ଆରଡ଼ି, ୧୧।୮ (ଡି.ଏନ.ଏ.)-ଭଦ୍ରକ ଜିଲାର ପ୍ରସିଦ୍ଧ ଶୈବପୀଠ ଆରଡ଼ି ନିକଟ କୁଳେଇପଦାସ୍ଥିତ ୨୦ ନମ୍ବର ଜାତୀୟ ରାଜପଥରେ ବିପଦ ଜଗି ବସିଛି। ଏହି ରାସ୍ତାରେ ବିଦ୍ୟୁତ୍ ବିଭାଗ ପକ୍ଷରୁ ଏ.ବି. ସୁଇଚ୍ ଲଗାଯାଇଛି। ଶୈବପୀଠ ବ୍ୟତୀତ ଆରଡ଼ି, ନାନ୍ଦପୁର ପଞ୍ଚାୟତର ପ୍ରାୟ ୧୫ ଖଣ୍ଡ ଗଁାରେ ବିଦ୍ୟୁତ୍ ବିଭ୍ରାଟ ଘଟିଲେ ଏଠାରେ ଥିବା ସୁଇଚ୍ କଟାଯାଇ ସମସ୍ୟାର ସମାଧାନ ପାଇଁ ଉଦ୍ୟମ କରାଯାଏ। ଜାତୀୟ ରାଜପଥର ଗୋଟିଏ ପାର୍ଶ୍ୱରେ ଏହି ସୁଇଚ ଲଗାଯାଇଛି। ରାସ୍ତାର ଅନ୍ୟ ପାର୍ଶ୍ୱରେ ଥିବା ବିଦ୍ୟୁତ୍ ଖୁଣ୍ଟ ସହ ୧୧ କେ.ଭି. ତାର ସଂଯୋଗ କରାଯାଇଛି। ରୋଡ କ୍ରସିଂ ନିୟମ ଅନୁଯାୟୀ ହୋଇ ନ ଥିବା କୁହାଯାଉଛି। ନିୟମାନୁସାରେ ରାସ୍ତାର ଗୋଟିଏ ପାର୍ଶ୍ୱରୁ ଅନ୍ୟ ପାର୍ଶ୍ୱକୁ ତାର ଟଣାଗଲେ ଦୁଇପାର୍ଶ୍ୱରେ ସାଧାରଣ ବିଦ୍ୟୁତ୍ ଖୁଣ୍ଟଠାରୁ ଅଧିକ ଉଚ୍ଚର ଖୁଣ୍ଟ ପୋତାଯିବ। ଏହାଛଡ଼ା ସେହି ରୋଡ କ୍ରସିଂ ସ୍ଥାନରେ ଟଣାଯାଇଥିବା ବିଦ୍ୟୁତ୍ ତାର ତଳେ ଜାଲି ବନ୍ଧାଯିବା କଥା। କୌଣସି ସମୟରେ ଏଠାରେ ୧୧ କେ.ଭି. ତାର ଛିଡ଼ିଗଲେ ବନ୍ଧାଯାଇଥିବା ଜାଲି ଦ୍ୱାରା ବିପଦକୁ ଏଡ଼ାଇ ଦିଆଯାଇ ପାରନ୍ତା। ସମସ୍ତ ନିୟମ ସତ୍ତ୍ୱେ ବିଦ୍ୟୁତ୍ ବିଭାଗ ଅଧିକାରୀଙ୍କ ଖାମଖିଆଲି ମନୋବୃତ୍ତି ଯୋଗୁ ଏହି ସ୍ଥାନରେ କୌଣସି ପ୍ରତିକାର ବ୍ୟବସ୍ଥା କରାଯାଉ ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ଉଲ୍ଲେଖନୀୟ ଯେ, ଉକ୍ତ ସ୍ଥାନରେ ଟଣାଯାଇଥିବା ତାର ତଳେ ଦେଇ ଶହ ଶହ ଗାଡ଼ି ବାବା ଆଖଣ୍ଡଳମଣିଙ୍କ ପୀଠକୁ ଯାତାୟାତ କରୁଛନ୍ତି। ଏହାବ୍ୟତୀତ ସ୍ଥାନୀୟ କୁଳେଇପଦା, ଓଳଗ, ଷାଠିବାଙ୍କୁଡା ଗଁାର ଲୋକଙ୍କ ସହ ଗାଈଗୋରୁ ମଧ୍ୟ ଏହି ରାସ୍ତା ଦେଇ ଯିବାଆସିବା କରନ୍ତି। ଏଠାରେ ପ୍ରତି ମୂହୂର୍ତରେ ବଡ଼ଧରଣର ଅଘଟଣ ଘଟିବାର ଆଶଙ୍କା ଥିଲେ ବି ବିଭାଗୀୟ ଅଧିକାରୀଙ୍କ ବେପରୁଆ ନୀତି ସମସ୍ତଙ୍କୁ ଚକିତ କରିଛି। ଆରଡ଼ିକୁ ବିଭିନ୍ନ ସମୟରେ ଜିଲାର ବିଭିନ୍ନ ବିଭାଗ ପ୍ରଶାସନିକ ଅଧିକାରୀ, ରାଜ୍ୟସ୍ତରୀୟ ପ୍ରଶାସନିକ ଅଧିକାରୀ ଓ ମନ୍ତ୍ରୀ ଆଗମନ କରୁଥିଲେ ମଧ୍ୟ ଏଥିପ୍ରତି କାହାର ନଜର ନାହିଁ। ତୁରନ୍ତ ଏହି ସ୍ଥାନରେ ୧୧ କେଭି ତାର ତଳେ ଜାଲି ବାନ୍ଧିବା ସହ ରାସ୍ତାର ଦୁଇପାର୍ଶ୍ୱରେ ୨ଟି ଉଚ୍ଚ ଖୁଣ୍ଟ ପୋତାଯାଉ ବୋଲି ଆରଡ଼ି ଓ ଏହାର ଆଖପାଖ ଗଁାର ଲୋକେ ଦାବି କରିଛନ୍ତି। ଏ ସମ୍ପର୍କରେ ବିଭାଗୀୟ ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ହେଁ ଅସୁରାଳି ଡିଭିଜନର ଏସ୍ଡିଓଙ୍କ ବଦଳି ହୋଇଯାଇଥିବାବେଳେ ତାଙ୍କ ସ୍ଥାନରେ ଅନ୍ୟ କେହି ଯୋଗ ଦେଇ ନ ଥିବାରୁ ମତାମତ ମିଳିପାରି ନାହିଁ।
