ସସ୍ମିତା ପାଇକରାୟ
ଭୁବନେଶ୍ୱର, ୨୨ା୪ (ବ୍ୟୁରୋ): କରୋନା ବଦଳାଇ ଦେଇଛି ଲୋକଙ୍କ ଜୀବନଶୈଳୀ। ଲକ୍ଡାଉନ୍ ଯୋଗୁ ଲୋକେ ଦିନରାତି ଘରେ ରହୁଥିବାବେଳେ ଟାଇମ୍ପାସ୍ ପାଇଁ ଭିନ୍ନ ଭିନ୍ନ ପନ୍ଥା ଆପଣାଇଛନ୍ତି। କିଏ ପିଲାଛୁଆ ଓ ପରିବାର ସହ ବିଭିନ୍ନ ଇନ୍ଡୋର ଆକ୍ଟିଭିଟିଜ୍ରେ ସାମିଲ୍ ହେଉଛନ୍ତି ତ ଆଉ କିଏ ବାରିବଗିଚା, ରୋଷେଇ ଆଦିରେ କିଛି ସମୟ ଅତିବାହିତ କରୁଛନ୍ତି। ସେହିଭଳି ଟିଭି, ମୋବାଇଲ୍ ଫୋନ୍ ଓ ଇଣ୍ଟରନେଟ୍ ସହ ମଧ୍ୟ ଯୋଡିହୋଇ ରହୁଛନ୍ତି। ତେବେ ଡିଜିଟାଲ ଦୁନିଆ ଓଡ଼ିଶାର ଯୁବପିଢ଼ିଙ୍କ ଫେଭରାଇଟ୍ ଟାଇମ୍ପାସ୍ ମାଧ୍ୟମ ହୋଇଥିବାବେଳେ ଅନ୍ଲାଇନ୍ ଗେମିଂର ଡିମାଣ୍ଡ୍ ଢେର୍ ବଢ଼ିଯାଇଛି। ଏପରିକି ଲୋକପ୍ରିୟତା କ୍ଷେତ୍ରରେ ଏହା ନେଟ୍ଫ୍ଲିକ୍ସ, ଟେଲିଭିଜନ ଶୋ’ ଓ ଟିକ୍ଟକ୍ଠାରୁ ବି ବଳିଯାଇଛି। ତେବେ ଅନ୍ଲାଇନ୍ ମଲ୍ଟିପ୍ଲେୟାର ଗେମ୍ ସାଙ୍ଗସାଥିଙ୍କ ସହ ଯୋଡ଼ିହେବାର ସୁଯୋଗ ଆଣିଦେଉଥିବାରୁ ଏଥିପ୍ରତି ପିଲାଠାରୁ ବୟସ୍କଙ୍କ ପର୍ଯ୍ୟନ୍ତ ସମସ୍ତେ ଆକର୍ଷିତ ହୋଇପଡୁଛନ୍ତି। କହିବାକୁ ଗଲେ, କରୋନା ମହାମାରୀ ଗେମିଂ ଇଣ୍ଡଷ୍ଟ୍ରିରେ ଏକ ବିରାଟ ପରିବର୍ତ୍ତନ ଆଣିଛି। ‘ଆପ୍ସ ଫ୍ଲାୟର’ର ରିପୋର୍ଟ ମୁତାବକ, ଗତ କିଛି ସପ୍ତାହରେ ଅନ୍ଲାଇନ୍ ଗେମିଂ ଆପ୍ଗୁଡ଼ିକର ଲାଭାଂଶରେ ୩୦ ପ୍ରତିଶତ ବୃଦ୍ଧି ଘଟିଛି। ଲୁଡୋ କିଙ୍ଗ୍, କ୍ୟାଣ୍ଡି କ୍ରସ୍, ବଲ୍ ପୁଲ୍ ଭଳି କାଜୁଆଲ୍ ଗେମ୍ଗୁଡ଼ିକର ଲୋକପ୍ରିୟତା ଲକ୍ଡାଉନ୍ ପରେ ଦ୍ୱିଗୁଣିତ ହୋଇଛି।
ମଲ୍ଟି-ପ୍ଲେୟାର ଗେମ୍
ମଲ୍ଟି-ଗେମ୍ ପ୍ଲାଟ୍ଫର୍ମ ‘ମୋବାଇଲ୍ ପ୍ରିମିୟର୍ ଲିଗ୍’ରେ ଗତ ଏକମାସ ମଧ୍ୟରେ ବ୍ୟବହାରକାରୀଙ୍କ ସଂଖ୍ୟାରେ ୫୫% ଅଭିବୃଦ୍ଧି ଘଟିଛି। ୱାର୍ଲଡ କ୍ରିକେଟ୍ ଚାମ୍ପିୟନଶିପ୍(ଡବ୍ଲ୍ୟୁସିସି), ପୁଲ୍, ଫ୍ରୁଟ୍ ଚପ୍ ଭଳି ଗେମ୍ ଏହି ପ୍ଲାଟ୍ଫର୍ମରେ ଅଧିକ ଖେଳାଯାଇଥିବା ଦେଖିବାକୁ ମିଳିଛି। କେବଳ ଏହି ଗେମ୍ ନୁହେଁ, ରମି କାର୍ଡ ଗେମ୍ ଭଳି ସ୍କିଲ୍-ବେସ୍ଡ ଗେମ୍ଗୁଡ଼ିକରେ ନୂଆ ବ୍ୟବହାରକାରୀଙ୍କ ସଂଖ୍ୟା ୫୦% ବୃଦ୍ଧି ପାଇଛି। ଆଗରୁ ଓଡ଼ିଶାରେ ସିଙ୍ଗଲ୍ ପ୍ଲେୟାର ଗେମିଂର ଡିମାଣ୍ଡ୍ ଅଧିକ ଥିବାବେଳେ ଏବେ କିନ୍ତୁ ମଲ୍ଟି ପ୍ଲେୟାର ଗେମିଂ ଏହାର ସ୍ଥାନ ନେଇଛି। ଲୋକେ ଏଠାରେ କେବଳ ମନୋରଞ୍ଜନ ପାଇଁ ଖେଳୁନାହାନ୍ତି, ବରଂ ରିଓ୍ବାର୍ଡ ବା ପୁରସ୍କାର ମଧ୍ୟ ପାଉଛନ୍ତି। ଆଡ୍ଡା ୫୨ ରମି ଭଳି କେତେକ ଗେମ୍ ବ୍ୟବହାରକାରୀଙ୍କୁ ଟାଇମ୍ପାସ୍ କରାଇବାସହ ଆକର୍ଷଣୀୟ ରିୱାର୍ଡ ଦେଉଛି। ଲକ୍ଡାଉନ୍ ଏପରି ଜାରି ରହିଲେ ଲୋକେ ସିଙ୍ଗିଲ୍ ପ୍ଲେୟାର ପରିବର୍ତ୍ତେ ମଲ୍ଟି-ପ୍ଲେୟାର ଗେମ୍ ସହ ସମ୍ପୂର୍ଣ୍ଣ ଜଡ଼ିତ ହୋଇଯିବେ ବୋଲି ଗେମର୍ ତଥା ଗେମିଂ ଇଣ୍ଡଷ୍ଟ୍ରି ସହ ଜଡ଼ିତ ବିଶେଷଜ୍ଞମାନେ ମତ ଦେଇଛନ୍ତି।
ଲୋକପ୍ରିୟ ହେଉଛି ‘ଇ-ସ୍ପୋର୍ଟସ’
ଅଲିମ୍ପିକ୍ସ, ଆଇପିଏଲ୍ ଓ ୟୁରୋ କପ୍ ବଳି ବଡ଼ ବଡ଼ କ୍ରୀଡା ଇଭେଣ୍ଟ କରୋନା ପାଇଁ ବନ୍ଦ ରହିଛି। ଏପରିସ୍ଥଳେ ‘ଇ-ସ୍ପୋର୍ଟସ’ ଭଳି ନୂଆ କନ୍ସେପ୍ଟ ସାମ୍ନାକୁ ଆସିଛି। ଫର୍ଟନାଇଟ୍, ଲିଗ୍ ଅଫ୍ ଲିଜେଣ୍ଡ୍ସ, କାଉଣ୍ଟର ଷ୍ଟ୍ରାଇକ୍, କଲ୍ ଅଫ୍ ଡ୍ୟୁଟି, ଓଭର୍ ୱାଚ୍ ଏବଂ ମ୍ୟାଡେନ୍ ଏନ୍ଏଫ୍ଏଲ୍ ଭଳି ଇ-ସ୍ପୋର୍ଟସର ବହୁଳ ଲୋକପ୍ରିୟତା ଦେଖିବାକୁ ମିଳିଛି। ଟ୍ବିଚ୍ ଏବଂ ୟୁଟ୍ୟୁବ୍ ଭଳି ପ୍ଲାଟ୍ଫର୍ମରେ ଲାଇଭ୍ ଷ୍ଟ୍ରିମ୍ ହେଉଥିବା ଏହି ଗେମ୍କୁ ଲକ୍ଷ ଲକ୍ଷ ଲୋକ ଦେଖୁଛନ୍ତି। ଲାଇଭ୍ ସ୍ପୋର୍ଟସ ଇଭେଣ୍ଟ ବନ୍ଦ ଥିବା ଯୋଗୁ ଇ-ସ୍ପୋର୍ଟସର ଦର୍ଶକ ସଂଖ୍ୟା ବଢିବା ସହ ସ୍ପନ୍ସର୍ଶିପ୍ ଇନ୍ଭେଷ୍ଟ ମଧ୍ୟ ବୃଦ୍ଧିପାଇବ ବୋଲି ଆଶା କରାଯାଉଛି।
