ନୂଆଦିଲ୍ଲୀ,୧୮।୬: ୧୭ତମ ଲୋକ ସଭାର ପ୍ରଥମ ଅଧିବେଶନ ଆରମ୍ଭ ହୋଇଯାଇଛି। ଗତ ୨ ଦିନ ହେଲା ଏଠାରେ ନୂଆ ନିର୍ବାଚିତ ସଦସ୍ୟ ଶପଥ ଗ୍ରହଣ କରୁଛନ୍ତି। ଏହି କ୍ରମରେ ମଙ୍ଗଳବାର ସଦନରେ କିଛି ସଦସ୍ୟଙ୍କୁ ପୁଣି ଥରେ ଶପଥ ଗ୍ରହଣ କରିବାକୁ ପଡ଼ିଛି। ଉତ୍ତର ପ୍ରଦେଶର ଡୁମରିଆଗଞ୍ଜରୁ ନିର୍ବାଚିତ ହୋଇଥିବା ଭାଜପା ଏମ୍ପି ଜଗଦମ୍ବିକା ପାଲ ଶପଥ ଗ୍ରହଣ କରି ସାରିବା ପରେ ରେଜିଷ୍ଟରରେ ସ୍ବାକ୍ଷର କରିସାରିଥିଲେ। ଏହାରି ଭିତରେ ସେ ଶପଥ ନେବା ସମୟରେ କିଛି ଶବ୍ଦ ଭୁଲ ପଢ଼ିଥିଲେ ବୋଲି ଲୋକ ସଭା ସଚିବାଳୟର ଜଣେ କର୍ମଚାରୀ କହିଥିଲେ। ଫଳରେ ତାଙ୍କୁ ପୁଣିଥରେ ଶପଥ ପାଠ କରିବାକୁ ପଡ଼ିଥିଲା। ସେହିପରି ଫିଲ୍ମ ଅଭିନେତା ତଥା ପଞ୍ଜାବ ଗୁରୁଦାସପୁର ନିର୍ବାଚନମଣ୍ଡଳୀରୁ ନିର୍ବାଚିତ ହୋଇଥିବା ସନ୍ନି ଦେଓଲ ଇଂଲିଶରେ ଶପଥ ଗ୍ରହଣ କରିଥିଲେ। ହେଲେ ସେ ଅପ୍ହୋଲ୍ଡ ଶବ୍ଦ ବଦଳରେ ଭୁଲବଶତଃ ବିଦହୋଲ୍ଡ ଉଚ୍ଚାରଣ କରିଥିଲେ। ସଙ୍ଗେ ସଙ୍ଗେ ସେ ନିଜ ତ୍ରୁଟିକୁ ସୁଧାରି ଠିକ୍ ଉଚ୍ଚାରଣ କରିଥିଲେ। ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
