ବେଙ୍ଗାଲୁରୁ, ୨୫।୭: ଦୁଇ ସପ୍ତାହ ଧରି କର୍ନାଟକରେ ଚାଲିଥିବା ରାଜନୀତିକ ନାଟକରେ ଯବନିକା ପଡ଼ିଛି। ମଙ୍ଗଳବାର ଆସ୍ଥା ଭୋଟ ହାରିବାରେ କୁମାରସ୍ବାମୀ ସରକାରଙ୍କ ଯଦିଓ ପତନ ଘଟିଛି। କିନ୍ତୁ ସମସ୍ତଙ୍କ ହୃଦୟ ଜିତିଛନ୍ତି କୁମାରସ୍ବାମୀ। ସରକାରକୁ ଆସିବା ପୂର୍ବରୁ ଲୋକଙ୍କୁ ଯାହା ପ୍ରତିଶୃତି ଦେଇଥିଲେ ତାହା ପାଳନ କରିଛନ୍ତି। ରାଜ୍ୟରେ ଗତ ଦୁଇ ସପ୍ତାହ ଧରି ଚାଲିଥିବା ରାଜନୈତିକ ଡ୍ରାମା ଭିତରେ ସେ ଜାଣିଥିଲେ ଯେ, ତାଙ୍କ ସରକାରର ପତନ ହେବାକୁ ଯାଉଛି। ତାହା ପୂର୍ବରୁ ସେ ଭୂମିହୀନ ଶ୍ରମିକ ଋଣ ସମ୍ପୂର୍ଣ୍ଣ ଛାଡ କରିଦେଇଛନ୍ତି। ଯେଉଁମାନଙ୍କର ଦୁଇ ହେକ୍ଟରରୁ କମ୍ ଜମି ଏବଂ ବର୍ଷରେ ଏକ ଲକ୍ଷରୁ କମ୍ ଆୟ ରହିଛି ସେମାନଙ୍କ ଋଣ ଛାଡ କରାଯାଇଛି। ସରକାର ଯିବାର କିଛି ଘଣ୍ଟା ପୂର୍ବରୁ ସେ ବିଭିନ୍ନ ଗୁରୁତ୍ୱପୂର୍ଣ୍ଣ କାଗଜପତ୍ରରେ ଦସ୍ତଖତ କରିଛନ୍ତି। ସୂଚନାଯୋଗ୍ୟ, ମଙ୍ଗଳବାର କର୍ନାଟକ ବିଧାନସଭାରେ ହୋଇଥିବା ଆସ୍ଥା ଭୋଟରେ ଜେଡିଏସ-କଂଗ୍ରେସ ମେଣ୍ଟକୁ ୯୯ ଓ ବିଜେପିକୁ ୧୦୫ ଜଣ ବିଧାୟକ ସମର୍ଥନ କରିଥିଲେ।
