କୋଲକାତା, ୧୦ା୬: ପଶ୍ଚିମବଙ୍ଗରେ ରାଜନୈତିକ ହିଂସାକାଣ୍ଡକୁ ନେଇ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ଓ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ମଧ୍ୟରେ ବାକ୍ଯୁଦ୍ଧ ଆରମ୍ଭ ହୋଇଛି। ଶାହା ମଙ୍ଗଳବାର ମୁଖ୍ୟମନ୍ତ୍ରୀ ତଥା ଟିଏମ୍ସି ମୁଖ୍ୟ ମମତା ବାନାର୍ଜୀଙ୍କ ଉପରେ ଜୋର୍ଦାର ବର୍ଷିଛନ୍ତି। ସେ କହିଛନ୍ତି, ରାଜ୍ୟରେ ଭାଜପା ଲୋକଙ୍କ ମନରୁ ଭୟ ଦୂରକରିବା ଲାଗି ପ୍ରଭାବ ବିସ୍ତାର କରିବାକୁ ଚାହୁଁଛି। ଏଠାରେ ପ୍ରତିହିଂସାମୂଳକ ରାଜନୀତି ଦେଖିବାକୁ ମିଳୁଛି। ଭାଜପାର ଭର୍ଚୁଆଲ ଜନ ସମ୍ବାଦ ରାଲିରେ ଶାହା କହିଛନ୍ତି, ପଶ୍ଚିମବଙ୍ଗରେ ଗରିବଙ୍କ ଲାଗି ଉଦ୍ଦିଷ୍ଟ ଆୟୁଷ୍ମାନ ଭାରତ ସ୍ବାସ୍ଥ୍ୟ ଯୋଜନା କାର୍ଯ୍ୟକାରୀ କରାଯାଉନାହିଁ। ଏଠାକାର ସରକାର ନାଗରିକତ୍ୱ ସଂଶୋଧନ ବିଲ୍କୁ ବିରୋଧ କରି ଲୋକମାନଙ୍କୁ ରାଜନୈତିକ ଶରଣାର୍ଥୀ ଭାବେ ଦେଖିବାକୁ ଚାହୁଁଛି। ମୋଦି ସରକାର ଦେଶ ଲାଗି ବଡ଼ ବଡ଼ ପଦକ୍ଷେପ ଗ୍ରହଣ କରୁଛନ୍ତି। ଦେଶର ସୁରକ୍ଷା ଓ ଲୋକଙ୍କ ହିତ ଲାଗି ବିଭିନ୍ନ ଯୋଜନା କରିଛନ୍ତି। ହେଲେ ଏଠାକାର ସରକାର ଦୁର୍ନୀତିକୁ ପ୍ରଶ୍ରୟ ଦେଇ ଚାଲିଛନ୍ତି। ପ୍ରବାସୀ ଶ୍ରମିକଙ୍କ ଉଦ୍ଧାର ଲାଗି ସେମାନଙ୍କୁ ଶ୍ରମିକ ସ୍ପେଶାଲ ଟ୍ରେନରେ ଅଣାଯାଇଥିବା ବେଳେ ମମତା ସେମାନଙ୍କୁ ଅପମାନିତ କରିଛନ୍ତି, ସେଇମାନେ ହିଁ ତାଙ୍କୁ ବାହାରିଯିବାର ରାସ୍ତା ଦେଖାଇବେ ବୋଲି ଶାହା କହିଛନ୍ତି।
ଅପରପକ୍ଷରେ ମମତା ଏହାର ଜବାବରେ ଶାହାଙ୍କୁ ସମାଲୋଚନା କରି ଭାରତକୁ ବିପଦରେ ପକାଇଥିବା କହିଛନ୍ତି। ଭାଜପା ସମର୍ଥକ ବିଦ୍ୟାସାଗରଙ୍କ ପ୍ରତିମୂର୍ତ୍ତି ଭାଙ୍ଗିଥିବା ବେଳେ ଆମେ ଏହାକୁ ପୁନଃ ଅବସ୍ଥାପିତ କରିଛୁ। ଲୋକଙ୍କମାନଙ୍କ ବିକାଶକୁ ରାଜ୍ୟ ସରକାର ସବୁବେଳେ ଗୁରୁତ୍ୱ ଦେଇଆସିଛନ୍ତି। ଶାନ୍ତି ଓ ସୌହାର୍ଦ୍ଦ୍ୟ ମଧ୍ୟରେ ସମସ୍ତଙ୍କ ରହିବାର ଅଧିକାର ଅଛି। ରାଜନୀତି ନାଁରେ ଲୋକଙ୍କ ଅସୁବିଧାକୁ ଅଣଦେଖା କରାଯାଇ ପାରିବନାହିଁ କି ଦେଶକୁ ବିପଦ ମୁହଁକୁ ଠେଲାଯାଇପାରିବ ନାହିଁ ବୋଲି ମମତା ଟୁଇଟ୍ କରି ଜଣାଇଛନ୍ତି। ପ୍ରକାଶଥାଉ କି, ପୂର୍ବରୁ ମଧ୍ୟ ଶାହା-ମମତାଙ୍କ ରାଜନୈତିକ ବାକ୍ଯୁଦ୍ଧ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା। ଗତ ନିର୍ବାଚନରେ ପଶ୍ଚିମବଙ୍ଗରେ ଭାଜପା ଶକ୍ତିବୃଦ୍ଧି କରିଥିବା ବେଳେ ଟିଏମ୍ସି ସରକାରକୁ ଶାହାଙ୍କ ସମାଲୋଚନା ଜାରି ରହିଛି।
