ଅନୁଗୋଳ ଅଫିସ, ୧୬।୧୧ – ଅନୁଗୋଳ ବ୍ଲକ ବନ୍ତଳା ଥାନା ଗୁରଙ୍ଗ ଗ୍ରାମର ତ୍ରିପୁର ନାଏକ(୧୯)ଙ୍କ ମୃତଦେହ ଗତ ୮ ତାରିଖରେ ସାକସିଂହା-ଘୁଞ୍ଚାପାଳ ରାସ୍ତା ପାର୍ଶ୍ୱରୁ ଉଦ୍ଧାର ଘଟଣା ଏକ ହତ୍ୟାକାଣ୍ଡ। ଖୁଡୀଙ୍କ ସହ ସମ୍ପର୍କ ରକ୍ଷା କାରଣରୁ ଦାଦା ନବ ଓରଫ ନବୀନା ନାଏକ(୩୧) ଓ ଘୁଞ୍ଚାପାଳ ଗ୍ରାମର ପିଉସା କ୍ଷେତୁ ଓରଫ କ୍ଷେତ୍ରବାସୀ ନାଏକ(୩୫) ତ୍ରିପୁରଙ୍କୁ ହତ୍ୟା କରିଥିବା ଶୁକ୍ରବାର ଅନୁଗୋଳ ପୋଲିସ ପ୍ରକାଶ କରିଛି। ମାମଲା ନଂ. ୯୩୫/୧୯ରେ ଉଭୟଙ୍କୁ ଅପରାହ୍ନରେ କୋର୍ଟଚାଲାଣ କରାଯାଇଛି ବୋଲି ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସୂଚନା ଦେଇଛନ୍ତି।
ଥାନା ଅଧିକାରୀ କହିଛନ୍ତି, ଗତ ୮ ତାରିଖରେ ତ୍ରିପୁରଙ୍କ ମୃତଦେହ ମିଳିବା ପରେ ତାଙ୍କ ବାପା ତ୍ରିଲୋଚନ ନାଏକ ଥାନାରେ ହତ୍ୟା ଅଭିଯୋଗ କରିଥିଲେ। ଏପରି କି ତାଙ୍କ ଭାଇ ତଥା ତ୍ରିପୁରଙ୍କ ଦାଦା ନବଙ୍କ ଉପରେ ସନ୍ଦେହ ବ୍ୟକ୍ତ କରିଥିଲେ। ଫଳରେ ଘଟଣାର ତଦନ୍ତ କରୁଥିବା ଏସ୍ଆଇ ପ୍ରକାଶ ଚନ୍ଦ୍ର ମାଝି ନବଙ୍କୁ ଥାନାକୁ ଆଣି ମାରାଥନ ଜେରା କରିଥିଲେ। ଏହି ସମୟରେ ପୁତୁରାଙ୍କୁ ସେ ଓ କ୍ଷେତୁ ମିଶି ହତ୍ୟା କରିଥିବା ନବ ସ୍ବୀକାର କରିଥିଲେ। ନବ ୮ ବର୍ଷ ପୂର୍ବରୁ ବିବାହ କରିଥିଲେ। ଦ୍ୱିତୀୟ ସନ୍ତାନ ପ୍ରସବ ବେଳେ ପ୍ରଥମ ସ୍ତ୍ରୀଙ୍କ ମୃତ୍ୟୁ ହୋଇଥିଲା। ଏହାର ୪ ବର୍ଷ ପରେ ଅର୍ଥାତ ଗତ ୬ ମାସ ପୂର୍ବରୁ ନବ ତାଙ୍କ ଶାଳୀଙ୍କୁ ବିବାହ କରିଥିଲେ। କିଛିଦିନ ରାଜ୍ୟ ବାହାରେ ରଖିବା ପରେ ନବ ସ୍ତ୍ରୀଙ୍କୁ ଘରେ ଛାଡ଼ିଥିଲେ। ଏହି ସମୟରେ ପୁତୁରା ତ୍ରିପୁର ତାଙ୍କ ସ୍ତ୍ରୀଙ୍କ ସହ ଅନୈତିକ ସମ୍ପର୍କ ରଖିଥିଲେ। ଏଥିରୁ ନିବୃତ୍ତ ରହିବାକୁ ବାରମ୍ବାର କହିବା ପରେ ବି ପୁତୁରା ନ ମାନିବାରୁ ଶେଷରେ ନବ ତାଙ୍କୁ ରାସ୍ତାରୁ ହଟାଇଦେବାକୁ କ୍ଷେତୁଙ୍କ ସହଯୋଗ ନେଇଥିଲେ। ଗତ ୪ ତାରିଖରେ ତ୍ରିପୁର ଗାଡ଼ିରେ ଡିକି ଲଗାଇବା ପାଇଁ ଅନୁଗୋଳ ଆସିଥିବା ବେଳେ ନବ ତାଙ୍କୁ ବୁଝାଇବା ଆଳରେ ଡାକିନେଇଥିଲେ। ଅନୁଗୋଳ ବସ୍ଷ୍ଟାଣ୍ଡରେ ଥିବା ମଦ ଦୋକାନରୁ ମଦ କିଣିବା ପରେ ଉଭୟ ରାଣୀଗୋଡ଼ା ଦେଇ କୁରୁଡ଼ୁଲୁ ରେଲୱେ ଓଭରବ୍ରିଜ ତଳେ ବାହାରିଥିଲେ। ସେଠାରେ କ୍ଷେତୁ ସେମାନଙ୍କ ଗାଡ଼ିରେ ବସି ସାକସିଂହା-ଘୁଞ୍ଚାପାଳ ଯାଇଥିଲେ। ସେଠାରେ ୩ ଜଣ ବସି ମଦ ପିଇ ସାରିବା ପରେ ଦାଦା ଓ ପିଉସା ତ୍ରିପୁରଙ୍କୁ ବୁଝାଶୁଝା କରିଥିଲେ। କିନ୍ତୁ ତ୍ରିପୁର କଥା ନ ଶୁଣିବାରୁ ଶେଷରେ ତାଙ୍କୁ ହତ୍ୟା କରି ବୁଦା ମୂଳେ ପକାଇ ଦୁହେଁ ପଳାଇ ଆସିଥିଲେ। ତ୍ରିପୁରଙ୍କ ବାଇକ୍ ସେମାନେ ଅନୁଗୋଳ ବସ୍ଷ୍ଟାଣ୍ଡରେ ରଖିଦେଇଥିଲେ ବୋଲି ପୋଲିସ ପ୍ରକାଶ କରିଛି। ଏସ୍ଆଇ ଅରକ୍ଷିତ ସେଠୀ, ବିପ୍ଳବ ସାହୁ ଓ ଅନ୍ୟମାନେ ଏସ୍ଆଇ ମାଝିଙ୍କୁ ତଦନ୍ତରେ ସହଯୋଗ କରିଥିଲେ।
