ନୂଆଦିଲ୍ଲୀ,୨।୫: ଦେଶର ୧୧ଟି ରାଜ୍ୟର ୯୦ ଜିଲାରେ ଲାଲ୍ ଆତଙ୍କ ଜାରି ରହିଛି। ୨୦୦୯ଠାରୁ ଗତ ୧୦ ବର୍ଷ ମଧ୍ୟରେ ମାଓବାଦୀଙ୍କ ଆକ୍ରମଣରେ ୧୧ଶହ ୫୦ ଜଣ ଯବାନ ଶହୀଦ୍ ହୋଇଛନ୍ତି। ସେହିପରି ୧୩ଶହରୁ ଅଧିକ ଆହତ ହୋଇଥିବା ଏକ ରିପୋର୍ଟରେ ପ୍ରକାଶ ପାଇଛି। ପଶ୍ଚିମବଙ୍ଗ ନକ୍ସଲବାଡ଼ିରୁ ଆରମ୍ଭ ହୋଇଥିବା ମାଓବାଦୀ ଆକ୍ରମଣ ଏବେ ଦେଶରେ କାୟା ବିସ୍ତାର ଜାରି ରଖିଛି। ମାଓବାଦୀ ଦମନ ପାଇଁ ସରକାର ବିଭିନ୍ନ ଯୋଜନା ହାତକୁ ନେଇଛନ୍ତି। ୨୦୨୩ ସୁଦ୍ଧା ଦେଶକୁ ମାଓବାଦୀମୁକ୍ତ କରିବା ପାଇଁ ବ୍ଲୁପ୍ରିଣ୍ଟ୍ ପ୍ରସ୍ତତ ହୋଇଛି। ଛତିଶଗଡ଼, ଓଡ଼ିଶା, ମହାରାଷ୍ଟ୍ର, ମଧ୍ୟପ୍ରଦେଶ, ଆନ୍ଧ୍ରପ୍ରଦେଶ, ବିହାର, ଝାଡ଼ଖଣ୍ଡ, ତେଲେଙ୍ଗାନା, ଉତ୍ତରପ୍ରଦେଶ,ପଶ୍ଚିମବଙ୍ଗ ଆଦି ରାଜ୍ୟରେ ମାଓବାଦୀଙ୍କ ରେଡ୍ କରିଡ଼ର ପରିବ୍ୟାପ୍ତ ହୋଇଛି। ଏଠାରେ ମାଓବାଦୀ କାର୍ଯ୍ୟକଳାପ ଉପରେ ରୋକ ପାଇଁ ମିଳିତ ସୁରକ୍ଷାବାହିନୀଙ୍କ ପକ୍ଷରୁ ଉଦ୍ୟମ ଅବ୍ୟାହତ ଥିବା ରିପୋର୍ଟରେ ଦର୍ଶାଯାଇଛି। ମାଓବାଦୀଙ୍କ ଆକ୍ରମଣରେ ୨୦୧୦ରେ ୧୧୯୪ ଜଣ ଲୋକଙ୍କ ମୃତ୍ୟୁ ଘଟିଥିଲା। ସେହିପରି ୨୦୧୧ରେ ୬୦୬, ୨୦୧୨ରେ ୩୭୪, ୨୦୧୩ରେ ୪୧୮, ୨୦୧୪ରେ ୩୪୯, ୨୦୧୫ରେ ୨୫୫, ୨୦୧୬ରେ ୪୩୨ ଜଣ ଲୋକଙ୍କର ମୃତ୍ୟୁ ଘଟିଥିଲା। ୨୦୧୭ରେ ୩୩୫ ଜଣ ଲୋକଙ୍କ ମୃତ୍ୟୁ ମାଓବାଦୀଙ୍କ ଆକ୍ରମଣରେ ଘଟିଥିଲା। ସେହିପରି ୨୦୧୮ରେ ୪୧୨ ଜଣ ଏବଂ ୨୦୧୯ରେ ବର୍ତ୍ତମାନ ସୁଦ୍ଧା ୯୨ ଲୋକଙ୍କର ମୃତ୍ୟୁ ଘଟିଥିବା ରିପୋର୍ଟ ପ୍ରକାଶ ପାଇଛି। ମୃତକଙ୍କ ମଧ୍ୟରେ ସାଧାରଣ ଲୋକ, ଯବାନ ତଥା ମାଓବାଦୀ ଥିବା ପ୍ରକାଶ ପାଇଛି।
