ରସୁଲପୁର,୧୩ା୪(ଡି.ଏନ୍.ଏ.): ଯାଜପୁର ଜିଲା ରସୁଲପୁର ବ୍ଲକ ବ୍ରହ୍ମବରଦା ଅଞ୍ଚଳରେ ପ୍ରଥମ କରୋନା ରୋଗୀ ଚିହ୍ନଟ ହୋଇଥିଲେ। ଏଥିପାଇଁ ଜିଲା ପ୍ରଶାସନ ପକ୍ଷରୁ ବ୍ରହ୍ମବରଦା ଅଞ୍ଚଳର ୩କିମି ପରିଧି ଅଞ୍ଚଳକୁ କଣ୍ଟେନମେଣ୍ଟ ଜୋନ୍ ଭାବରେ ଘୋଷଣା କରାଯାଇଥିଲା। ଏଥିପାଇଁ ଏହି ଅଞ୍ଚଳକୁ ଲକ୍ଡାଉନରୁ ସଟ୍ଡାଉନକୁ ପରିବର୍ତ୍ତନ ହୋଇଥିଲା। ଏହି କଟକଣା ଏକ ସପ୍ତାହ ପର୍ଯ୍ୟନ୍ତ ଲାଗୁ ହୋଇଥିଲା। କଟକଣା ସମୟରେ ଏହି ଅଞ୍ଚଳରେ ପ୍ରଶାସନ ପକ୍ଷରୁ ଅତ୍ୟାବଶ୍ୟକୀୟ ସାମଗ୍ରୀ ଯୋଗାଇ ଦିଆଯାଉଥିଲା। ବୃଦ୍ଧି ଘଟିଥିବା ସଟ୍ଡାଉନ ଅବଧି ରବିବାର ରାତି ୮ଟାରେ ଶେଷ ହୋଇଥିଲା। ପ୍ରଶାସନ ସେହି ସମୟରୁ ହିଁ ସଟ୍ଡାଉନ ଉଠାଇ ଲକ୍ଡାଉନକୁ ବଳବତ୍ତର ରଖିଛି। ଏବେ ବ୍ରହ୍ମବରଦା ଅଞ୍ଚଳରେ ଅତ୍ୟାବଶ୍ୟକୀୟ ସାମଗ୍ରୀ ଦୋକାନ ଖୋଲାରହିଛି। ଚଳାଚଳ ସାମାନ୍ୟ ସ୍ବାଭାବିକ ହୋଇଛି। ସାଧାରଣ ଲୋକେ ବାହାରକୁ ବାହାରିଛନ୍ତି। ଅତ୍ୟାବଶ୍ୟକୀୟ ସାମଗ୍ରୀ ଦୋକାନ, ଏଟିଏମ୍ ସମ୍ମୁଖରେ ଭିଡ଼ ପରିଲକ୍ଷିତ ହୋଇଛି। ଭିଡ଼ ଭିତରେ କିଛି ସ୍ଥାନରେ ସାମାଜିକ ଦୂରତା କଟକଣା ପାଳନ ହେଉ ନ ଥିବାର ଦେଖାଯାଇଛି। ଲୋକେ ବିନା ମାସ୍କରେ ବୁଲୁଥିବା ପରିଲକ୍ଷିତ ହୋଇଛି।
