ନୂଆଦିଲ୍ଲୀ,୬-୭: ଦେଶ ମଧ୍ୟରେ ଷ୍ଟାର୍ଟଅପଗୁଡିକୁ ସରକାର ପ୍ରୋତ୍ସାହିତ କରିବେ ବୋଲି ବଜେଟରେ ଘୋଷଣା କରିଛନ୍ତି। ଏଥି ଲାଗି ବିଭିନ୍ନ ପ୍ରୋତ୍ସାହନ ଯୋଜନା ଗ୍ରହଣ କରାଯିବାର କାର୍ଯ୍ୟକ୍ରମ ରହିଛି। ଫଇସଲା ହୋଇ ନ ଥିବା ଆୟକର ମାମଲାର ସମାଧାନ କରିବାକୁ ସରକାର ପଦକ୍ଷେପ ନେବେ। କମ୍ପାନୀଗୁଡିକୁ ଉତ୍ସାହିତ କରିବା ଲାଗି ଏଭଳି ବିଭିନ୍ନ ପଦକ୍ଷେପ ଗ୍ରହଣ କରାଯିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଛନ୍ତି। ଷ୍ଟାର୍ଟଅପଗୁଡିକର ନିରନ୍ତର ଅଭିବୃଦ୍ଧି ଲାଗି ତୃଣମୂଳ ସ୍ତରରୁ ପଦକ୍ଷେପ ନେବା ଉପରେ ବଜେଟରେ ଗୁରୁତ୍ୱାରୋପ କରାଯାଇଛି। ଆଞ୍ଜେଲ ଟିକସ ସମାଧାନ ଲାଗି ଷ୍ଟାର୍ଟଅପ ଏବଂ ନିବେଶକଙ୍କ ଲାଗି କୋହଳ ବ୍ୟବସ୍ଥା କରାଯିବ ବୋଲି ଅର୍ଥମନ୍ତ୍ରୀ କହିଛନ୍ତି। ଆବଶ୍ୟକ ଘୋଷଣାପତ୍ର ଫାଇଲ କରୁଥିବା ଷ୍ଟାର୍ଟଅପ ନିବେଶକାରୀଙ୍କୁ ମୂୂଲ୍ୟାୟନ ଏବଂ ଶେୟାର ପ୍ରିମିୟମ ବାବଦରେ ଯାଞ୍ଚ କରାଯିବ ନାହିଁ।
ନିବେଶକଙ୍କ ପରିଚୟ ଏବଂ ପାଣ୍ଠି ସମ୍ପର୍କରେ ପରିଚୟ ଦେବା ବେଳେ ଇ-ଭେରିଫିକେଶନ ବ୍ୟବସ୍ଥା କରାଯିବ। ସେହିଭଳି ଷ୍ଟାର୍ଟ ଅପ୍ଗୁଡିକ ଉଠାଣ କରୁଥିବା ପାଣ୍ଠି ଉପରେ ଆୟକର ବିଭାଗ କୌଣସି ଯାଞ୍ଚ କରିବ ନାହିଁ। ଦୀର୍ଘ ଦିନ ଧରି ପଡିରହିଥିବା ଷ୍ଟାର୍ଟ ଅପ୍ଗୁଡିକର ଅଭିଯୋଗ ଏବଂ ଆସେସମେଣ୍ଟର ସମାଧାନ ଲାଗି କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ସ୍ବତନ୍ତ୍ର ପ୍ରଶାସନିକ ବ୍ୟବସ୍ଥା କରାଯିବାକୁ ବଜେଟରେ ପ୍ରସ୍ତାବ ରହିଛି। ସରକାରଙ୍କ ଷ୍ଟାର୍ଟ ଅପ୍ ଇଣ୍ଡିଆ, ଷ୍ଟାର୍ଟ ଅପ୍ କାର୍ଯ୍ୟକ୍ରମକୁ ପ୍ରୋତ୍ସାହିତ କରିବା ଲାଗି ସ୍ବତନ୍ତ୍ର ଟିଭି ଚ୍ୟାନେଲ ଭଳି ଅନ୍ୟ ପ୍ରସ୍ତାବ ଷ୍ଟାର୍ଟ ଅପ୍ଗୁଡିକ ଲାଗି ରହିଛି। ଏହା ଫଳରେ ଷ୍ଟାର୍ଟଅପ୍ ଗୁଡିକ ଲାଗି ଭିତ୍ତିଭୂମି ସୃଷ୍ଟି ଦିଗରେ ଏହା ସହାୟକ ହେବ। ଏହି ଚ୍ୟାନେଲରେ ଷ୍ଟାର୍ଟଅପ୍ ଗୁଡିକର ସମସ୍ୟା ସମ୍ପର୍କରେ ଆଲୋଚନା ହେବ। ନିବେଶ, ଅନୁଦାନ ଏବଂ କର କ୍ଷେତ୍ରରେ ଯୋଜନା ପ୍ରସ୍ତୁତ କରିବାକୁ ସୁବିଧା ହେବ।
