ନୂଆଦିଲ୍ଲୀ,୨୭ା୩(ପି.ଟି.): କରୋନା ଭୂତାଣୁ ସଂକ୍ରମଣ ରୋକିବା ଲାଗି ସରକାର ୨୧ ଦିନିଆ ଲକ୍ଡାଉନ ଘୋଷଣା କରିଥିବାରୁ ଏହା ଅର୍ଥନୀତିକୁ ଗୁରୁତର ପ୍ରଭାବିତ କରିଛି। ଏହି ପ୍ରଭାବକୁ ହ୍ରାସ କରିବା ଲାଗି ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ଗଭର୍ଣ୍ଣର ଶକ୍ତିକାନ୍ତ ଦାସ ଶୁକ୍ରବାର ରେପୋ ରେଟ୍ ୭୫ ବେସିସ୍ ପଏଣ୍ଟ ହ୍ରାସ କରିଛନ୍ତି। ଏଥିସହିତ ସମସ୍ତ ରାଷ୍ଟ୍ରାୟତ୍ତ ଓ ଘରୋଇ ବ୍ୟାଙ୍କ, ଅଣବ୍ୟାଙ୍କିଙ୍ଗ ଆର୍ଥତ୍କ ଅନୁଷ୍ଠାନ (ଏନ୍ବିଏଫ୍ସି)କୁ ୩ ମାସ ପାଇଁ ଋଣ କିସ୍ତି ଆଦାୟ ବନ୍ଦ ରଖିବାକୁ ଆର୍ବିଆଇ ଅନୁମତି ଦେଇଛି। ମଧ୍ୟବିତ୍ତ ଶ୍ରେଣୀ ଓ କ୍ଷୁଦ୍ର ଉଦ୍ୟୋଗଗୁଡ଼ିକ ପକ୍ଷରୁ ଏଥିପାଇଁ ଦାବି ହୋଇଆସୁଥିଲା।
ଗୁରୁବାର କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରାମନ ଲକ୍ଡାଉନ ଜନିତ ପ୍ରଭାବରୁ ସାଧାରଣ ଜନତାଙ୍କୁ ମୁକୁଳାଇବା ଲାଗି ୧ ଲକ୍ଷ ୭୦ ହଜାର କୋଟି ଟଙ୍କାର ସହାୟତା ପ୍ୟାକେଜ ଘୋଷଣା କରିଥିଲେ। ବର୍ତ୍ତମାନ ରେପୋ ରେଟ୍ ୫.୧୫ ପ୍ରତିଶତ ଥିବାବେଳେ ଏହାକୁ ୪.୪ ପ୍ରତିଶତକୁ କମାଇ ଦିଆଯାଇଛି। ଫଳରେ ଋଣ ଉପରେ ସୁଧହାର କମ୍ ରହିବ। ସେହିପରି ରିଭର୍ସ ରେପୋ ରେଟ ୯୦ ବେସିସ୍ ପଏଣ୍ଟ ହ୍ରାସ ପାଇ ୪ ପ୍ରତିଶତ ରହିଛି। ମୁଦ୍ରାନୀତି କମିଟି ବୈଠକ ମାର୍ଚ୍ଚ ୩୧ରୁ ଏପ୍ରିଲ ୩ ମଧ୍ୟରେ ବସିବାକୁ ଥିବାବେଳେ ତାହାକୁ ଆଗୁଆ ଭାବେ କାରାଯାଇଥିଲା। ବୈଠକରେ ରେପୋ ରେଟ ହ୍ରାସ ସପକ୍ଷରେ ୪:୨ ସଂଖ୍ୟାଗରିଷ୍ଠତାରେ ଭୋଟ ମିଳିଥିଲା। ସେହିପରି ସମସ୍ତ ବ୍ୟାଙ୍କର କ୍ୟାସ୍ ରିଜର୍ଭ ରେସିଓ (ସିଆର୍ଆର୍)କୁ ୧୦୦ ବେସିସ୍ ପଏଣ୍ଟ ହ୍ରାସ କରାଯାଇ ୩ ପ୍ରତିଶତ ରଖାଯାଇଛି।
