ପରଜଙ୍ଗ, ୨୬ା୮(ଡି.ଏନ.ଏ.)- ଢେଙ୍କାନାଳ ଜିଲା ପରଜଙ୍ଗ ବ୍ଲକରେ ହାତୀ ଉପଦ୍ରବରୁ ତ୍ରାହି ମିଳୁନି। ସୋମବାର ସକାଳେ ନରହନ୍ତା ଦନ୍ତା କନ୍ଦରସିଂହା ଗ୍ରାମରେ ପଶି ତାଣ୍ଡବ କରିଥିଲା। ଦନ୍ତାଟି ସକାଳୁ ବିଭିନ୍ନ ସ୍ଥାନରେ ଧାନ କ୍ଷେତ ନଷ୍ଟ କରିବା ସହ ମନଇଚ୍ଛା ଏଣେତେଣେ ପଶିଥିଲା। ତାର ବାଡ଼ ଡେଇଁ ପରିବା ବାଡ଼ିରେ ପଶି ଫସଲ ନଷ୍ଟ କରିଥିଲା। ସେହିପରି ସକାଳ ୧୦ଟା ବେଳେ ଏକ ମାଈ ହାତୀ କୁଆଳୋ ଅଞ୍ଚଳରୁ ବାହାରି ଜାତୀୟ ରାଜପଥରେ ଚଲାବୁଲା କରିଥିଲା। ଏହି ହାତୀଟି ପରଜଙ୍ଗ ଗାଁ ଭିତର ଦେଇ ଡାକ୍ତରଖାନା ଠାରେ ବାହାରି ଥିଲା। ହଠାତ୍ ହାତୀକୁ ନିକଟରେ ଦେଖି ଲୋକେ ଭୟଭୀତ ହୋଇ ଦୌଡିବାକୁ ଲାଗିଥିଲେ। କେତେଜଣ ହାତୀ ଆକ୍ରମଣରୁ ଅଳ୍ପକେ ବର୍ତ୍ତିଥିବା ଜଣାଯାଇଛି। ଖବରପାଇ ବନ ବିଭାଗ କର୍ମଚାରୀ ପହଞ୍ଚି ନିକଟସ୍ଥ ସଂରକ୍ଷିତ ଜଙ୍ଗଲକୁ ହାତୀ ଘଉଡାଇଥିଲା।
