ପୁରୁଣା ଭୁବନେଶ୍ୱର, ୮ା୨(ଡି.ଏନ.ଏ.): ଶ୍ରୀଲିଙ୍ଗରାଜ ମହାପ୍ରଭୁଙ୍କ ମହାଶିବରାତ୍ରି ପାଳନ ଆସନ୍ତା ୨୧ ତାରିଖରେ ହେବ। ଏଥିପାଇଁ ମନ୍ଦିର ପ୍ରଶାସନ ପକ୍ଷରୁ ପ୍ରସ୍ତୁତି କାର୍ଯ୍ୟ ଆଗେଇ ଚାଲିଥିବା ବେଳେ ଶୁକ୍ରବାର ସ୍ଥାନୀୟ ସର୍କିଟ ହାଉସ ପରିସରରେ ଏକ ସମନ୍ବୟ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଖୋର୍ଦ୍ଧା ଜିଲାପାଳ ସିତାଂଶୁ ରାଉତ ଅଧ୍ୟକ୍ଷତା କରିଥିଲେ। ଶ୍ରୀଲିଙ୍ଗରାଜ ମନ୍ଦିର ଚତୁଃପାର୍ଶ୍ୱ ସୌନ୍ଦର୍ଯ୍ୟକରଣ ପାଇଁ ଚାଲୁଥିବା କାର୍ଯ୍ୟକୁ ବିଭାଗ ତଥା ଠିକାଦାରମାନେ ଆସନ୍ତା ୧୫ ତାରିଖ ସୁଦ୍ଧା ଶେଷ କରିବାକୁ ନିର୍ଦ୍ଦେଶ ଦିଆଯାଇଛି। ସେହିଭଳି ବିଭିନ୍ନ ବିଭାଗ ଦ୍ୱାରା ସମ୍ପାଦନ ହେବାକୁ ଥିବା କାର୍ଯ୍ୟ ଆସନ୍ତା ୧୬, ୧୭ ତାରିଖ ସୁଦ୍ଧା ସମ୍ପନ୍ନ କରିବାକୁ କୁହାଯାଇଛି। ଖରାକୁ ଲକ୍ଷ୍ୟ ରଖି ଶ୍ରଦ୍ଧାଳୁମାନଙ୍କୁ କପଡା ଛାମୁଣ୍ଡିଆ, ଆଲୋକୀକରଣ, ଏକ ଅସ୍ଥାୟୀ ଜୋତା ଷ୍ଟାଣ୍ଡ ନିର୍ମାଣ ପାଇଁ ସ୍ଥିର ହୋଇଥିଲା। ବଡୁ ନିଯୋଗ ଶ୍ରାବଣୀ ପ୍ରାପ୍ୟ ପାଇଁ ବୈଠକରେ ମତ ରଖିଥିଲା। ଏହିକ୍ରମରେ ଅନ୍ୟ ନିଯୋଗ ତଥା ସେବାୟତଙ୍କ ଆପତ୍ତି ଅଭିଯୋଗଗୁଡିକୁ ସ୍ବତନ୍ତ୍ର କମିଟିରେ ଆଲୋଚନା କରାଯାଇ ନିର୍ଯାସ ବାହାର କରାଯିବ ବୋଲି ଆଲୋଚନା ହୋଇଥିଲା। ଶ୍ରୀଲିଙ୍ଗରାଜ ମନ୍ଦିର ଟ୍ରଷ୍ଟ ବୋର୍ଡ ପକ୍ଷରୁ ସ୍ଥିରୀକୃତ ମହାଶିବରାତ୍ରି ସମୟ ସାରଣୀ ବୈଠକରେ ସମସ୍ତ ନିଯୋଗ, ସେବାୟତଙ୍କ ସହମତିକ୍ରମେ ମୋହର ଲାଗିଛି। ତଦନୁଯାୟୀ, ପ୍ରାତଃ ୩ଟାରୁ ସାଢେ ୩ଟା ମଧ୍ୟରେ ମଙ୍ଗଳ ଆଳତି ଅବକାଶ ଆରମ୍ଭ ହୋଇ ରାତି ୧୦ଟା ମହାଦୀପ ଦର୍ଶନ ପାଇଁ ସ୍ଥିର ହୋଇଥିଲା। ବୈଠକରେ ଏଡିଏମ୍ଙ୍କୁ ନେଇ ଏକ ସବ୍କମିଟି ଗଠନ କରାଯାଇ ସମସ୍ତ କାର୍ଯ୍ୟ ତଦାରଖ କରାଯିବ। ଜିଲାପାଳ ରାଉତ, ଏଡିଏମ୍ ପ୍ରଫୁଲ୍ଲ କୁମାର ସ୍ବାଇଁ, ଟ୍ରଷ୍ଟ ବୋର୍ଡ କାର୍ଯ୍ୟନିର୍ବାହୀ ଅଧିକାରୀ ପ୍ରସନ୍ନ କୁମାର ଦାଶ, ପ୍ରଦୀପ କୁମାର ସାହୁ, ସବ୍ କଲେକ୍ଟର ଦେବବ୍ରତ ସାହୁ, ବିଏମ୍ସିର ଅବନୀକାନ୍ତ ପଟ୍ଟନାୟକ, ନୂଆ ଟ୍ରଷ୍ଟ ବୋର୍ଡର ଟ୍ରଷ୍ଟି, ବିଭିନ୍ନ ସ୍ବେଚ୍ଛାସେବୀ ଅନୁଷ୍ଠାନର ସଦସ୍ୟ, ବିଭାଗୀୟ ଅଧିକାରୀ, ସମସ୍ତ ପ୍ରମୁଖ ନିଯୋଗର ସଭାପତି, ସମ୍ପାଦକ, ବିଏମ୍ ହାଇସ୍କୁଲ, ଏକାମ୍ର କଲେଜର ପ୍ରତିନିଧିମାନେ ବୈଠକରେ ଉପସ୍ଥିତ ଥିଲେ।
