ଆରଡ଼ି, ୨୬।୯ (ଡି.ଏନ.ଏ.)- ଭଦ୍ରକ ଜିଲା ପ୍ରଶାସନ ପକ୍ଷରୁ ବାବା ଆଖଣ୍ଡଳମଣିଙ୍କ ପୀଠ ଆରଡ଼ିର ଉନ୍ନତିକରଣ ପାଇଁ ବୈଠକ ବସୁଛି। ସମୀକ୍ଷା ହେଉଛି ଓ ସ୍ଥିତି ପରଖା ଚାଲିଛି। ହେଲେ ଏଠାରେ ଥିବା ଶିବଗଙ୍ଗା ପୁଷ୍କରିଣୀର ପୁନରୁଦ୍ଧାର କାର୍ଯ୍ୟ ସରିବାକୁ ୨ ବର୍ଷ ପୂରିବାକୁ ବସିଲାଣି, ଏହି ପୋଖରୀରେ ଜଳ ଅଦ୍ୟାବଧି ବ୍ୟବହାର ଉପଯାଗୀ ହୋଇପାରି ନାହିଁ। ପର୍ଯ୍ୟାପ୍ତ ପାଣି ନ ଥିବାବେଳେ ପୁଷ୍କରିଣୀରେ ଭାସୁଛି ଚିଙ୍ଗୁଡିଆ ଦଳ। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ପୀଠର ବିକାଶ ନିମନ୍ତେ ଜିଲା ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ ହୋଇଥିବା ବେଳେ ଏ ଦିଗରେ କୌଣସି ପଦକ୍ଷେପ ନିଆ ନ ଯିବା ଅସନ୍ତୋଷର କାରଣ ହୋଇଛି।
ଉଲ୍ଲେଖନୀୟ ଯେ, କନିକା ରାଜା ଖନନ କରିଥିବା ଏହି ପୁଷ୍କରିଣୀର ଜଳ ପୂର୍ବେ ବାବା ଆଖଣ୍ଡଳମଣିଙ୍କ ସ୍ନାନ, ରନ୍ଧନ କାର୍ଯ୍ୟ, ଶ୍ରଦ୍ଧାଳୁମାନଙ୍କ ପଦ ପ୍ରକ୍ଷାଳନ, ଚୂଳପକାରେ ପିଲାଙ୍କ ସ୍ନାନ ଆଦି କାର୍ଯରେ ବ୍ୟବହାର ହେଉଥିଲା। ୧ କି.ମି. ଦୂରରେ ଥିବା ବୈତରଣୀ ନଦୀର ଜଳ ପୂର୍ବରୁ ଶିବମାହାରା ଦେଇ ଏହି ପୁଷ୍କରିଣୀକୁ ପ୍ରବେଶ କରୁଥିଲା। ହେଲେ ଏହି ମାହାରା ଏବେ ପୋତି ହୋଇଯିବାରୁ ନଦୀ ଜଳ ଆଉ ପୁଷ୍କରିଣୀକୁ ପ୍ରବେଶ କରିପାରୁ ନାହିଁ। କେବଳ ବର୍ଷା ଜଳରେ ପୁଷ୍କରିଣୀ ପୂରିବ ବୋଲି ମନ୍ଦିର କର୍ତ୍ତୃପକ୍ଷ ଆଶା ରଖିିଥିଲେ। ଚଳିତବର୍ଷ ପର୍ଯ୍ୟାପ୍ତ ପରିମାଣରେ ବର୍ଷା ନ ହେବାରୁ ପୁଷ୍କରିଣୀ ପୂର୍ଣ୍ଣ ହୋଇପାରୁନି। ଫଳରେ ଏହାର ଜଳରାଶି କୌଣସି କାର୍ଯ୍ୟରେ ଲାଗିପାରୁ ନାହିଁ। ଏହା ଏବେ ବ୍ୟବହାର ଅନୁପଯୋଗୀ ହୋଇପଡ଼ିଛି। ଦୂଷିତ ଜଳରେ ମଣିବାବାଙ୍କ ସ୍ନାନ ହୋଇପାରୁ ନାହିଁ। ପାଇପ୍ ପାଣିରେ ବାବାଙ୍କର ସ୍ନାନାଦି ସହ ରନ୍ଧନ କାର୍ଯ୍ୟ ମଧ୍ୟ ଚାଲିଛି। ପାଇପ୍ ଜଳରେ ପୀଠର ସମସ୍ତ କାର୍ଯ୍ୟ ସମାପନ କରାଯାଉଛି। ଏପରି ସ୍ଥଳେ ପୁଷ୍କରିଣୀରେ ବିଶୁଦ୍ଧ ଜଳ ଭରିବା ଜରୁରୀ ହୋଇପଡ଼ିଛି। ଏ ସମ୍ପର୍କରେ ଭଦ୍ରକ ଉପଜିଲାପାଳ ତଥା ମ୍ୟାନେଜିଂ ଟ୍ରଷ୍ଟି ପୀତାମ୍ବର ସାମଲଙ୍କୁ ପଚାରିବାରୁ କହିଛନ୍ତି, ପୁଷ୍କରିଣୀରୁ ଚିଙ୍ଗୁଡିଆ ଦଳ ସଫା ପାଇଁ ବିଭିନ୍ନ ପନ୍ଥା ଅବଲମ୍ବନ କରାଯାଉଛି। ବିଶେଷଜ୍ଞଙ୍କ ମତରେ କେବଳ ମାଛ ଛଡ଼ାଗଲେ ଏହାର ବିନାଶ ହୋଇପାରିବ। ତେବେ ପୁଷ୍କରିଣୀକୁ କିପରି ପର୍ଯ୍ୟାପ୍ତ ଜଳ ଯାଇପାରିବ ସେଥିପ୍ରତି ଦୃଷ୍ଟି ଦିଆଯିବ ବୋଲି ସେ କହିଛନ୍ତି।