ନୂଆଦିଲ୍ଲୀ,୨୭ା୫: କରୋନା ସଂକ୍ରମଣକୁ ରୋକିବା ପାଇଁ ଲାଗୁ କରାଯାଇଥିବା ଲକ୍ଡାଉନ ଦ୍ୱାରା ପରିବେଶ ଉପରେ ଅନେକ ସକାରାତ୍ମକ ପ୍ରଭାବ ପକାଇଥିବା ଖବର ମିଳୁଛି। କୁହାଯାଉଛି ଯେ, ଲକ୍ଡାଉନ ଯୋଗୁ ଲୋକେ ଘରେ ରହୁଥିବାରୁ ତାହାର ପ୍ରଭାବରେ ପରିବେଶ ସୁଦୃଢ଼ ହୋଇଛି। ଲୋକଙ୍କ ବହୁ କାର୍ଯ୍ୟକଳାପ ବନ୍ଦ ହେବା ଯୋଗୁ ପ୍ରକୃତିକୁ ବିରାମ ମିଳିଥିବା ଅନେକେ ଭାବୁଛନ୍ତି। କିନ୍ତୁ ବାସ୍ତବରେ ତାହା ନୁହେଁ ବୋଲି ଏକ ସଦ୍ୟତମ ରିପୋର୍ଟରୁ ଜଣାପଡ଼ିଛି। ଲକ୍ଡାଉନ ଜଗତ ଉପରେ ଅନେକ ନକାରାତ୍ମକ ପ୍ରଭାବ ପକାଇଥିବା ନେଇ ବିଶ୍ୱ ଅର୍ଥନୈତିକ ଫୋରମ୍ (ଡବ୍ଲ୍ୟୁଇଏଫ୍) ଦ୍ୱାରା ଏକ ରିପୋର୍ଟ ପ୍ରକାଶ ପାଇଛି। ନ୍ୟୁଜ୍ ଏଜେନ୍ସି ଥମ୍ସନ ରଏଟର୍ସ ସହ ମିଳିତ ଭାବେ ଏହି ରିପୋର୍ଟ ପ୍ରସ୍ତୁତ କରାଯାଇଛି, ଯେଉଁଥିରେ ଦର୍ଶାଯାଇଛି ଯେ, ଲକ୍ଡାଉନ ବିଶ୍ୱର ଜଙ୍ଗଲ ପ୍ରତି ବିପଦ ବଢ଼ାଇଦେଇଛି।
ରିପୋର୍ଟ ଅନୁଯାୟୀ, ଲକ୍ଡାଉନ୍ ଯୋଗୁ କୋଟି କୋଟି ଗରିବ ନିଯୁକ୍ତି ହରାଇ ବେକାର ହୋଇଯାଇଛନ୍ତି। ଖାଦ୍ୟ ନ ପାଇବା ଯୋଗୁ ସେମାନେ ସହର ଛାଡ଼ି ଗ୍ରାମାଞ୍ଚଳର ନିଜ ଘରକୁ ଫେରିଛନ୍ତି। ଫଳରେ ଜୀବିକା, ଆଶ୍ରୟ, ଖାଦ୍ୟ ପାଇଁ ଏବେ ସେମାନେ ଜଙ୍ଗଲ ଉପରେ ନିର୍ଭର କରୁଛନ୍ତି। ଜାଳେଣି ପାଇଁ ଗଛ କାଟିବାରେ ଲାଗିଛନ୍ତି। ସମଗ୍ର ବିଶ୍ୱରେ ୧୦୦ କୋଟି ଲୋକ ବନ୍ୟ ଖାଦ୍ୟ ଉପରେ ଏବଂ ୨୪୦ କୋଟି ଲୋକ ରୋଷେଇ ପାଇଁ କାଠ ଉପରେ ନିର୍ଭର କରୁଛନ୍ତି। କେବଳ ଏତିକି ନୁହେଁ, ସାରା ଦୁନିଆରେ ଅତ୍ୟଧିକ ଦାରିଦ୍ର୍ୟ ଭିତରେ ଜୀବନ ବିତାଉଥିବା ପ୍ରତି ୧୦ ଜଣଙ୍କ ମଧ୍ୟରୁ ୯ ଜଣଙ୍କ ଜୀବିକା ଜଙ୍ଗଲ ଉପରେ ନିର୍ଭରଶୀଳ।
ଜାତିସଂଘର ଖାଦ୍ୟ ଏବଂ କୃଷି ସଂଗଠନ (ଏଫ୍ଏଓ)ର ବନ ବିଭାଗ ନିର୍ଦ୍ଦେଶକ ମେଟ୍ଟେ ୱିଲ୍କିି କହିଛନ୍ତି ଯେ, ଖାଦ୍ୟ ଏବଂ ଜାଳେଣି ପାଇଁ ଗଛ କଟାଯାଇଥାଏ। ବିଶ୍ୱ ଜନସଂଖ୍ୟାର ଏକ ତୃତୀୟାଂଶ ଲୋକ ରୋଷେଇ ପାଇଁ କାଠ ଉପରେ ନିର୍ଭର କରନ୍ତି। କିନ୍ତୁ ଏହି ସଂଖ୍ୟା ଲକ୍ଡାଉନ୍ ସମୟରେ ଆହୁରି ବୃଦ୍ଧି ପାଇପାରେ। ଏଫ୍ଏଓ ଏହାର ‘ଷ୍ଟେଟ୍ ଅଫ୍ ଦ ୱାଲର୍ଡସ୍ ଫରେଷ୍ଟ ୨୦୨୦’ ରିପୋର୍ଟରେ ବୃଦ୍ଧି ପାଉଥିବା ସଂକ୍ରାମକ ରୋଗ କରୋନା ସହ ଜଙ୍ଗଲ ନଷ୍ଟ ହେବା ବିଷୟ ଯୋଡ଼ିଛି। ରିପୋର୍ଟ ଅନୁଯାୟୀ, ୧୯୯୦ପରଠାରୁ ୪୨ କୋଟି ହେକ୍ଟର ଜମି ନଷ୍ଟ ହୋଇଯାଇଛି, ଯାହା ଦକ୍ଷିଣ ଆଫ୍ରିକାର ମୋଟ ଆକାରର ପ୍ରାୟ ୩ ଗୁଣ। ରିପୋର୍ଟରେ ଆହୁରି କୁହାଯାଇଛି ଯେ, ଲକ୍ଡାଉନରେ ପ୍ରକୃତି ନିଜେ ବିଶ୍ରାମ ନେଉଛି ଏବଂ ନିଜକୁ ନିଜେ ଠିକ୍ କରିବାରେ ଲାଗିଛି ବୋଲି ଅପପ୍ରଚାର କରାଯାଉଛି। କିନ୍ତୁ ସତ୍ୟତା ଭିନ୍ନ। ଅନ୍ୟ ଏକ ରିପୋର୍ଟରେ ଡବ୍ଲ୍ୟୁଇଏଫ୍ କହିଛି ଯେ, କ୍ରାନ୍ତିବଳୟରେ ଥିବା ବହୁ ଗ୍ରାମାଞ୍ଚଳରେ ଜଙ୍ଗଲ ଧ୍ୱଂସ, ଜମି ଦଖଲ, ବେଆଇନ ଖଣି ଖନନ ଏବଂ ବନ୍ୟଜନ୍ତୁ ଶିକାର କରାଯାଉଛି। ପ୍ରକୃତି ଏବଂ ସମ୍ବଳ ଉପରେ ଅତ୍ୟଧିକ ଚାପର ଚିତ୍ର ସହର ବାହାର ଗ୍ରାମୀଣ କ୍ଷେତ୍ରରେ ଦେଖିବାକୁ ମିଳୁଛି ବୋଲି ଡବ୍ଲ୍ୟୁଇଏଫ୍ କହିଛି।
