କିମି ଦୂରରେ ପ୍ରବାହିତ ସାପୁଆ ନଦୀ ଉପରେ ବ୍ରିଜ୍ ନିର୍ମାଣ କରିବାକୁ ଲୋକେ ଦୀର୍ଘଦିନ ହେଲା ଦାବି କରି ଆସୁଥିଲେ। ବିଧାୟିକାଙ୍କ ଆଶ୍ୱାସନା ପରେ ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି।
ଏ ନେଇ ଜିଲାପାଳ ଭୂମେଶ ଚନ୍ଦ୍ର ବେହେରା କୁହନ୍ତି, ଉକ୍ତ ଅଞ୍ଚଳର ଗମନାଗମନ ସୁବିଧା ପାଇଁ ଖୁବଶୀଘ୍ର ବିଜୁ ସେତୁ ନିର୍ମାଣ ପାଇଁ ପଦକ୍ଷେପ ନିଆଯାଉଛି। ଜିଲା ଶିକ୍ଷାଧିକାରୀ ସୁଧାନନ୍ଦ ପରିଡ଼ା କୁହନ୍ତି, ବିନୋଦିନୀଙ୍କ ସାହସିକତା ପାଇଁ ତାଙ୍କୁ ବ୍ଲକ ଶିକ୍ଷା ବିଭାଗ ପକ୍ଷରୁ ସମ୍ବର୍ଦ୍ଧିତ କରାଯାଇଛି।
