ନୂଆଦିଲ୍ଲୀ,୨୬-୫: ଏନ୍ଡିଏ ସରକାର ଆସନ୍ତା ଜୁଲାଇରେ ନିଜର ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିପାରନ୍ତି। ଦ୍ୱିତୀୟ କାର୍ଯ୍ୟକାଳର ପ୍ରଥମ ପୂର୍ଣ୍ଣାଙ୍ଗ ବଜେଟରେ ସରକାର ମଧ୍ୟବିତ୍ତଙ୍କ ଲାଗି ଟିକସ ଛାଡ କରି ସେମାନଙ୍କୁ ଆଶ୍ୱସ୍ତ କରିପାରନ୍ତି। ସାଧାରଣ ନିର୍ବାଚନ ପୂର୍ବରୁ ଅନ୍ତରୀଣ ବଜେଟ ଉପସ୍ଥାପନ କରି ସେତେବେଳେ ଅର୍ଥମନ୍ତ୍ରୀ ଦାୟିତ୍ୱରେ ଥିବା ପୀୟୂଷ ଗୋୟଲ କହିଥିଲେ ଯେ, ଜୁଲାଇରେ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ ବେଳେ ମଧ୍ୟବିତ୍ତ ଓ ନୂତନ ମଧ୍ୟବିତ୍ତଙ୍କ ଲାଗି ସରକାର ସ୍ବତନ୍ତ୍ର ଧ୍ୟାନ ଦିଆଯିବ। ଇତିମଧ୍ୟରେ ଅର୍ଥ ମନ୍ତ୍ରଣାଳୟ ପକ୍ଷରୁ ବଜେଟ ପ୍ରସ୍ତୁତି ଆରମ୍ଭ ହୋଇଯାଇଛି। ଏହା ଇଣ୍ଡଷ୍ଟ୍ରି ପ୍ରତିନିଧି ଏବଂ ଅର୍ଥନୀତିଜ୍ଞଙ୍କ ସହ ଆଲୋଚନା ଆରମ୍ଭ କରିସାରିଛି।
ଆୟକର ଛାଡ
ଅନ୍ତରୀଣ ବଜେଟରେ ୫ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ ଟିକସ ଛାଡ କରାଯାଇଥିଲା। ଏହାକୁ ବଜାୟ ରଖାଯାଇପାରେ। ଏହାବ୍ୟତୀତ, ପୂର୍ଣ୍ଣାଙ୍ଗ ବଜେଟରେ ମଧ୍ୟବିତ୍ତଙ୍କ ଲାଗି ଆୟକର ସ୍ଲାବ୍ରେ ପରିବର୍ତ୍ତନ କରାଯାଇପାରେ। ସେହିପରି ଆୟକର ଛାଡ ସୀମାକୁ ୧.୫୦ ଲକ୍ଷ ଟଙ୍କାରୁ ବଢ଼ାଯାଇପାରେ। ୫୦ ବର୍ଷ ଧରି ଚାଲି ଆସୁଥିବା ଆୟକର ଆଇନରେ ସଂଶୋଧନ କରାଯାଇପାରେ। ଏଥିଲାଗି ସରକାର ପୂର୍ବରୁ ସ୍ବତନ୍ତ୍ର ଟାସ୍କଫୋର୍ସ ଗଠନ କରିସାରିଛନ୍ତି। ଆସନ୍ତା ୩୧ରେ ଏ ସଂକ୍ରାନ୍ତରେ ରିପୋର୍ଟ ମିଳିଯିବ। ଏହାର ସୁପାରିସ୍ଗୁଡ଼ିକୁ ବଜେଟରେ ଲାଗୁ କରାଯାଇପାରେ।
କଓ୍ବୋଇସି ସହ ଯୋଡାଯାଇପାରେ ଆଧାର
ଆଧାରକୁ କଓ୍ବୋଇସି ସହ ଯୋଡିଦିଆଯାଇପାରେ। ସୁପ୍ରିମକୋର୍ଟ ରାୟ ପରେ ବ୍ୟାଙ୍କ ଆକାଉଣ୍ଟ ଖୋଲିବା, ମୋବାଇଲ ଫୋନ୍ ଲାଗି ନୂଆ ସିମ୍ ପ୍ରଦାନ କରିବା, ଅଣ ଆର୍ଥିକ ନେଣଦେଣ କ୍ଷେତ୍ରରେ ଆଧାର ବାଧ୍ୟତାମୂଳକ ହୋଇ ରହିନାହିଁ। ଏହାପରେ ସରକାର ଆଇନରେ ସଂଶୋଧନ ବ୍ୟବସ୍ଥା କରିବା ଉଦ୍ଦେଶ୍ୟରେ ଏକ ବିଲ୍ ଆଣିଲେ। ଏଥିରେ କଓ୍ବୋଇସି ଲାଗି ଆଧାର ବାଧ୍ୟତାମୂଳକ କରାଯାଇଛି। ବର୍ତ୍ତମାନ ଏହି ବିଲ୍ ଲୋକ ସଭାରେ ଅନୁମୋଦନ ଲାଭ କରିଥିବା ବେଳେ ରାଜ୍ୟ ସଭାରେ ଅଟକିଛି।
ପେନସନ ଯୋଜନାର ସମୟସୀମା ବୃଦ୍ଧି
ଏହାବ୍ୟତୀତ ବରିଷ୍ଠ ନାଗରିକଙ୍କ ଲାଗି ଆରମ୍ଭ କରାଯାଇଥିବା ପେନସନ ଯୋଜନାର ସମୟସୀମାକୁ ୨୦୨୦ରୁ ବୃଦ୍ଧି କରି ୨୦୨୪ ପର୍ଯ୍ୟନ୍ତ କରାଯାଇଛି। ଏହି ଯୋଜନା ଅଧୀନରେ ବରିଷ୍ଠ ନାଗରିକ ୧୫ ଲକ୍ଷ ଟଙ୍କା ପର୍ଯ୍ୟନ୍ତ ନିବେଶ କରିପାରିବେ।
ଗୃହଋଣ ସବ୍ସିଡି
ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ଗୃହଋଣ ଉପରେ ମିଳୁଥିବା ସବ୍ସିଡିକୁ ଆସନ୍ତା ୫ ବର୍ଷ ଲାଗି ବୃଦ୍ଧି କରାଯାଇପାରେ।
