ଝାରସୁଗୁଡା ଅଫିସ,୧୪ା୪: ଝାରସୁଗୁଡା ଜିଲା ପ୍ରଶାସନ ପକ୍ଷରୁ ଝାରସୁଗୁଡା ବ୍ଲକ, ବ୍ରଜରାଜନଗର ମ୍ୟୁନିସିପାଲଟି ଓ ଲଇକେରା ବ୍ଲକକୁ ରେଡ୍ଜୋନ୍ ଭାବେ ଘୋଷଣା କରାଯାଇଥିଲା। ଉପରୋକ୍ତ ଅଞ୍ଚଳକୁ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ଅଞ୍ଚଳରୁ ଟ୍ରେନ୍ ଓ ବସ୍ ଯୋଗେ ଲୋକେ ଆସିଥିବା ରିପୋର୍ଟରୁ ଜଣାପଡିଥିଲା। ଏଣୁ ଉପରୋକ୍ତ ନିଷ୍ପତ୍ତି ନିଆଯାଇ ଏହି ଅଞ୍ଚଳ ଗୁଡିକରେ ଜିଲା ପ୍ରଶାସନ ପକ୍ଷରୁ ସ୍ଥାନୀୟ ଅଞ୍ଚଳର ସ୍ବାସ୍ଥ୍ୟକର୍ମୀ, ଅଙ୍ଗନଓ୍ବାଡି କର୍ମୀ ଓ ଆଶାକର୍ମୀମାନଙ୍କୁ ନିୟୋଜିତ କରି ଗତ ବୁଧବାରଠାରୁ ମାସ୍ ସ୍କ୍ରିନିଂ ପ୍ରକ୍ରିୟା ଆରମ୍ଭ କରାଯାଇଥିଲା। ମଙ୍ଗଳବାର ଜିଲା ପ୍ରଶାସନ ପକ୍ଷରୁ ମିଳିଥିବା ତଥ୍ୟ ମୁତାବକ ସୋମବାର ସୁଦ୍ଧା ବ୍ରଜରାଜନଗର ମ୍ୟୁନିସିପାଲଟି, ଲଇକେରା ବ୍ଲକ ଓ ଝାରସୁଗୁଡା ବ୍ଲକ ଅଞ୍ଚଳରେ ରହୁଥିବା ୫୨ ହଜାର ୩୯ ପରିବାରକୁ ମାସ ସ୍କ୍ରିନିଂ କରାଯାଇ ସାରିଛି। ଏହି ମାସ୍ ସ୍କ୍ରିନିଂ ବେଳେ ଉପରୋକ୍ତ ପରିବାରର ୧୬୫ ଜଣଙ୍କୁ ଜ୍ୱର, ୫୫୧ ଜଣଙ୍କୁ କାଶ, ୩୦୪ଙ୍କୁ ନାକରୁ ପାଣି ବେହିବା, ୪୦ ଜଣଙ୍କୁ ଗଳା ଜନିତ ସମସ୍ୟା ଓ ୨ ଜଣଙ୍କୁ ଶ୍ୱାଶକ୍ରିୟା ଜନିତ ସମସ୍ୟା ଥିବା ଜଣାପଡିଛି। ଉପରୋକ୍ତ ଲୋକଙ୍କ ସ୍ବାସ୍ଥ୍ୟାବସ୍ଥା ଉପରେ ନଜର ରଖିବାକୁ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର କର୍ତ୍ତପକ୍ଷଙ୍କୁ ନିର୍ଦ୍ଦେଶ ଦିଆଯାଇଛି। ଏବଂ ସ୍ବାଶକ୍ରିୟା ଜନିତ ସମସ୍ୟା ଥିବା ୨ ଜଣ ବ୍ୟକ୍ତିଙ୍କ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଛି। ଏହାସହ ଉପରୋକ୍ତ ସମସ୍ତ ବ୍ୟକ୍ତିଙ୍କୁ ନିଜ ନିଜ ଘରେ ଆଇସୋଲେଶନରେ ରହିବାକୁ ପରାମର୍ଶ ଦିଆଯାଇଛି। ସେହିପରି ଝାରସୁଗୁଡା ଓ ବେଲପାହାଡ ମ୍ୟୁନିସିପାଲଟି ଅଞ୍ଚଳରେ ଆସନ୍ତା ୧୬ ତାରିଖରୁ ପ୍ରାଥମିକ ସ୍କ୍ରିନିଂ ଆରମ୍ଭ କରାଯିବା ନେଇ ଜିଲା ପ୍ରଶାସନ ନିଷ୍ପତ୍ତି ନେଇଛି।
