ବ୍ରହ୍ମପୁର ଅଫିସ,୨ା୧- ନୂତନ ବର୍ଷକୁ କିଛି ନିଆରା ଢଙ୍ଗରେ ସ୍ବାଗତ କରିଛନ୍ତି ବ୍ରହ୍ମପୁର ସବୁଜ ବାହିନୀ କର୍ମକର୍ତ୍ତା ।
ନୂତନ ବର୍ଷରୁ ଗୃହ ମଧ୍ୟରେ ଚାରା ତଥା ଅନ୍ତଃଗୃହ ଚାରା ରୋପଣ ଦିଗରେ ଜନସଚେତନତା ଆରମ୍ଭ କରିଛନ୍ତି। ପୂର୍ବରୁ ସବୁଜ ବାହିନୀ ତରଫରୁ ବିଭିନ୍ନ ସ୍ଥାନରେ ବାହ୍ୟ ଚାରାରୋପଣ ଉପରେ ସଚେତନତା ସହ ଏ ଦିଗରେ ବହୁ କାର୍ଯ୍ୟକ୍ରମ ହାତକୁ ନିଆଯାଇଛି ।
ଏବେ ଅନ୍ତଃଗୃହ ଚାରା ରୋପଣ ଓ ତା’ର ଆବଶ୍ୟକତା ଉପରେ ସଚେତନତା ସୃଷ୍ଟି କରିବାକୁ ସବୁଜ ବାହିନୀ ଅଣ୍ଟା ଭିଡିଛି। ଏନେଇ ନୂତନ ବର୍ଷ ଅବସରରେ ଏକ ସଚେତନତା ସାଇକେଲ ଯାତ୍ରା ଆୟୋଜିତ ହୋଇଥିଲା। ପୁରୁଣା ବସ୍ଷ୍ଟାଣ୍ଡରୁ ଏହି ସାଇକେଲ ଶୋଭାଯାତ୍ରା ବାହାରି ବିଭିନ୍ନ ଅଞ୍ଚଳ ପରିକ୍ରମା କରି ଗିରିଜା ଛକରେ ପହଞ୍ଚିଥିଲା ।
ଏଥିରେ ପ୍ରାୟ ୧୬ ଜଣ ସ୍ବେଚ୍ଛାସେବୀ, ସାମାଜିକ କର୍ମୀ, ସମାଜସେବୀ ସାମିଲ ହୋଇ ଅନ୍ତଃଗୃହ ଚାରାରୋପଣର ଅବଶ୍ୟକତା ଓ ଗୁରୁତ୍ୱ ଉପରେ ସଚେତନ କରିଥିଲେ। ଆଧୁନିକ ସମାଜରେ ବିଳାସପୂର୍ଣ୍ଣ ତଥା ଅତ୍ୟାଧୁନିକ ସାଜସଜ୍ଜା ଗୃହରେ ରହିବାକୁ ଅନେକ ପସନ୍ଦ କରୁଛନ୍ତି ା ଫଳରେ ଅନେକଙ୍କ ବାହ୍ୟ ଚାରାରୋପଣ ପାଇଁ ଇଚ୍ଛା ସତ୍ତ୍ୱେ ଏହା କରିପାରୁ ନାହାନ୍ତି। ତେଣୁ ଇଚ୍ଛୁକ ଜନସାଧାରଣ ଗୃହ ଭିତରେ ଘିକୁଅଁାରୀ, ତୁଳସୀ ଓ ମନି ପ୍ଲାଣ୍ଟ ଭଳି ଅନ୍ତଃଗୃହ ଚାରା ରୋପଣ କରିପାରିବେ ବୋଲି ସଂଗଠନ ପକ୍ଷରୁ ସୂଚାଯାଇଥିଲା। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଶିଷ୍ଟ ଚକ୍ଷୁ ବିଶେଷଜ୍ଞ ଡ. ବି.ନାଗେଶ୍ୱର ରାଓ ସୁବୁଦ୍ଧି ଯୋଗଦେଇ ଶୋଭାଯାତ୍ରାକୁ ଉଦ୍ଘାଟନ କରିଥିଲେ। ସମ୍ମାନିତ ଅତିଥି ମଧୁମେହ ବିଶେଷଜ୍ଞ ଡା.ସୁନୀଲ କୋଟା ଏହାର ଆବଶ୍ୟକତା ଉପରେ ଆଲୋକପାତ କରିଥିଲେ। ଇକୋକ୍ଲବ ଜିଲା ସଂଯୋଜକ ଡ. ଶଙ୍କର ନାରାୟଣ ବେଜ ସ୍ବାଗତ ଭାଷଣ ଦେଇଥିଲେ ା ସବୁଜ ବାହିନୀ ସଭାପତି ଶିବରାମ ପାଣିଗ୍ରାହୀ, ସମ୍ପାଦକ ଏମ୍.ଦିଲୀପ କୁମାର, ଆଞ୍ଚଳିକ ବିକାଶ ପରିଷଦ ସଭାପତି ସାଗର କୁମାର ପାତ୍ର, ସମ୍ପାଦକ ବିଜେନ୍ଦ୍ର ମାଝି, ମାରୱାଡି ମହିଳା ସମ୍ପାଦିକା ରୁବି ଖେମାଣି, ମହାତ୍ମା ହେଲ୍ଫି ହ୍ୟାଣ୍ଡର ଏମ୍. ଭେଙ୍କଟ ରାମାଣା, ବନମାଳୀ ପ୍ରଧାନ, ଅରବିନ୍ଦ ଦେଶି ବେହେରା ଓ ଗୋପାଳ କୃଷ୍ଣ ମିଶ୍ର ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ ା
