ଭୁବନେଶ୍ୱର,୭।୨(ବ୍ୟୁରୋ): ରାଜ୍ୟ ସରକାରଙ୍କ ଦ୍ୱାରା ‘ମୋ ସରକାର’ କାର୍ଯ୍ୟକ୍ରମ ଜାରି ରହିଛି। ଓଡ଼ିଶାରେ ପୋଲିସ ବ୍ୟବସ୍ଥାକୁ ପୂର୍ବାପେକ୍ଷା ଅଧିକ ଲୋକାଭିମୁଖୀ କରିବାକୁ ଏହି ପ୍ରୟାସ କରାଯାଇଛି। ସେହି କ୍ରମରେ ଏହାର ସୁଫଳ ମଧ୍ୟ ମିଳିଛି। ନିୟମିତ ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ତାଙ୍କ କାର୍ଯ୍ୟାଳୟ(ସିଏମ୍ଓ) ପକ୍ଷରୁ ଅଭିଯୋଗକାରୀଙ୍କ ମତାମତ ନିଆଯାଉଛି। ସେମାନଙ୍କ ଅଭିଯୋଗ ଆଧାରରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉଛି।
ଏହି କ୍ରମରେ କୋରାପୁଟ ଜିଲାର ଅମ୍ବାଗୁଡା ଆଉଟପୋଷ୍ଟ ଇନ୍ଚାର୍ଜ ଏସ୍ଆଇ ନାରାୟଣ ପଟ୍ଟନାୟକଙ୍କୁ ନିଲମ୍ବନ କରାଯାଇଛି। ଏକ ଦୁର୍ଘଟଣା ମାମଲାରେ ଜନୈକ ଅଭିଯୋଗକାରୀଙ୍କ ଗାଡିଟି ଅମ୍ବାଗୁଡା ଆଉଟପୋଷ୍ଟ ଦ୍ୱାରା ଜବତ ହୋଇଥିଲା। ଏହାକୁ ଉଦ୍ଧାର କରିବା ପାଇଁ ଥାନା ଅଧିକାରୀ ଜଣଙ୍କ ୧୦,୦୦୦ ଟଙ୍କା ଲାଞ୍ଚ ମାଗିଥିଲେ। ଏଥିସହିତ ୬୦୦୦ ଟଙ୍କାର ଅଗ୍ରିମ ମଧ୍ୟ ଗ୍ରହଣ କରିଥିଲେ। ହେଲେ ଏହି ଖବର ପାଇ ସିଏମ୍ଓର ନିର୍ଦ୍ଦେଶ କ୍ରମେ କୋରାପୁଟ ଏସ୍ପି ଜୟପୁର ସଦର ଥାନାରେ ଦୁର୍ନୀତି ନିରୋଧୀ ଆଇନ ବଳରେ ଏସ୍ଆଇଙ୍କ ବିରୋଧରେ ଗୁରୁବାର କେସ୍ ନଂ ୨୪/୨୦୨୦ରେ ଏକ ମାମଲା ରୁଜୁ କରାଯାଇଥିଲା। ଅନୁରୂପ ଭାବେ ଶବ ବ୍ୟବଚ୍ଛେଦ ସମୟରେ ୩୦୦୦ ଟଙ୍କା ମାଗିଥିବା ଡାକ୍ତରଙ୍କ ବିରୋଧରେ ମଧ୍ୟ ମାମଲା ରୁଜୁ କରାଯାଇଛି। ଅଭିଯୋଗକାରୀ ଶବ ବ୍ୟବଚ୍ଛେଦ ପାଇଁ ୨୫୦୦ ଟଙ୍କା ଦେଇଥିବା ଜଣାପଡିଛି। ଶେଷ ଖବର ସୁଦ୍ଧା ଏସ୍ଆଇଙ୍କୁ କୋର୍ଟ ଚାଲାଣ କରାଯାଇଥିବା ଜଣାପଡିଛି।
