ନୂଆଦିଲ୍ଲୀ, ୨୩ା୪ (ପି.ଟି.)-ରେକର୍ଡ ଦୃଷ୍ଟିିରୁ ମହେନ୍ଦ୍ର ସିଂ ଧୋନୀ ମହାନ୍ ହୋଇଥାଇ ପାରନ୍ତି କିନ୍ତୁ ମୋ ପାଇଁ ଅନିଲ କୁମ୍ବଲେ ଶ୍ରେଷ୍ଠ ଅଧିନାୟକ ବୋଲି କହିଛନ୍ତି ଭାରତର ପୂର୍ବତନ ବ୍ୟାଟ୍ସମ୍ୟାନ ଗୌତମ ଗମ୍ଭୀର। ଭାରତ ଅଧିନାୟକ ଭାବେ ମୋର ଧୋନୀ ଏବଂ ସୌରଭ ଗାଙ୍ଗୁଲିଙ୍କ ପ୍ରତି ଯଥେଷ୍ଟ ସମ୍ମାନ ରହିଛି। ମାତ୍ର ଜାତୀୟ ଦଳକୁ ଦୀର୍ଘ ଦିନ ଧରି ନେତୃତ୍ୱ ଦେବାର ସାମର୍ଥ୍ୟ କୁମ୍ବଲେଙ୍କ ନିକଟରେ ରହିଥିଲା। ରେକର୍ଡ ଦୃଷ୍ଟିରୁ ଧୋନୀ ବହୁତ ଆଗରେ। ଆଇସିସିର ପ୍ରତ୍ୟେ ଟ୍ରଫି ସେ ଜିତିଛନ୍ତି। ତାଙ୍କ ଖେଳ ମଧ୍ୟ ଉଚ୍ଚ କୋଟୀର। ଚାପକୁ ହାତେଇବାରେ ସେ ଧୁରନ୍ଧର। ଗାଙ୍ଗୁଲିଙ୍କ ପ୍ରଦର୍ଶନ ମଧ୍ୟ ଖୁବ୍ ଭଲ ରହିଛି। କିନ୍ତୁ ଯେତେଜଣ ଅଧିନାୟକଙ୍କ ଅଧୀନରେ ଖେଳାଳି ସେମାନଙ୍କ ମଧ୍ୟରେ କୁମ୍ବଲେଙ୍କୁ ମୁଁ ଶ୍ରେଷ୍ଠ କହିବି। ତାଙ୍କ ଅଧୀନରେ ମୁଁ ୬ଟି ଟେଷ୍ଟ ମ୍ୟାଚ ଖେଳିଛି। ତାଙ୍କୁ ଯଦି ଅଧିକ ଦିନ ଧରି ଭାରତର ଅଧିନାୟକ କରାଯାଇଥାନ୍ତା ତେବେ ହୁଏତ ସେ ଅନେକ ରେକର୍ଡ ଭଙ୍ଗ କରିପାରିଥାନ୍ତେ। ଆଇପିଏଲ୍ର ୧୨ତମ ବାର୍ଷିକୀ ପାଳନ ଅବସରରେ ଷ୍ଟାର ସ୍ପୋଟର୍ସ ଦ୍ୱାରା ଆୟୋଜିତ ‘କ୍ରିକେଟ କନେକ୍ଟେଡ୍’ ଶୀର୍ଷକ କାର୍ଯ୍ୟକ୍ରମରେ ଯୋଗଦାନ ପୂର୍ବକ ସେ ଏହା ପ୍ରକାଶ କରିଛନ୍ତି। ଗମ୍ଭୀର ବର୍ତ୍ତମାନ ଭାଜପାର ଜଣେ ଏମ୍ପି ଅଛନ୍ତି। ରାହୁଲ ଡ୍ରାଭିଡଙ୍କ ପରେ କୁମ୍ବଲେ ୨୦୦୭ରେ ଭାରତର ଅଧିନାୟକ ଭାବେ ନିଯୁକ୍ତି ପାଇଥିଲେ। ତାଙ୍କ ନେତୃତ୍ୱରେ ଭାରତର ୧୪ଟି ଟେଷ୍ଟ ମ୍ୟାଚ ଖେଳିଥିଲା। ତନ୍ମଧ୍ୟରୁ ସେ ତିନୋଟିରେ ବିଜୟ ଲାଭ କରିଥିବାବେଳେ ୫ଟି ଡ୍ର ରଖିବାରେ ସମର୍ଥ ହୋଇଥିଲେ। ୬ଟି ମ୍ୟାଚରେ ପରାଜୟବରଣ କରିଥିଲେ। କିନ୍ତୁ ସେ ବର୍ଷେ ନ ପୁରୁଣୁ ଅର୍ଥାତ୍ ୨୦୦୮ ନଭେମ୍ବରରେ ଅବସର ନେଇଯାଇଥିଲେ। ପରେ ଧୋନୀ ସମସ୍ତ ତିନୋଟି ଫର୍ମାଟ ପାଇଁ ଅଧିନାୟକ ଭାବେ ନିଯୁକ୍ତି ହୋଇଥିଲେ। ଗମ୍ଭୀରଙ୍କ ହିସାବରେ ରୋହିତ ଶର୍ମା ଆଇପିଏଲ୍ର ସର୍ବକାଳୀନ ଶ୍ରେଷ୍ଠ ଅଧିନାୟକ। ମୁମ୍ବାଇ ଇଣ୍ଡିଆନ୍ସ ତରଫରୁ ସେ ୪ଥର ଟାଇଟଲ ଜିତି ସାରିଛନ୍ତି। ଏହି ସଂଖ୍ୟା ୬ କିମ୍ବା ୭ରେ ସେ ପହଞ୍ଚାଇ ଦେଇପାରନ୍ତି ବୋଲି ମୁଁ ଭାବୁଛି।
