ଅଭିନେତ୍ରୀ କଙ୍ଗନା ରାଣାୱତ ପୁଣିଥରେ ଚର୍ଚ୍ଚାରେ ଅଛନ୍ତି। ନିକଟରେ କଙ୍ଗନା ଏବଂ ରାହୁଲ ଗାନ୍ଧୀଙ୍କ ସମ୍ପର୍କରେ ଏକ ରିପୋର୍ଟ ଭାଇରାଲ ହୋଇଛି। ଏହି ରିପୋର୍ଟ ପଢିବା ପରେ କଙ୍ଗନା ରାଗରେ ନିଆଁବାଣ ହୋଇଛନ୍ତି। ଏହି ଖବରକୁ ସମ୍ପୂର୍ଣ୍ଣ ଗୁଜବ ବୋଲି କହି ଖାରଜ କରିଛନ୍ତି।
ରିପୋର୍ଟରେ କୁହାଯାଇଥିଲା, ଯଦି ରାହୁଲ ଗାନ୍ଧୀ ଭାଜପାରେ ଯୋଗ ଦିଅନ୍ତି, ତେବେ କଙ୍ଗନା ତାଙ୍କୁ ବିବାହ କରିବାକୁ ପ୍ରସ୍ତୁତ। ଏହି ରିପୋର୍ଟ ପଢି କଙ୍ଗନା ରାଗିବା ସହ ଏହାକୁ ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି।
କଙ୍ଗନା କହିଛନ୍ତି, ଏହି ମିଥ୍ୟା ଖବର କେତେ ଲଜ୍ଜାଜନକ! ରାଜନୀତିରେ ମଧ୍ୟ ମହିଳାଙ୍କ ପାଇଁ କୌଣସି ମର୍ଯ୍ୟାଦା ନାହିଁ। ଏପରି ମିଥ୍ୟା ଖବର ପ୍ରଚାର କରୁଥିବା ଲୋକଙ୍କୁ ଲଜ୍ଜା ଲାଗିବା କଥା।
କଙ୍ଗନା କେବଳ ଜଣେ ଲୋକପ୍ରିୟ ଅଭିନେତ୍ରୀ ନୁହଁନ୍ତି ବରଂ ଏବେ ରାଜନୀତିରେ ମଧ୍ୟ ସକ୍ରିୟ ଅଛନ୍ତି। ସେ ମାଣ୍ଡିରୁ ଭାଜପା ଏମପି ଭାବରେ କାର୍ଯ୍ୟ କରନ୍ତି। ସେ ତାଙ୍କର ସ୍ପଷ୍ଟବାଦୀ ବୟାନ ପାଇଁ ପ୍ରାୟତଃ ଆଲୋଚନାରେ ରହିଥାନ୍ତି।
ସେ ଶେଷ ଥର ପାଇଁ ୨୦୨୫ ମସିହାରେ ଏମରଜେନ୍ସି ଚଳଚ୍ଚିତ୍ରରେ ନଜର ଆସିଥିଲେ। କଙ୍ଗନା ନିଜେ ଏହି ଚଳଚ୍ଚିତ୍ରର ନିର୍ଦ୍ଦେଶନା ଏବଂ ପ୍ରଯୋଜନା କରିଥିଲେ। ଏଥିରେ ସେ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ଭୂମିକାରେ ଅଭିନୟ କରିଥିଲେ। ଚଳଚ୍ଚିତ୍ରଟି ବକ୍ସ ଅଫିସରେ ଭଲ ପ୍ରଦର୍ଶନ କରି ନ ଥିଲା; ତଥାପି, କଙ୍ଗନାଙ୍କ ଅଭିନୟକୁ ପ୍ରଶଂସା ମିଳିଥିଲା।
Dharitri – Odisha’s No.1 Odia Daily
