ତ୍ରିନାଥ ମହାନ୍ତି
ଭୁବନେଶ୍ୱର,୨୯ା୪(ବ୍ୟୁରୋ): କରୋନା ମହାମାରୀ ପାଇଁ ସାରା ଦେଶରେ ମାସେରୁ ଊର୍ଦ୍ଧ୍ୱ ହେଲାଣି ଲକ୍ଡାଉନ୍ ଜାରି ରହିଛି। ରୋଜଗାର ହରାଇ ଲୋକେ ଘରେ ରହିଛନ୍ତି। ଲୋକେ ପେଟ ଚିନ୍ତାରେ ଦିନରାତି ଘାରି ହେଉଥିବାବେଳେ ପଶୁପକ୍ଷୀଙ୍କ କଥା ଭାବିବାକୁ କାହାର ସମୟ ନାହିଁ। ଏପରି ସଂକଟଜନକ ସମୟରେ ନିଜ ଗୁରୁଦାୟିତ୍ୱ ଭୁଲି ନାହାନ୍ତି ପିକକ୍ ମ୍ୟାନ୍ ଭାବେ ପରିଚିତ କଟକ ନରାଜର କାହ୍ନୁଚରଣ ବେହେରା। ଅର୍ଥାଭାବ ସହ ନାନା ଅସୁବିଧାରେ ଥିଲେ ମଧ୍ୟ ଅନ୍ୟଦିନ ଭଳି ଏବେବି ନରାଜ ଫାୟାରିଂ ରେଞ୍ଜ ନିକଟରେ ଶତାଧିକ ମୟୂରଙ୍କୁ ଖାଇବାକୁ ଦେଇ ଚାଲିଛନ୍ତି। କେବଳ ମୟୂର ନୁହେଁ କପୋତ, ଗୁଣ୍ଡୁରୀ, ନେଉଳ ଆଦି ଅନେକ ଜୀବଜନ୍ତୁ ତାଙ୍କ ହାତରୁ ଖାଦ୍ୟ ଖାଇବାକୁ ଧାଇଁ ଆସୁଛନ୍ତି। ଲକ୍ଡାଉନରେ କାହ୍ନୁଙ୍କ ଏପରି କାର୍ଯ୍ୟକୁ ନେଇ ଚାରିଆଡୁ ପ୍ରଶଂସାର ସୁଅ ଛୁଟୁଛି। ଫୋନ୍ରେ ମୟୂରଙ୍କ ଖାଇବା କଥା ପଚାରି ବୁଝିବା ସହ ତାଙ୍କୁ ଉତ୍ସାହିତ କରୁଛନ୍ତି।
ଏ ସମ୍ପର୍କରେ କାହ୍ନୁ କୁହନ୍ତି, ମୟୂରମାନଙ୍କୁ ସକାଳ ୮ଟା ଏବଂ ଅପରାହ୍ନ ୩ଟା ଦୁଇଥର ଧାନ, ଗହମ, ମୁଗ, ଖୁଦ ଆଦି ଖାଇବାକୁ ଦେଉଛନ୍ତି। ଏଥିପାଇଁ ଦିନକୁ ୫ଶହରୁ ୭ଶହ ଟଙ୍କା ଖର୍ଚ୍ଚ ହେଉଛି। ଖରା ଓ ଶୀତ ଦିନରେ ମୟୂରମାନଙ୍କୁ ଦେଖିବାକୁ ଆସୁଥିବା ଲୋକଙ୍କ ମଧ୍ୟରୁ କେହି କେହି ଅର୍ଥ ସହଯୋଗ କରନ୍ତି। ତାହାକୁ ସେ ବର୍ଷା ଦିନ ପାଇଁ ସାଇତି ରଖିଥାନ୍ତି। ଏଥର ଖରାଦିନରେ ଲକ୍ଡାଉନ୍ ପାଇଁ କେହି ଲୋକେ ଆସି ନାହାନ୍ତି। ତଥାପି କାହ୍ନୁ ଜୀବନ ଥିବା ପର୍ଯ୍ୟନ୍ତ ମୟୂରଙ୍କୁ ଏପରି ଖାଇବାକୁ ଦେଉଥିବି ବୋଲି କହିଛନ୍ତି।
ଜେଜେ ଦେଇଥିବା କଥାକୁ ପାଳନ କରୁଛି: କାହ୍ନୁ
୧୯୯୯ ମହାବାତ୍ୟାରେ ନିକଟ ଜଙ୍ଗଲ ଧ୍ୱଂସବିଧ୍ୱସ୍ତ ହୋଇଯାଇଥିଲା। ବହୁ ପଶୁପକ୍ଷୀ ମରିଯାଇଥିଲେ। ବଞ୍ଚତ୍ୟାଇଥିବା ୩ ମୟୂରକୁ ଅସୁସ୍ଥ ଅବସ୍ଥାରେ ଦେଖି କାହ୍ନୁଙ୍କ ଜେଜେ ବାପା ପାଣୁ ବେହେରା ଖାଇବାକୁ ଦେଇ ସୁସ୍ଥ କରିଥିଲେ। ଏପରିକି ସେମାନଙ୍କୁ ସେହିସ୍ଥାନରେ ପ୍ରତିଦିନ ଖାଦ୍ୟ ଦେଇ ଚାଲିଥିଲେ। କ୍ରମଶଃ ମୟୂରଙ୍କ ସଂଖ୍ୟା ବଢିଥିଲା। ଇତିମଧ୍ୟରେ ପାଣୁ ଅସୁସ୍ଥ ହୋଇପଡିବାରୁ ସେ ମୟୂରଙ୍କୁ ଖାଦ୍ୟ ଦେବା ଓ ଦେଖାଶୁଣା କରିବାର ଗୁରୁଦାୟିତ୍ୱ ସମ୍ଭାଳବାକୁ ନାତି କାହ୍ନୁଙ୍କୁ ବାଛିଥିଲେ। କିନ୍ତୁ ପାଠ ପଢ଼ୁଥିବାରୁ କାହ୍ନୁ ପ୍ରଥମେ ମନା କରିଦେଇଥିଲେ। ଜେଜେ ବାଧ୍ୟ କରିବାରୁ ଥରେ ଦେଖିବାକୁ ଯାଇ ମୟୂରଙ୍କ ପ୍ରେମରେ ପଡିଯାଇଥିଲେ କାହ୍ନୁ। ୨୦୧୭ ମେ ୨୬ରେ ଜେଜେଙ୍କ ମୃତ୍ୟୁ ପରେ କାହ୍ନୁ ୬୭ଟି ମୟୂରଙ୍କୁ ଦୈନିକ ଖାଦ୍ୟ ଦେବା ଆରମ୍ଭ କରିଥିଲେ। ସେତେବେଳେ ଏଥିପାଇଁ ସେ କଲେଜ ବହି ବିକ୍ରି କରିଦେଇଥିଲେ। ଏବେ ମୟୂରଙ୍କ ସଂଖ୍ୟା ୧୩୦ ଟପିଥିଲେ ମଧ୍ୟ କାହ୍ନୁ ସେମାନଙ୍କ ଯତ୍ନ ନେବାକୁ ହେଳା କରିନାହାନ୍ତି।
