ନୂଆଦିଲ୍ଲୀ,୨୫।୬: ଲୋକ ସଭାରେ ଉପ ବାଚସ୍ପତି ପଦ ପାଇଁ ଶିବସେନା ଭାବନା ଗଓ୍ବାଲିଙ୍କ ନାଁ ସୁପାରିଶ କରିପାରେ। ମହାରାଷ୍ଟ୍ରର ୟବତମାଳ-ଓ୍ବାଶିମ୍ର ଲୋକ ସଭା ଆସନରୁ ଭାବନା ୫ଥର ଏମ୍ପି ରହିସାରିଛନ୍ତି। ଓ୍ବାଶିମ ଲୋକ ସଭା ଆସନରୁ ୨ଥର ଓ ୟବତମାଳ-ଓ୍ବାଶିମ ଲୋକ ସଭା ଆସନରୁ ୩ଥର ସେ ବିଜୟ ହାସଲ କରିଛନ୍ତି। ଏହା ପୂର୍ବରୁ ଏହି ପଦକୁ ନେଇ ଶିବସେନାର ରାଜ୍ୟସଭା ଏମ୍ପି ସଞ୍ଜୟ ରାଉତ ନିଜର ପ୍ରତିକ୍ରିୟ ରଖିଥିଲେ। ସେ କହିଥିଲେ, ଏହି ପଦ ପାଇଁ ଆମର ଡିମାଣ୍ଡ ନାହିଁ ହେଲେ ଏହା ଆମର ହକ୍। ଏହି ପଦ ଶିବସେନାକୁ ହିଁ ମିଳିବା ଉଚିତ୍। ଅପରପକ୍ଷରେ ଉପ ବାଚସ୍ପତି ପାଇଁ ଭାଜପା ବିଜୁ ଜନତା ଦଳ (ବିଜେଡି)ର ସଦସ୍ୟଙ୍କୁ ଚୟନ କରିବାକୁ ଚାହୁଁଥିଲା। ହେଲେ ଏହି ପଦକୁ ସ୍ବୀକାର କରିବା ପାଇଁ ବିଜେଡି କୌଣସି ଇଛା ପ୍ରକାଶ କରି ନ ଥିଲା। କାରଣ ସେ ଭାଜପା ଓ କଂଗ୍ରେସ ଠାରୁ ସମାଦୂରତା ରଖିବାକୁ ଚାହୁଁଛି। ସେହିପରି ଓ୍ବାଇଏସ୍ଆର କଂଗ୍ରେସକୁ ମଧ୍ୟ ଏହି ପଦ ପାଇଁ ଅଫର ଦିଆଯାଇଥିଲା। ହେଲେ ସେ ଏଥିପାଇଁ ଏକ ସର୍ତ୍ତ ରଖିଥିଲା। ଯେ ପର୍ଯ୍ୟନ୍ତ ଆନ୍ଧ୍ର ପ୍ରଦେଶକୁ ସ୍ବତନ୍ତ୍ର ରାଜ୍ୟ ମାନ୍ୟତା ନ ଦିଆଯାଇଛି ସେ ପର୍ଯ୍ୟନ୍ତ ଉପ ବାଚସ୍ପତି ପଦ ସ୍ବୀକାର କରିବ ନାହିଁ ବୋଲି ଓ୍ବାଇଏସ୍ଆର କଂଗ୍ରେସ କହିଛି।
