କଟକ ଅଫିସ,୩୧।୫: ଭଦ୍ରକର ବାସିନ୍ଦା ହେଲେ ଗୌରହରି। ପିଲାଟି ବେଳୁ ପୋଲିଓ ଆକ୍ରାନ୍ତ ହୋଇ ତାଙ୍କର ଡାହାଣ ଗୋଡ଼ କାମ କରୁନି। ଭିନ୍ନକ୍ଷମ ହୋଇଥିଲେ ସୁଦ୍ଧା କେବେ ପରିବାର ଉପରେ ବୋଝ ହୋଇ ନ ଥିଲେ। ଏକ ହୋଟେଲରେ କାମ କରି ନିଜ ଖର୍ଚ୍ଚ ଉଠାଉଥିଲେ। ସେ ପ୍ରେମ ମଧ୍ୟ କରିଥିଲେ। ନିଜ ଗାଁଠାରୁ ୪ କିମି ଦୂରରେ ରହୁଥିବା ବାସନ୍ତୀ ବେହେରାଙ୍କୁ ସେ ପ୍ରେମ ବିବାହ କରିଥିଲେ। କଟକ, ଭୁବନେଶ୍ୱର ଆସି ଦିନ ମଜୁରିଆ ଭାବେ କାର୍ଯ୍ୟ କରୁଥିବା ଗୌରହରି ୧୨ବର୍ଷ ତଳେ ଏକ ଦୁର୍ଘଟଣାର ଶିକାର ହୋଇଥିଲେ। ଫୁଲନଖରା ନିକଟରେ ହୋଇଥିବା ଏକ ମର୍ମନ୍ତୁଦ ଦୁର୍ଘଟଣାରେ ତାଙ୍କ ସକ୍ଷମ ଗୋଡ଼ଟି ମଧ୍ୟ ପଙ୍ଗୁ ହୋଇଯାଇଥିଲା। ସେବେଠାରୁ କିଲା ପଡ଼ିଆ ନିକଟରେ ଅସ୍ଥାୟୀ ଭାବେ ସେ ପଡ଼ି ରହିଛନ୍ତି।
ଗୌରହରିଙ୍କୁ ମିଳିଛି ଭିନ୍ନକ୍ଷମ ପ୍ରମାଣପତ୍ର। ସେ ୭୦ ପ୍ରତିଶତ ଭିନ୍ନକ୍ଷମ ବୋଲି ସେଥିରେ ଉଲ୍ଲେଖ ରହିଛି। କିନ୍ତୁ ଏବେ ସୁଦ୍ଧା ତାଙ୍କୁ ଭିନ୍ନକ୍ଷମ ଭତ୍ତା ମିଳୁନାହିଁ। ପରିବାର କହିଲେ ସ୍ତ୍ରୀ ବାସନ୍ତୀ ଆଉ ୨ ପୁଅ, ଗୋଟିଏ ଝିଅ। ବାସନ୍ତୀ ପର ଘରେ ମୂଲ ଲାଗନ୍ତି। ଝିଅ ମାମା ମଧ୍ୟ ବାସନ୍ତୀଙ୍କ ସହ କାମରେ ଯାଏ। ଦୁଇ ପୁଅ ଶିବ ଓ କାର୍ତ୍ତିକ ଭିକ୍ଷା ମାଗନ୍ତି ବୋଲି ଗୌରହରି କହିଛନ୍ତି। ଦୁଇଟି ଯାକ ଗୋଡ଼ ଅକ୍ଷମ ହୋଇଯିବା ପରଠାରୁ ରୋଜଗାରର ବାଟ ବନ୍ଦ ହୋଇଯାଇଛି। ୧୨ବର୍ଷ ଧରି ଏଠାରେ ପଡ଼ିରହିଥିବା ବେଳେ ଲକ୍ଡାଉନ୍ ବେଳର ଅନୁଭୂତି ସମ୍ପର୍କରେ ଗୌରହରି କହିଛନ୍ତି, ବର୍ଷଯାକ ଏଠାରେ ରହୁଛୁ। ବାଲିଯାତ୍ରା ସମୟରେ ପୋଲିସ ଆମକୁ ହଟେଇ ଦିଏ। ନଦୀବନ୍ଧଠାରୁ ଦୂରରେ ଯାଇ ରହୁ। ଏବେ ଲକ୍ଡାଉନ୍ ଯୋଗୁ ପେଟ ପାଇଁ ନାନା ସମସ୍ୟା ହୋଇଛି। ସ୍ତ୍ରୀ ବାସନ୍ତୀଙ୍କ କାମ ବନ୍ଦ ହୋଇଯାଇଛି। ପୁଅ ଦୁଇ ଜଣ କିଛି ମାଗିକରି ଆଣି ପାରୁନାହାନ୍ତି। ପ୍ରଥମ ୭ରୁ ୮ ଦିନ ଭଲରେ ଖାଇବାକୁ ମିଳି ନ ଥିଲା। କେତେକ ପୋଲିସ କମର୍ର୍ଚାରୀ ଆଉ ସାମାଜିକ କର୍ମୀ ଖାଦ୍ୟ ପୁଡ଼ିଆ ଆଣି ଦେଇଛନ୍ତି ବୋଲି କୋହଭରା କଣ୍ଠରେ କହିଛନ୍ତତି ଗୌରହରି।
