ସପ୍ତଶଯ୍ୟା ଉତ୍ସବ ଉଦ୍ଘାଟିତ: ମମତାକୁ ପାଥେୟକରି ମା’ ମାଟିର ବିକାଶ କର
21 ଢେଙ୍କାନାଳ ଅଫିସ,୨୯ା୧୨ – ଢେଙ୍କାନାଳ ଜିଲା ସଦର ବ୍ଲକର ପ୍ରସିଦ୍ଧ ପର୍ଯ୍ୟଟନ କ୍ଷେତ୍ର ସପ୍ତଶଯ୍ୟା ଉଚ୍ଚ ବିଦ୍ୟାଳୟ ପରିସରରେ ଶୁକ୍ରବାର ସନ୍ଧ୍ୟାରେ ପ୍ରଥମ ସପ୍ତଶଯ୍ୟା ଉତ୍ସବ ଉଦ୍ଘାଟିତ ହୋଇଯାଇଛି। ମୁଖ୍ୟ ଅତିଥି ଭାବେ ଏମ୍ପି ମହେଶ ସାହୁ ଯୋଗଦେଇ ଏହାକୁ ଉଦ୍ଘାଟନ କରି କହିଲେ ଯେ, ଜନ୍ମ ମାଟିର ଆଦର, ମମତାକୁ ପାଥେୟ କରି ପ୍ରତ୍ୟେକ ନିଜନିଜ କ୍ଷେତ୍ରରେ ମା’ ମାଟିର ବିକାଶ କରିବା ଆବଶ୍ୟକ। ପ୍ରତ୍ୟେକ ଉତ୍ସବର ନାମକରଣ ସହିତ ଏହାକୁ ସମ୍ପୃକ୍ତ ସ୍ଥାନରେ ପାଳନ କଲେ ସେହି କ୍ଷେତ୍ରରେ ବିକାଶ ସହିତ ଅଞ୍ଚଳର ଲୁକ୍କାୟିତ ପ୍ରତିଭାଙ୍କୁ ଲୋକଲୋଚନକୁ ଅଣାଯାଇପାରିବ ବୋଲି ଏମ୍ପି କହିଥିଲେ। ମୁଖ୍ୟବକ୍ତା ଭାବେ ଯୋଗଦେଇ ଜିଲାପାଳ ଭୂମେଶଚନ୍ଦ୍ର ବେହେରା କହିଲେ ଯେ, ଜିଲାର ପର୍ଯ୍ୟଟନ କ୍ଷେତ୍ରର ବିକାଶ ସହିତ ପାରିପାର୍ଶ୍ୱିକ ଉନ୍ନତି ପାଇଁ ପ୍ରଶାସନ ସହିତ ଅଞ୍ଚଳବାସୀ ଆଗେଇ ଆସିଲେ କୌଣସି କାର୍ଯ୍ୟ ଅସମ୍ଭବ ହେବନାହିଁ। ସପ୍ତଶଯ୍ୟାଠାରେ ଥିବା ଡୋକ୍ରା ଶିଳ୍ପର ବିକାଶ ପାଇଁ ବହୁବିଧ କାର୍ଯ୍ୟ କରାଯାଉଥିବା ଜିଲାପାଳ ସୂଚନା ଦେଇଥିଲେ। ସପ୍ତଶଯ୍ୟା ଫାଉଣ୍ଡେଶନ ପକ୍ଷରୁ ଆୟୋଜିତ ଏହି ଉତ୍ସବରେ ଅନୁଷ୍ଠାନର ବରିଷ୍ଠ ସଦସ୍ୟ ଦୁଷ୍ୟନ୍ତ ଦାସ ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ। ଅନୁଷ୍ଠାନ ଅଧ୍ୟକ୍ଷା ଗାୟିତ୍ରୀ ରଥ ଡୋକ୍ରା ଶିଳ୍ପର ଆନ୍ତର୍ଜାତିକ ବଜାରରେ ଚାହିଦା ସୃଷ୍ଟି ପାଇଁ ଏହି ଅନୁଷ୍ଠାନ କାର୍ଯ୍ୟ କରୁଛି ବୋଲି ସୂଚନା ଦେବା ସହ ଦେଶ ବିଦେଶରୁ ଡିଜାଇନର ଆଣି ଏଠାକାର କାରିଗରମାନଙ୍କୁ ନୂତନ ଚାହିତା ମୁତାବକ ତାଲିମ ପ୍ରଦାନ ସହିତ ଜିଲାରେ ପ୍ରତିଷ୍ଠିତ ହସ୍ତଶିଳ୍ପର ବିକାଶ ପାଇଁ ଫାଉଣ୍ଡେଶନ କାର୍ଯ୍ୟ କରିବ ବୋଲି ପ୍ରକାଶ କରିଥିଲେ। ସପ୍ତଶଯ୍ୟା ଉତ୍ସବ ଏହାର ଏକ ସଂଯୋଗ ସେତୁ ବୋଲି ସେ କହିଥିଲେ। ସ୍ଥାନୀୟ ସରପଞ୍ଚ ଯେସସ ସାହୁ ଅତିଥି ଭାବେ ଯୋଗଦେଇ ଆଗାମୀ ଦିନରେ କାର୍ଯ୍ୟକ୍ରମକୁ ଅଧିକ କ୍ରିୟାଶୀଳ କରିବାକୁ ସମସ୍ତଙ୍କ ସହଯୋଗ କାମନା କରିଥିଲେ। ଅନ୍ୟମାନଙ୍କ ମଧ୍ୟରେ ସମିତି ସଭ୍ୟା ପୁଷ୍ପାଞ୍ଜଳି ବାଘ, ଗ୍ରାମ କମିଟି ସଭାପତି ନବକିଶୋର ସ୍ବାଇଁ, ସମ୍ପାଦକ ପଦ୍ମନାଭ ବାରିକ ପ୍ରମୁଖ ଅତିଥି ଭାବେ ଯୋଗଦେଇ ଉଦ୍ବୋଧନ ଦେଇଥିଲେ। ଜିଲା କଳା ସଂସ୍କୃତି ସଂଘର ଉପସଭାପତି ଅବନୀ ମିଶ୍ର କାର୍ଯ୍ୟକ୍ରମ ପରିଚାଳନା କରିଥିଲେ। ଫାଉଣ୍ଡେଶନ ମୁଖ୍ୟ ମନୋରମା ରଥ ଏବଂ କୁମାର ପ୍ରବୀଣ କାର୍ଯ୍ୟକ୍ରମରେ ଉପସ୍ଥିତ ଥିଲେ। ପ୍ରାରମ୍ଭରେ ସପ୍ତଶଯ୍ୟା ପଞ୍ଚାୟତ କାର୍ଯ୍ୟାଳୟଠାରୁ ବହୁ ସଂଖ୍ୟାରେ କାରିଗର ଓ ଗ୍ରାମବାସୀ ମଶାଲ ଶୋଭାଯାତ୍ରାରେ ନୃତ୍ୟ, ବାଦ୍ୟ ସହିତ ଉତ୍ସବସ୍ଥଳକୁ ଆସିଥିଲେ। ଏହି ଉତ୍ସବ ୩ଦିନ ଧରି ଅନୁଷ୍ଠିତ ହେଉଥିବା ବେଳେ ରବିବାର ଏହା ଉଦ୍ଯାପିତ ହେବ ବୋଲି ଆୟୋଜକଙ୍କ ସୂତ୍ରରୁ ଜଣାପଡିଛି ା