ଡେରାବିଶ,୨୫।୧୧(ସ୍ବ.ପ୍ର.): ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ନିର୍ମାଣାଧୀନ ଚାନ୍ଦୋଳ ବସ୍ଷ୍ଟପ୍ ଠାରୁ ଦାନପୁର ପର୍ଯ୍ୟନ୍ତ ୧୨ ନଂ କେନାଲ୍ ବନ୍ଧର ମୁକୁନ୍ଦପୁର ଗ୍ରାମ ନିକଟରେ ଏକ ବିଦ୍ୟୁତ୍ ଟ୍ରାନ୍ସଫର୍ମର ରାସ୍ତା ମଝିରେ ରହିଛି। ଏଥିଯୋଗୁ ବିପଦ ଆଶଙ୍କା ରହିଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଲାଗି ରହିଛି।
ପ୍ରକାଶ ଯେ, ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଚାନ୍ଦୋଳ ବସ୍ଷ୍ଟପ୍ ଠାରୁ ଦାନପୁର ପର୍ଯ୍ୟନ୍ତ ୨.୫ କି.ମି. ରାସ୍ତା କାମ ଚାଲିଛି। ଏଥିପାଇଁ ୧ କୋଟି ୩୨ ଲକ୍ଷ ୭୪ ହଜାର ୧୪୫ ଟଙ୍କା ବ୍ୟୟ ଅଟକଳ କରାଯାଇଛି। ଏହି ନିର୍ମାଣାଧୀନ ରାସ୍ତାର ଚାନ୍ଦୋଳ ବସ୍ଷ୍ଟପ୍ ଠାରୁ ୧ କିଲୋମିଟର ଦୂରରେ ପୂର୍ବରୁ ରାସ୍ତା କଡରେ ଏକ ବିଦ୍ୟୁତ୍ ଟ୍ରାନ୍ସଫର୍ମର ରହିଛି। ରାସ୍ତା ପ୍ରଶସ୍ତୀକରଣ ପୂର୍ବରୁ ଏହି ଟ୍ରାନ୍ସଫର୍ମର ରାସ୍ତା କଡରେ ଯଥେଷ୍ଟ ନିରାପଦ ଦୂରତାରେ ରହିଥିଲା। ଏବେ ରାସ୍ତା ପ୍ରଶସ୍ତୀକରଣ ଫଳରେ ଏହି ଟ୍ରାନ୍ସଫର୍ମର ରାସ୍ତା ମଝିରେ ରହିଯାଉଛି। ଏହି ସ୍ଥାନ ନିକଟରେ ଠିକାଦାର ଜଣକ ରାସ୍ତା କାର୍ଯ୍ୟ ଅଧାପନ୍ତରିଆ ଭାବେ ରଖିଥିବା ବେଳେ ଉକ୍ତ ଟ୍ରାନ୍ସଫର୍ମର ବିପଦସଙ୍କୁଳ ଅବସ୍ଥାରେ ରହିଛି। ଏହାକୁ ସ୍ଥାନାନ୍ତରିତ କରା ନ ଗଲେ ରାସ୍ତା କାର୍ଯ୍ୟ ନିର୍ମାଣ ହୋଇ ପାରିବ ନାହିଁ। କିନ୍ତୁ ଏହା ଯେଉଁଭଳି ଅବସ୍ଥାରେ ରହିଛି ଜନସାଧାରଣଙ୍କ ଠାରୁ ଆରମ୍ଭ କରି ପଶୁମାନଙ୍କ ଜୀବନ ପ୍ରତି ବିପଦ ରହିଛି। ଏପରି କି ଏକ ଚାରିଚକିଆ ଗାଡି ଯଦି ଅସାବଧାନତା ବଶତଃ କଡକୁ ପଳାଇଯାଏ, ତେବେ ଉଚ୍ଚକ୍ଷମତା ସମ୍ପନ୍ନ ବିଦ୍ୟୁତ୍ ସଂସ୍ଫର୍ଶର ଆସି ଅଘଟଣ ଘଟିବ। ଏହାଛଡା ଦୁଇଚକିଆ ଓ ସାଇକେଲ୍ ଆରୋହୀ ମଧ୍ୟ ଟିକେ ଅସାବଧାନ ହେଲେ ବିପଦ ଆଶଙ୍କାକୁ ଏଡାଇ ଦିଆଯାଇ ନ ପାରେ। ଏ ସମ୍ପର୍କରେ ଦାନପୁର ବିଦ୍ୟୁତ୍ ସେକ୍ସନ୍ର ଯନ୍ତ୍ରୀ ବସନ୍ତ ପତିଙ୍କୁ ପଚାରିବାରୁ ସେ କହିଲେ ଗ୍ରାମ୍ୟ ଉନ୍ନୟନ ବିଭାଗକୁ ରାସ୍ତା ନିର୍ମାଣ ପୂର୍ବରୁ ଚିଠି କରାଯାଇଥିଲା। ଏହି ଟ୍ରାନ୍ସଫର୍ମର ସ୍ଥାନାନ୍ତରିତ ହେବା ପାଇଁ ବ୍ୟୟ ଅଟକଳର ହିସାବ ବିଭାଗର ଉପରିସ୍ଥ ଅଧିକାରୀଙ୍କୁ ପ୍ରଦାନ କରାଯାଇଛି। ଗ୍ରାମ୍ୟ ଉନ୍ନୟନ ବିଭାଗ ଆମ ବିଭାଗ ନିକଟରେ ଟଙ୍କା ଦାଖଲ କଲେ ଏହି ଟ୍ରାନ୍ସଫର୍ମରକୁ ସ୍ଥାନାନ୍ତରିତ କରାଯିବ। ଏ ସମ୍ପର୍କେରେ ଗ୍ରାମ୍ୟ ଉନ୍ନୟନ ବିଭାଗ ଯନ୍ତ୍ରୀ ଅର୍ଜ୍ଜୁନି ସାହୁଙ୍କୁ ପଚାରିବାରୁ ବିଭାଗୀୟ ସ୍ତରରେ ଏହି ଟ୍ରାନ୍ସଫର୍ମରକୁ ସ୍ଥାନାନ୍ତରିତ କରିବା ପାଇଁ ବ୍ୟୟ ଅଟକଳ କରାଯାଇନାହିଁ। ବିଦ୍ୟୁତ୍ ବିଭାଗ ତାର ନିଜ ଖର୍ଚ୍ଚରେ କରିବ ବୋଲି କହିଥିଲେ। ସାଧାରଣତଃ ରାସ୍ତା ସମ୍ପ୍ରସାରଣ ଓ ଉନ୍ନତୀକରଣ ପୂର୍ବରୁ ବିଭାଗ ତରଫରୁ ରାସ୍ତାର ଲମ୍ବ ,ଚଉଡ଼ା, ରାସ୍ତାର ସ୍ଥିତି, ରାସ୍ତାରେ ଥିବା ନାଳ, ବିଦ୍ୟୁତ୍ ଖୁଣ୍ଟ ଇତ୍ୟାଦି ସମ୍ପର୍କରେ ବିସ୍ତୃତ ଭାବେ ସର୍ଭେ କରାଯାଇ ଆବଶ୍ୟକ ସ୍ଥଳେ ପୋଲ ନିର୍ମାଣ, ବିଦ୍ୟୁତ୍ ଖୁଣ୍ଟ ସ୍ଥାନାନ୍ତର ଖର୍ଚ୍ଚର ହିସାବ କରାଯାଇ ଏଷ୍ଟିମେଟ୍ ପ୍ରସ୍ତୁତ କରାଯାଇଥାଏ। ପରେ ଏହାକୁ ଟେଣ୍ଡର ପ୍ରକ୍ରିୟାକୁ ନିଆଯାଇଥାଏ। ତେବେ ବିଭାଗ ଏହି ରାସ୍ତା ନିର୍ମାଣ ପୂର୍ବରୁ ଏସବୁ ନ ଦେଖି କେମିତି ଟେଣ୍ଡର ପ୍ରକ୍ରିୟା କଲେ ଓ କାର୍ଯ୍ୟ ଆରମ୍ଭ କଲେ ତାହା ପ୍ରଶ୍ନବାଚୀ ସୃଷ୍ଟି କରିଛି। ଅପରପକ୍ଷରେ ଗତ ମେ ମାସ ସୁଦ୍ଧା ଏହି ରାସ୍ତା କାର୍ଯ୍ୟ ଶେଷ କରିବାକୁ ସମୟ ଧାର୍ଯ୍ୟ ହୋଇଥିବା ବେଳେ ଏ ପର୍ଯ୍ୟନ୍ତ ଶେଷ ହୋଇନାହିଁ। ଯଦି ଏହି ଟ୍ରାନଫର୍ମର ତୁରନ୍ତ ସ୍ଥାନାନ୍ତର କରା ନ ଯାଏ ତେବେ କୌଣସି ଅଘଟଣ ଘଟିଲେ ଗ୍ରାମ୍ୟ ଉନ୍ନୟନ ବିଭାଗ ଦାୟୀ ରହିବ ବୋଲି ଗ୍ରାମବାସୀ ଚେତାଇ ଦେଇଛନ୍ତି।
