କୃଷ୍ଣପ୍ରସାଦ,୨ା୭.(ଡି.ଏନ୍.ଏ.)-ପୁରୀ ଜିଲା କୃଷ୍ଣପ୍ରସାଦ ବ୍ଲକ ଶିଆଳ ଗାଁରେ ଜଣେ ନବ ବିବାହିତା ବଧୂଙ୍କୁ ଅଧିକ ଯୌତୁକ ଦାବି କରି ସୋମବାର ହତ୍ୟା କରାଯାଇଥିବା କୃଷ୍ଣପ୍ରସାଦ ଥାନାରେ ଅଭିଯୋଗ ହୋଇଛି। ପୋଲିସ ସୂତ୍ରରୁ ପ୍ରକାଶ, ମୃତା ବଧୂ ଜଣକ ହେଉଛନ୍ତି ମୋରଡ଼ା ଅଞ୍ଚଳ ନୂଆଗାଁ ବଟକୃଷ୍ଣ ପଲେଇଙ୍କ ସାନ ଝିଅ ମାମାଲି ପଲେଇ(୨୦) । ଶିଆଳଗାଁ ଭ୍ରମର ବିଶ୍ୱାଳଙ୍କ ପୁଅ ମିଟୁ(୨୫)ଙ୍କ ସହ ଚଳିତ ମେ ୧୭ ତାରିଖରେ ମାମାଲିଙ୍କ ବିବାହ ହୋଇଥିଲା। ବାହାଘରବେଳେ ଯୌତୁକ ଖର୍ଚ୍ଚ ବାବଦକୁ ୫୦ ହଜାର ଟଙ୍କା ସହ ସୁନା, ରୁପା ଅଳଙ୍କାର ଓ ବାସନ କୁସନ ଦିଆଯାଇଥିଲା ା ତେବେ ବିବାହର କିଛି ଦିନ ପରେ ଅଧିକ ୫୦ ହଜାର ଟଙ୍କା ଯୌତୁକ ଦାବି କରି ଶ୍ୱଶୁର ଘର ଲୋକେ ବୋହୂଙ୍କୁ ନିର୍ଯାତନା ଦେଇ ଆସୁଥିବା ମାମାଲି ବାପଘର ଲୋକେ ଅଭିଯୋଗ କରିଛନ୍ତି। ସୋମବାର ସକାଳ ୫ଟାରେ ନବ ବଧୂଙ୍କ ଶ୍ୱଶୁର ମାମାଲିଙ୍କ ବାପଘର ପରିବାରକୁ ଖବର ଦେଇଥିଲେ ଯେ, ତୁମ ଝିଅଙ୍କ ଦେହ ଖରାପ ଅଛି ଶୀଘ୍ର ଆସ ଦେଖିବ । ତେବେ ବାପଘର ଲୋକେ ପହଞ୍ଚତ୍ବା ପରେ ମାମାଲିଙ୍କ ମୃତ୍ୟୁ ହୋଇଥିବା ଦେଖିବାକୁ ପାଇଥିଲେ ା ତାଙ୍କ ମୁଣ୍ଡରେ ମାଡ଼ ମରାଯାଇଥିବା କ୍ଷତ ଚିହ୍ନ ଦେଖିବାକୁ ମିଳିଥିଲା। ଏ ଘଟଣା ନେଇ ଶ୍ୱଶୁର, ସ୍ବାମୀ ଓ ଶାଶୁ ଝଳିଙ୍କ ନାମରେ ମୃତକାଙ୍କ ଭାଇ ପ୍ରକାଶ କୃଷ୍ଣପ୍ରସାଦ ଥାନାରେ ଅଭିଯୋଗ କରିଛନ୍ତି। ଘଟଣା ଲେଖା ହେବା ପର୍ଯ୍ୟନ୍ତ ମୃତଦେହକୁ ଅଟକ ରଖିପୋଲିସ ତଦନ୍ତ ଆରମ୍ଭ କରୁଥିଲା।
