ଧାମନଗର,୧୨ା୪(ଡି.ଏନ୍.ଏ.)- ଧାମନଗର ବ୍ଲକରେ ଲକ ଡାଉନ ଅବମାନନା ନେଇ ବ୍ଲକ ପ୍ରଶାସନ କଡ଼ା ପଦକ୍ଷେପ ନେଉଛି। ରବିବାର ପୂର୍ବାହ୍ନରେ ଧାମନଗର ଆଡିସନାଲ ତହସିଲଦାର ଲଗ୍ନଜିତ ବେହେରା ଧୂଷୁରୀ ଥାନା ପୋଲିସ ସହାୟତାରେ ଅସୁରାଳୀ ବଜାର, ମଙ୍ଗଳପୁର, ସହିଦନଗର ଅଞ୍ଚଳରେ ଚଢଉ କରିଥିଲେ। ମାସ୍କ ବ୍ୟବହାର କରି ନ ଥିବା ୧୨ ଜଣଙ୍କଠାରୁ ୨୪ ଶହ ଟଙ୍କା ଜରିମାନା ଆଦାୟ କରିବା ସହିତ ଜଣେ ଦୋକାନୀଙ୍କଠାରୁ ୧ ହଜାର ଜରିମାନା ଆଦାୟ କରିଛନ୍ତି। ସେହିପରି ଶନିବାର ଭଣ୍ଡାରୀପଡା ଗ୍ରାମର କାର୍ତ୍ତିକ ସାହୁଙ୍କୁ ପୋଲିସ ଗିରଫ କରିଛି। ସେ ଜଣେ ମହିଳା ସରକାରୀ ଅଧିକାରୀଙ୍କ ବିରୋଧରେ ସୋସିଆଲ ମିଡ଼ିଆରେ ଅଶ୍ଳୀଳ ଭାଷା ଲେଖିଥିବା ଅଭିଯୋଗରେ ଗିରଫ ହୋଇଥିବା ଆଡିସନାଲ ତହସିଲଦାର ବେହେରା ସୂଚନା ଦେଇଛନ୍ତି। ଧାମନଗର ଥାନା ଅଧୀନରେ କୋରୋନା ଦାୟିତ୍ୱ ନେଇଥିବା ଅନ୍ୟ ଆଡିସନାଲ ତହସିଲଦାର ଅଭିଲିପ୍ସା ପଟ୍ଟନାୟକ ଶନିବାର ଧାମନଗର ସାନ ବଜାରରେ ଜଳଖିଆ ଦୋକାନ ଖୋଲିଥିବା ଆନନ୍ଦ ସାହୁଙ୍କୁ ଗିରଫ କରିଥିଲେ। ରବିବାର ଜାହାଙ୍ଗିର ବଜାରରେ ଜଣେ ଦୋକାନୀଙ୍କୁ ବେଆଇନ ଭାବେ ଦୋକାନ ଖୋଲିଥିବା ଅଭିଯୋଗରେ ଗିରଫ କରାଯାଇଥିବା ସୂଚନା ମିଳିଛି।
