ଭୁବନେଶ୍ୱର,୨୧।୭(ବ୍ୟୁରୋ): ଘର ପୂରା କିଟ୍ କିଟ୍ ଅନ୍ଧାର ଥିଲା। କଟା ମୁଣ୍ଡ ସହିତ ସଂରକ୍ଷିତ ଶବ ସେହି ଘରେ ଥିଲା। ଆଉ ଠାଏ ଠାଏ ରକ୍ତ ଛିଟା ପଡ଼ିଥିଲା। କିଏ ପାଟି କରି ଚିଲାଉଥିଲା ତ’ ଆଉ କିଏ କାହା ଉପରେ ଡେଇଁ ପଡ଼ୁଥିଲା। ଏସବୁ ଦେଖିଲେ ଭୂତ କୋଠି ବୋଲି ଅନୁଭବ ହେଉଥିଲା। ଏହା କୌଣସି ଫିଲ୍ମର ଅଂଶ ନ ଥିଲା, କେତେଜଣ ପିଲାଙ୍କ ଦ୍ୱାରା ପ୍ରସ୍ତୁତ ‘ହଣ୍ଟେଡ୍ ହାଉସ୍’ର ଦୃଶ୍ୟ ଥିଲା।
ଶନିବାର ଉଦ୍ଘାଟିତ ହୋଇଥିବା ଲୟୋଲା ସ୍କୁଲର ପଞ୍ଚମ ବାର୍ଷିକ ପ୍ରଦର୍ଶନୀ ‘ଲୟୋଲା ସିନର୍ଜି-୨୦୧୯’ରେ ନବମ ଶ୍ରେଣୀ ‘ବି’ ସେକ୍ସନ ଛାତ୍ରୀଛାତ୍ରଙ୍କ ଦ୍ୱାରା ପ୍ରସ୍ତୁତ ହୋଇଥିଲା ଏହି ‘ହଣ୍ଟେଡ୍ ହାଉସ୍’। ଏକ ରୁମ୍କୁ ଅନ୍ଧାର କରି ସେଠାରେ ଭୂତ କୋଠିର ଦୃଶ୍ୟ ଯେଭଳି ଅନୁଭବ ହେବ ସେହିପରି ସଜା ଯାଇଥିଲା। ଭିତରେ ୩ଜଣ ପିଲା ଭୂତ ବେଶରେ ରହିଥିଲେ। ଗୋଟିଏ ପାର୍ଶ୍ୱରେ ପ୍ରବେଶ ଓ ଆଉ ଅନ୍ୟପଟେ ପ୍ରସ୍ଥାନ ଥିଲା। ଏକାଥରକେ ଦୁଇଜଣଙ୍କୁ ସେହି ‘ହଣ୍ଟେଡ୍ ହାଉସ୍’କୁ ଦେଖିବା ପାଇଁ ଛଡ଼ା ଯାଉଥିଲା। ତା’ ଭିତରକୁ ଯିଏ ଯାଉଥିଲେ ସେମାନଙ୍କ ଉପରକୁ କଟା ମୁଣ୍ଡ ଫୋପାଡ଼ିବା ସହିତ ବିଭିନ୍ନ ଉପାୟରେ ଭୟଭୀତ ପରିସ୍ଥିତି ସୃଷ୍ଟି କରାଯାଉଥିଲା। ବାହାରିବା ସମୟରେ ସବୁଠାରୁ ବେଶି ଭୟ ଲାଗୁଥିଲା। ଯେତେବେଳେ ଦେଖଣାହାରୀ ପ୍ରସ୍ଥାନ ବାଟ ଦେଖି ଖୁସିରେ ବାହାରକୁ ବାହାରିବାକୁ ଚେଷ୍ଟା କରୁଥାଏ ସେହି ସମୟରେ ଭୂତ ବେଶରେ ଥିବା ଜଣେ ପିଲା ଗୋଡ଼ ଧରି ପକାଉଥିଲା। ଏଭଳି ପିଲା ଓ ଅଭିଭାବକଙ୍କ ଭୟ ଓ ଚିତ୍କାରରେ ଫାଟିପଡୁଥିଲା ‘ଲୟୋଲା ସିନର୍ଜି’ର ଏହି ‘ହଣ୍ଟେଡ୍ ହାଉସ୍’। ଏଥିରେ ପ୍ରାୟ ୨୦ଜଣ ଅଂଶଗ୍ରହଣ କରିଥିଲେ।
ଏହି ପ୍ରଦର୍ଶନୀକୁ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଯୁଗ୍ମ ସଚିବ ଡ. ଉଷାରାଣୀ ସାହୁ ଉଦ୍ଘାଟନ କରି କଠିନ ପରିଶ୍ରମ କରି ସଫଳତା ହାସଲ କରିବା ପାଇଁ ଛାତ୍ରୀଛାତ୍ରଙ୍କୁ ପରାମର୍ଶ ଦେଇଥିଲେ। ପ୍ରଥମରୁ ଦ୍ୱାଦଶ ଶ୍ରେଣୀ ଛାତ୍ରୀଛାତ୍ରଙ୍କ ଦ୍ୱାରା ପ୍ରସ୍ତୁତ ବିଭିନ୍ନ ମଡେଲ, ପ୍ରକଳ୍ପ ଦର୍ଶକଙ୍କୁ ଆକର୍ଷିତ କରିଥିଲା। ପିଲାଙ୍କ ଦ୍ୱାରା ପ୍ରସ୍ତୁତ ପରିବେଶ ସଚେତନତା କାଯର୍ର୍ୟକ୍ରମ, ଧର୍ମ ଏବଂ ବିଜ୍ଞାନ ସମ୍ବନ୍ଧୀୟ ବିଭିନ୍ନ ତଥ୍ୟ ବହୁ ଶିକ୍ଷା ପ୍ରଦାନ କରିଥିଲା। ପ୍ରାକୃତିକ ବିପର୍ଯ୍ୟୟ ସମୟରେ କିପରି ମୁକାବିଲା କରାଯାଇପାରିବ ତାହା ଛାତ୍ରୀଛାତ୍ର ପ୍ରକଳ୍ପ ମାଧ୍ୟମରେ ବୁଝାଇଥିଲେ। ପିଲାଙ୍କ ସୃଜନଶୀଳତା ଏବଂ ଅନ୍ତର୍ନିହିତ ପ୍ରତିଭାର ବିକାଶ ସାଧନ ପାଇଁ ଏହା ଏକ ପ୍ରକୃଷ୍ଟ ମାଧ୍ୟମ ବୋଲି ବିଦ୍ୟାଳୟ ଅଧ୍ୟକ୍ଷ ଫାଦର ଭିକ୍ଟର ଏଫ୍ ମିସ୍କୁଇଥ ଏସ.ଜେ. ମତ ପ୍ରକାଶ କରିଥିଲେ।
