ବୌଦ୍ଧ,୯ା୨(ସ୍ବ.ପ୍ର):ବୌଦ୍ଧ କୃଷି ବିଭାଗ ପକ୍ଷରୁ କିଷାନ କ୍ରେଡିଟ କାର୍ଡ ନେଇ ଏକ ଖବରଦାତା ସମ୍ମିଳନୀ ଜିଲା କୃଷି କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି ା ଜିଲା ମୁଖ୍ୟ କୃଷି ଅଧିକାରୀ ରାମଚନ୍ଦ୍ର ନାଏକଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମ୍ମିଳନୀରେ ଜିଲାର ପ୍ରତ୍ୟେକ ଯୋଗ୍ୟ ଚାଷୀଙ୍କୁ କିଷାନ କ୍ରେଡିଟ କାର୍ଡର ସୁବିଧା ଯୋଗାଇଦେବାକୁ ଯୋଜନା ପ୍ରସ୍ତୁତ କରାଯାଉଥିବା ସୂଚନା ଦେଇଥିଲେ। ରାଜ୍ୟ ସରକାରଙ୍କ କାଳିଆ ଯୋଜନା ଓ କେନ୍ଦ୍ର ସରକାରଙ୍କ ପ୍ରଧାନମନ୍ତ୍ରୀ କୃଷକ ନିଧି ଯୋଜନା କାର୍ଯ୍ୟକାରୀ କରାଯିବା ପରେ ଏବେ ପ୍ରତ୍ୟେକ ଚାଷୀଙ୍କୁ କିଷାନ କ୍ରେଡିଟ କାର୍ଡ ଅନ୍ତର୍ଭୁକ୍ତ କରାଯିବାକୁ ନିଷ୍ପତ୍ତି ଗ୍ରହଣ କରାଯାଇଛି । ଆସନ୍ତା ୧୫ ଦିନ ମଧ୍ୟରେ ଏହି କାର୍ଯ୍ୟ ସମାପନ କରାଯିବାକୁ ଗୁରୁତ୍ୱ ଦିଆଯିବା ସହିତ ପ୍ରତ୍ୟେକ ପଞ୍ଚାୟତ, ସମବାୟ ସମିତି ଜରିଆରେ ଚାଷୀମାନଙ୍କୁ ସଚେତନ କରାଯିବା ସହିତ ବ୍ୟାଙ୍କ ଜରିଆରେ କିମ୍ବା ସିଧାସଳଖ ଅନଲାଇନରେ ଚାଷୀମାନେ ଆବେଦନ କରିବାର ବ୍ୟବସ୍ଥା ରହିଛି। ନାମମାତ୍ର ଓ କ୍ଷୁଦ୍ର ଚାଷୀମାନେ ବିଶେଷ କରି ଏହି ଯୋଜନାରେ ଲାଭାନ୍ବିତ ହେବା ସହିତ ଅର୍ଥ ଅଭାବରୁ ଚାଷରୁ ବଞ୍ଚିତ ନ ହେବା ପାଇଁ ଯୋଜନା କରାଯାଇଛି।
ସୂଚନା ଅନୁସାରେ, ବୌଦ୍ଧ ଜିଲାରେ ୭୫,୯୨୨ ଚାଷୀ ପରିବାର ଥିବାବେଳେ ସେମାନଙ୍କ ମଧ୍ୟରୁ ୫୬,୨୬୪ ପରିବାର ପ୍ରଧାନମନ୍ତ୍ରୀ କିଷାନ ନିଧି ଯୋଜନାରେ ଅନ୍ତର୍ଭୁକ୍ତ ହୋଇଛନ୍ତି। ସେଥିମଧ୍ୟରୁ ପ୍ରାୟ ୨୦ ହଜାର ଚାଷୀ ପରିବାର କିଷାନ କ୍ରେଡିଟ କାର୍ଡ କରି ନ ଥିବାବେଳେ ସେମାନଙ୍କୁ କିପରି ଏଥିରେ ସାମିଲ କରାଯାଇପାରିବ ସେ ନେଇ ଯୋଜନା ପ୍ରସ୍ତୁତ କରାଯାଉଛି। ଚାଷୀମାନେ ଏହି କ୍ରେଡିଟ କାର୍ଡ ବ୍ୟବହାର କରି ମାତ୍ର ୧ରୁ ୨ ପ୍ରତିଶତ ସୁଧରେ ଚାଷ ପାଇଁ ଜରୁରୀ ଆବଶ୍ୟକତାକୁ ପୂରଣ କରିବା ସହ ପରିବାରର ଅନ୍ୟ ଖର୍ଚ୍ଚ ମଧ୍ୟ ତୁଲାଇପାରିବେ। ଏହି କାର୍ଡ ଆବେଦନ ପାଇଁ କୌଣସି କାଗଜପତ୍ର କିମ୍ବା ଅର୍ଥ ଦେବାକୁ ପଡିବ ନାହିଁ। ଚାଷୀମାନେ ଆବେଦନ କରିବା ପରେ ସମ୍ପୃକ୍ତ କାର୍ଯ୍ୟାଳୟ ପକ୍ଷରୁ ଆବେଦନପତ୍ର ଅନୁଯାୟୀ ତଥ୍ୟ ଯାଞ୍ଚ କରାଯିବା ପରେ କ୍ରେଡିଟ କାର୍ଡ ଯୋଗାଇଦେବାର ବ୍ୟବସ୍ଥା କରାଯିବ। ତେଣୁ ପ୍ରତ୍ୟେକ ଚାଷୀ କିଷାନ କ୍ରେଡିଟ କାର୍ଡ କରାଇବା ସହିତ ଏହାର ସଫଳ ଉପଯୋଗ କରିବାକୁ ଖବରଦାତା ସମ୍ମିଳନୀ ଜରିଆରେ ଜିଲା କୃଷି କାର୍ଯ୍ୟାଳୟ ପକ୍ଷରୁ ଅନୁରୋଧ କରାଯାଇଛି। ଏହି ସମ୍ମିଳନୀରେ ଡିଡିଏମ ନାବାର୍ଡ ଟି.ଏସ. ରାଉତ, ସହକାରୀ ଉଦ୍ୟାନ ଅଧିକାରୀ ହରଭଙ୍ଗା ଜ୍ଞାନରଞ୍ଜନ ଦିଗାଲ, ଜଳଛାୟା ପ୍ରକଳ୍ପ ମିଶନର ପ୍ରକଳ୍ପ ନିର୍ଦ୍ଦେଶକ ରାଘବ ମଲ୍ଲିକ, ଲିଡ୍ ବ୍ୟାଙ୍କ ମ୍ୟାନେଜର ଆର.କେ. ସେଠୀ, ସହକାରୀ ସମବାୟ ନିବନ୍ଧକ ଭୀମସେନ ସାହୁ, ପ୍ରାଣୀ ଚିକିତ୍ସା ବିଭାଗର ସହକାରୀ ନିର୍ଦ୍ଦେଶକ ଡ. ପ୍ରିୟବ୍ରତ ବେହେରା, ଜିଏମ ଡିଆଇସି ଉଦୟନାଥ ପାତ୍ର ଓ ଉତ୍କଳ ଗ୍ରାମ୍ୟ ବ୍ୟାଙ୍କ ରିଜିଓନାଲ ମ୍ୟାନେଜର ଏ.ଏସ ରାଓ ପ୍ରମୁଖ ଯୋଗଦେଇ ପ୍ରଧାନମନ୍ତ୍ରୀ କିଷାନ ନିଧି ଯୋଜନା ଓ କିଷାନ କ୍ରେଡିଟ କାର୍ଡର ଉପଯୋଗିତା ସମ୍ପର୍କରେ ଆଲୋଚନା କରିଥିଲେ।
