ନୂଆଦିଲ୍ଲୀ,୧୪।୫: ସରକାରଙ୍କ ପକ୍ଷରୁ କରାଯାଇଥିବା ବିଭିନ୍ନ ଘୋଷଣାକୁ ନେଇ ଦେଶର ଶିଳ୍ପଜଗତରେ ଖୁସିର ଲହରି ଖେଳିଯାଇଛି। ଏମ୍ଏସ୍ଏମ୍ଇ, ବିଦ୍ୟୁତ୍ ବିତରଣ କମ୍ପାନୀ ଏବଂ ରିୟଲ ଇଷ୍ଟେଟ କ୍ଷେତ୍ର ଲାଗି ଗ୍ରହଣ କରାଯାଇଥିବା ପଦକ୍ଷେପକୁ ଶିଳ୍ପ ଜଗତ ପକ୍ଷରୁ ପ୍ରଶଂସା କରାଯାଇଛି। ପ୍ୟାକେଜ ୨.୦ କରୋନାର ପ୍ରଭାବକୁ କମ୍ କରିବାରେ ସହାୟକ ହେବ ବୋଲି ଏହା କହିଛି। ସରକାରଙ୍କ ଦ୍ୱାରା ବଜାରକୁ ଅଧିକ ପରିମାଣର ନଗଦ ଆସିବାରେ ସହାୟକ ହେବ। ଏହା ଏମ୍ଏସ୍ଏମ୍ଇଗୁଡିକ ନୂଆ ଜୀବନରେଖା ହେବ ବୋଲି କୁହାଯାଉଛି। ଏମ୍ଏସ୍ଏମ୍ଇ ଲାଗି ସରକାର ବନ୍ଧକମୁକ୍ତ ଋଣ ପ୍ରଦାନ ସମ୍ପର୍କରେ ଘୋଷଣା କରିଛନ୍ତି। ଅଣ ବେତନ ପେମେଣ୍ଟ ଉପରେ ଟିକସ ହାର ହ୍ରାସ, ଅଣ ବ୍ୟାଙ୍କିଙ୍ଗ୍ ବିତ୍ତ ପ୍ରତିଷ୍ଠାନଗୁଡିକ ଲାଗି ସହାୟତା ବଜାର ଲାଗି ଲାଭକାରୀ ହେବ ବୋଲି ଶିଳ୍ପଜଗତ ମତ ରଖିଛି। ଆୟକର ରିଟର୍ନ ସୀମାରେ ବୃଦ୍ଧି, ଏମ୍ଏସ୍ଏମ୍ଇ ସଂଜ୍ଞାରେ ପରିବର୍ତ୍ତନ ଭଳି ପଦକ୍ଷେପ ଯୁଗାନ୍ତକାରୀ ବୋଲି ସିଆଇଆଇ ମହାନିର୍ଦ୍ଦେଶକ ଚନ୍ଦ୍ରଜିତ ବାନାର୍ଜୀ କହିଛନ୍ତି। ସରକାରଙ୍କ ପଦକ୍ଷେପ ଦ୍ୱାରା ଏମ୍ଏସ୍ଏମ୍ଇ, ମାଇକ୍ରୋ ଫାଇନାନ୍ସ, ହାଉସିଂ ଫାଇନାନ୍ସ କମ୍ପାନୀ, ରିୟଲ ଇଷ୍ଟେଟ ଏବଂ କନଷ୍ଟ୍ରକଶନ କ୍ଷେତ୍ର ଲାଭବାନ ହେବ ବୋଲି ଆସୋଚାମ ମହାସଚିବ ଦୀପକ ସୁଦ କହିଛନ୍ତି। ସରକାରଙ୍କ ପ୍ୟାକେଜ ଶିଳ୍ପ ଏବଂ ଅର୍ଥ ବ୍ୟବସ୍ଥାକୁ ପୁନର୍ଗଠନ ଦିଗରେ ସହାୟକ ହେବ ବୋଲି ଫିକି ସଭାପତି ସଙ୍ଗୀତା ରେଡ୍ଡୀ କହିଛନ୍ତି।
