ନୂଆଦିଲ୍ଲୀ,୬।୬: ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳଗୁଡିକୁ ସାମଗ୍ରୀ ଓ ସେବା ଟିକସ(ଜିଏସ୍ଟି) କ୍ଷତିପୂରଣ ବାବଦ କେନ୍ଦ୍ର ସରକାର ୩୬,୪୦୦ କୋଟି ଟଙ୍କା ପ୍ରଦାନ କରିଛନ୍ତି। ଫେବୃୟାରୀ ସୁଦ୍ଧା ଏହି ଅର୍ଥ ପ୍ରଦାନ କରାଯାଇଥିବା ଜଣାପଡିଛି। ଜିଏସ୍ଟି କାର୍ଯ୍ୟକାରୀ ହେବା ପରେ ରାଜ୍ୟଗୁଡିକ ସହୁଥିବା କ୍ଷତିର ଭରଣା ଲାଗି ଏଭଳି ବ୍ୟବସ୍ଥା କରାଯାଇଛି। ଏପ୍ରିଲରୁ ନଭେମ୍ବର ୨୦୧୯ ଯାଏ କେନ୍ଦ୍ର ସରକାର ୧.୧୫ ଲକ୍ଷ କୋଟି ଟଙ୍କାର କ୍ଷତିପୂରଣ ପ୍ରଦାନ କରିଛନ୍ତି। କରୋନା ପାଇଁ ରାଜ୍ୟଗୁଡିକ ବର୍ତ୍ତମାନ ଅଧିକ ଅର୍ଥ ଖର୍ଚ୍ଚ କରିବାକୁ ପଡୁଛି। ଏହାକୁ ଧ୍ୟାନରେ ରଖି କେନ୍ଦ୍ର ସରକାର ୨୦୧୯ ଡିସେମ୍ବରରୁ ୨୦୨୦ ଫେବୃୟାରୀ ଅବଧି ଲାଗି ୩୬,୪୦୦ କୋଟି ଟଙ୍କା ପ୍ରଦାନ କରିଥିବା ଜଣାପଡିଛି। ୨୦୧୮-୧୯ରେ ୬୯,୨୭୫ କୋଟି, ୨୦୧୭-୧୮ରେ ୪୧,୧୪୬ କୋଟି ପ୍ରଦାନ କରାଯାଇଛି। ଗତ ୩ ଆର୍ଥତ୍କ ବର୍ଷରେ ସେସ୍ ବା ଉପକର ବାବଦକୁ ସରକାର ଯଥାକ୍ରମେ ୬୨,୬୧୧ କୋଟି, ୯୫,୦୮୧ କୋଟି ଏବଂ ଗତ ଆର୍ଥତ୍କ ବର୍ଷ ୯୫ ହଜାର କୋଟି ଟଙ୍କା ସଂଗ୍ରହ କରିଛନ୍ତି। ୨୦୧୭-୧୮ ଏବଂ ୨୦୧୮-୧୯ରେ ଯେତେ ପରିମାଣର ସେସ୍ ସଂଗ୍ରହ କରାଯାଇଛି ରାଜ୍ୟଗୁଡିକୁ ପ୍ରଦାନ କରାଯାଇଥିବା କ୍ଷତିପୂରଣ ରାଶି ତା’ଠାରୁ କମ୍ ରହିଛି। ବଳକା ରାଶି କେନ୍ଦ୍ର ସରକାରଙ୍କ ନିକଟରେ ରହିଥିଲା।
