ମୁମ୍ବାଇ,୬ା୧୧ (ପି.ଟି./ଆଇଏଏନ୍ଏସ୍): ଭାଜପା ସହ ସମ୍ପର୍କ ଛିନ୍ନ କରି ଏନ୍ଡିଏରୁ ଶିବସେନା ଓହରିଆସିଲେ ମହାରାଷ୍ଟ୍ରରେ ଏକ ରାଜନୈତିକ ବିକଳ୍ପକୁ କାର୍ଯ୍ୟକାରୀ କରାଯାଇପାରିବ। ନୂଆ ସରକାର ଗଠନ ନେଇ ଭାଜପା ଓ ଶିବସେନା ମଧ୍ୟରେ ଟଣାଓଟରା ଲାଗି ରହିଥିବାବେଳେ ମଙ୍ଗଳବାର ଏଭଳି ସର୍ତ୍ତ ବାଢ଼ିଛି ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି)। ଏହାସହ କେନ୍ଦ୍ର ସରକାରରୁ ଇସ୍ତଫା ଦେବା ପାଇଁ ଶିବସେନାର ଏକମାତ୍ର ମନ୍ତ୍ରୀ ଅରବିନ୍ଦ ସାଓ୍ବନ୍ତଙ୍କୁ ଶରଦ ପାଓ୍ବାରଙ୍କ ନେତୃତ୍ୱାଧୀନ ଦଳ ପରାମର୍ଶ ଦେଇଛି।
ବିଧାନସଭା ନିର୍ବାଚନ ଅକ୍ଟୋବର ୨୧ରେ ହୋଇଥିଲା, ଯାହାର ଫଳାଫଳ ୨୪ ତାରିଖରେ ଆସିଥିଲା। ୨୮୮ ଆସନ ବିଶିଷ୍ଟ ଗୃହରେ ଭାଜପାକୁ ୧୦୫, ଶିବସେନା ୫୬, ଏନ୍ସିପି ୫୪ ଓ କଂଗ୍ରେସକୁ ୪୪ ଆସନରେ ସଫଳତା ମିଳିଛି। କିନ୍ତୁ ଅଦ୍ୟାବଧି କୌଣସି ଦଳ କିମ୍ବା ମେଣ୍ଟ ସରକାର ଗଠନ ଦାବି ଜଣାଇନାହିଁ। ୫୦:୫୦ ସୂତ୍ରରେ ଅଢ଼େଇ ବର୍ଷ ମୁଖ୍ୟମନ୍ତ୍ରୀ ପଦ ଦାବିରେ ଭାଜପାର ଅମାନିଆ ସହଯୋଗୀ ଶିବସେନା ଅଡିବସିଛି। ସେପଟେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ ନିଜ ପଦ ଛାଡ଼ିବାକୁ ନାରାଜ। ଏଭଳି ସମୟରେ ଅମରାବତୀ ଜିଲା ବଡ଼ନେରା ନିର୍ବାଚନମଣ୍ଡଳୀର ସ୍ବାଧୀନ ବିଧାୟକ ରବି ରାଣାଙ୍କ ମନ୍ତବ୍ୟ ଏହି କସରତକୁ ସରଗରମ କରିଛି। ରବି କହିଛନ୍ତି, ଭାଜପାକୁ ସମର୍ଥନ ନ କଲେ ଶିବସେନା ଭାଙ୍ଗିଯିବ। ଶିବସେନାର ୨୫ ବିଧାୟକ ଫଡ୍ନବିସଙ୍କୁ ସମର୍ଥନ କରୁଛନ୍ତି। ସେମାନେ ତାଙ୍କ ଯୋଗସୂତ୍ରରେ ଅଛନ୍ତି। ମୁଖପତ୍ର ‘ସାମ୍ନା’ କାର୍ଯ୍ୟନିର୍ବାହୀ ସମ୍ପାଦକ ସଞ୍ଜୟ ରାଉତ୍ ଶିବସେନାର ଏକ ଶୁଆ। ଏନ୍ସିପି ମୁଖପାତ୍ର ନଓ୍ବାବ ମଲିକ୍ କହିଛନ୍ତି, ଭାଜପା ଯଦି ଶିବସେନାକୁ ମୁଖ୍ୟମନ୍ତ୍ରୀ ପଦ ଦେବାକୁ ମନା କରୁଛି ତେବେ ଏକ ବିକଳ୍ପ ଅଛି। କିନ୍ତୁ ଭାଜପା ଏବଂ ଏନ୍ଡିଏ ସହ ଦଳ ନାହିଁ ବୋଲି ଶିବସେନା ପକ୍ଷରୁ ଘୋଷଣା କରାଯିବା ଉଚିତ। ତା’ପରେ ଆମେ ବିକଳ୍ପ ସରକାର ଗଠନ ନେଇ ସମର୍ଥନ ଦେବୁ। ଭାଜପା ଶିକାର ଆରମ୍ଭ କଲେ ସେହି ଦଳରେ ମାତ୍ର ୨୫ରୁ ୩୦ ବିଧାୟକ ରହିବେ ବୋଲି ମଲିକ୍ ଚେତାବନୀ ଦେଇଛନ୍ତି। ସେହିପରି ଭାଜପା-ଶିବସେନା ମେଣ୍ଟ ସରକାର ଗଠନରେ ବିଫଳ ହେଲେ ପାଓ୍ବାରଙ୍କ ଦଳ ବିକଳ୍ପ କଥା ଚିନ୍ତା କରିବ ବୋଲି ଏନ୍ସିପି ନେତା ଜୟନ୍ତ ପାଟିଲ କହିଛନ୍ତି। ଶିବସେନା ନେତୃତ୍ୱରେ ସରକାର ଗଠନ କରାଗଲେ ଏନ୍ସିପି ଏଥିରେ ଯୋଗଦେଇପାରେ ଓ କଂଗ୍ରେସ ବାହ୍ୟ ସମର୍ଥନ ଦେଇପାରେ ବୋଲି କୁହାଯାଉଛି। ଅନ୍ୟପକ୍ଷରେ ଦିଲ୍ଲୀର ପ୍ରଦୂଷଣ ମହାରାଷ୍ଟ୍ରକୁ ଆସିବ ନାହିଁ ବୋଲି ଶିବସେନା ନେତା ସଞ୍ଜୟ ରାଉତ୍ କହିଛନ୍ତି। ସୋମବାର ଫଡ୍ନବିସ ଭାଜପା ମୁଖ୍ୟ ଅମିତ୍ ଶାହଙ୍କୁ ସାକ୍ଷାତ କରିଥିବାବେଳେ ସରକାର ଗଠନ ନିଷ୍ପତ୍ତି କେବଳ ମହାରାଷ୍ଟ୍ରରେ ହେବ ବୋଲି ରାଉତ୍ ବ୍ୟଙ୍ଗ କରି ସୂଚାଇ ଦେଇଛନ୍ତି।
