ନୂଆଦିଲ୍ଲୀ,୧୬-୭: ୨୦୧୮-୧୯ ଆର୍ଥତ୍କ ବର୍ଷରେ ଦେଶର ବିଭିନ୍ନ ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡିକର ସାମଗ୍ରୀ ଓ ସେବା ଟିକସ (ଜିଏସ୍ଟି) ସଂଗ୍ରହ ପରିମାଣ ୫.୧୮ ଲକ୍ଷ କୋଟି ଟଙ୍କାକୁ ବୃଦ୍ଧି ଘଟିଛି। ଏହା ୨୦୧୭-୧୮ରେ ୯ ମାସରେ ୨.୯୧ ଲକ୍ଷ କୋଟି ଟଙ୍କା ରହିଥିଲା ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ ସୋମବାର କହିଛନ୍ତି। ଏହା ବାଦ କେନ୍ଦ୍ର ଜିଏସ୍ଟି କ୍ଷତିପୂରଣ ବାବଦକୁ ୨୦୧୮-୧୯ରେ ରାଜ୍ୟଗୁଡିକୁ ୮୧,୧୭୭ କୋଟି ଟଙ୍କା ପ୍ରଦାନ କରିଛି। ଏହା ୨୦୧୭-୧୮ ଆର୍ଥତ୍କ ବର୍ଷର ଜୁଲାଇ-ମାର୍ଚ୍ଚ ସମୟ ମଧ୍ୟରେ ୪୮,୧୭୮ କୋଟି ଟଙ୍କା ରହିଥିଲା। ଟିକସ ଅନୁପାଳନକୁ ଉନ୍ନତ କରିବାକୁ ପ୍ରୟାସ ଜାରି ରହିଛି ବୋଲି ଲୋକସଭାକୁ ଏକ ଲିଖିତ ଉତ୍ତରରେ ନିର୍ମଳା ଏହା କହିଛନ୍ତି। ଜିଏସ୍ଟି ସଂଗ୍ରହରେ ରାଜ୍ୟଗୁଡିକ ଧିରେ ଧିରେ ଉନ୍ନତି କରୁଛନ୍ତି। କେନ୍ଦ୍ର ସରକାର କ୍ଷତିପୂରଣ ସହ ଟିକସ ସଂଗ୍ରହରେ ୧୪% ଅଭିବୃଦ୍ଧି ନେଇ ପ୍ରତିଶ୍ରୁତି ଦେଇଥିବା ସେ ପ୍ରକାଶ କରିଛନ୍ତି।
ବିଜନେସ ଧାରାରେ ବିସ୍ତୃତ ଅଟୋମେଶନ, ଇ-ଓ୍ବେ ବିଲ୍ ବ୍ୟବସ୍ଥା, ଦୃଢ ଅନୁପାଳନ ଯାଞ୍ଚ ବ୍ୟବସ୍ଥା, ପ୍ରସ୍ତାବିକ ଇଲେକଟ୍ରୋନିକ୍ସ ଇନଭଏସ ସିଷ୍ଟମ ଭଳି ବ୍ୟବସ୍ଥା ଟିକସ ସଂଗ୍ରହ ବୃଦ୍ଧି ପାଇଁ ଗ୍ରହଣ କରାଯାଇଥିବା ନିର୍ମଳା କହିଛନ୍ତି। ୨୦୧୭ ଜୁଲାଇ ପହିଲାରୁ ଜିଏସ୍ଟି ଲାଗୁ କରାଯାଇଥିବା ବେଳେ ଏହା ମଧ୍ୟରେ ରାଜ୍ୟ ସ୍ତରର ୧୭ ଟିକସ ବିଲୀନ ହୋଇଛି। ୨୦୧୮-୧୯ ଆର୍ଥତ୍କ ବର୍ଷରେ ହାରାହାରି ମାସିକ ଜିଏସ୍ଟି ସଂଗ୍ରହ ୯୮,୧୧୪ କୋଟି ଟଙ୍କାକୁ ବୃଦ୍ଧି ଘଟିଛି। ଏହା ୨୦୧୭-୧୮ରେ ୮୯,୮୮୫ କୋଟି ଟଙ୍କା ରହିଥିଲା।